Семей қалалық Балалар мен жастардың шығармашылық сарайында білім бөлімінің кеңесі өтті. Кеңеске білім беру мекемелерінде құрылған кәсіподақ ұйымының төрағалары, қаланың ата-аналар активі мен білім ошақтарының басшылары және ұстаздар қауымы қатысты. Кеңестің күн тәртібі бойынша Семей қалалық білім бөлімінің өткен жылы атқарған жұмыстары қорытындыланып, 2017 жылға арналған жоспарлары талқыланды. Тақырып бойынша баяндама жасаған білім бөлімінің басшысы Наталия Фесенко мектепке дейінгі мекемелер жұмысы мен орта білім беру ошақтарының жай-күйіне тоқталды.
Қаланың бас мұғалімінің айтуынша, 2015 жылы 32 балабақша, 49 шағын орталық болса, қазіргі таңда 48 балабақша мен 48 шағын орталық жұмыс істеп тұр. 2016 жылы мемлекеттік-жекеменшік серіктестік аясында 541 баланы қамтитын 7 балабақша ашылған. Десе де шағын орталықтардың 33 пайызы ғана толық күн режімінде жұмыс істейді. Яғни, 1900 бала мектепке дейінгі білімді қысқартылған түрде алуға мәжбүр. Ал ауылдық жерлерде 15 шағын орталық бар. Оның тек үшеуі ғана толық күнге арналған. Ата-аналардың қалтасы көтермейтіндіктен, ауылдық жерлерде жекеменшік балабақша ашу қолға алынбайтын көрінеді.
Сонымен бірге кеңесте мектеп мәселесі де қозғалды. Білім бөлімінің мәліметіне сәйкес, 2016-2017 оқу жылында шаһардағы 66 мектепте 41 960 оқушы білім алуда. 2009-2011 жылдары туу көрсеткіші жоғары болуына орай, өткен жылмен салыстырғанда шәкірт саны да артқан.
2016 жылы білім саласын қаржыландыруға 12 млрд. теңге бөлініпті. Ол қаржыға 42 мекемеге ағымдағы, бесеуіне күрделі жөндеу жұмыстары жүргізіліп, қалған қаржы саланы дамытуға жұмсалған. Ал 2017 жылы 17 білім ошағына ағымдағы жөндеу жұмыстарын жүргізіп, 7-еуінің шатырын ауыстыру, тағы 7 мекеменің жылыту, суағар, кәріз жүйесін жөндеу жоспарланып отыр. Сондай-ақ Юность кентіндегі 1200 орындық, Бобровка саяжайындағы 600 орындық мектеп құрылысы қарқынды жүргізілуде.
Мектептегі басты мәселе оқушыларды ыстық тамақпен қамту екендігін жеткізген Наталия Анатольевна 54 мектепте асхана бар екендігін, бірер мектеп таза ауыз су мәселесіне орай ыстық тамақпен қамтылмай отырғандығын мәлімдеді.
Пилоттық жоба ретінде 30 мектепте электронды күнделік, 35-інде «e-learning» электронды оқыту жүйесі қолға алынған. Сонымен қоса «Дарынды мектеп», «Шығыс Ұландары» сыныптары мен бір балабақшада «Ой-ойна» кабинеті ашылған.
Республикалық пәндер олимпиадасының облыстық кезеңінде «Үздік олимпиадалық команда» аталымын жеңіп алған Семей қаласы мектептерінің командасына құрмет көрсетіліп, №6 гимназияға «Үздік қалалық мектеп — 2017» аталымы беріліп, ұжымға диплом табысталды. Сондай-ақ «Үздік мектеп асханасы», «Үздік мұз қалашық», «Үздік спорт залы» аталымдары бойынша да жеңімпаздар марапатталды.
Әйгерім СӘРСЕНҒАЛИ,
«Семей таңы»
