«Ғұмырдария» продюсерлік орталығының ұйымдастыруымен дәстүрлі түрде өтетін ІХ Республикалық Мұқағали Мақатаевтың өлеңдерін оқудан және өлеңіне жазылған әндерден балалар арасындағы байқаудың өту ережесін Т.Аманов атындағы №16 жалпы орта білім беретін мектеп ұжымы алған сәттен бастап белгіленген номинациялар бойынша мектеп мұғалімдері оқушылармен қызу дайындық бастап кетті. Ережеге сәйкес дайындалған топ Семейден Алматы шаһарына жол тартты.
Жүрек дірілінде құлын жырларын кісінеткен ұландардың Алатаудың мұзбалағына деген сағынышы байқалып, аққудың қанатына жыр жазған Мұқағалиға құрметі ерекше көрінді. Еліміздің түкпір-түкпірінен жиналған қатысушылардың байқауға өте мықты дайындықпен келгендіктері білініп-ақ тұрды. ҚР-ның кино қайраткері, ҚР кинематографиясының үздігі Шаяхмет Имашұлы төрағалық еткен қазылар алқасының құрамында Мұқағалидың келіні Бақытгүл Айдарова, ақын Бақыт Дәлденбаев, балалар байқауының авторы Айман Тоқтарбекқызы мен продюсер Болат Есіркепов болды.
«Көркемсөз» номинациясы бойынша қатысушы ақынның екі бірдей өлеңін нақышына келтіріп айтуға тиіс болатын-ды. Әртүрлі тақырыптағы өлеңдерін бірінен кейін бірі оқыған жүйріктердің барлығы да «сен тұр, мен атайын» дегендер. Болмысты да, болмасты да армандау керектігін ел ойына салып, бұлқынып жатқан сәбидің пішінін суреттеп берген Алуа Алпанованы қазылар алқасы жоғары бағаласа, бақыттың не екенін түсіндіріп, «Махамбет, Абайлар» деп жар салған Әмина Ермекова көрерменнің ыстық ықыласына бөленді. Дараланған қос қатысушының әрқайсысы Семейдің қанжығасын бас жүлдемен толықтырды. Ақынның қайсар рухты жырларын халыққа жеткізе білген Бекнұр Сарқытқанұлы мен Қасымды жырлаған Алина Мұратқан І орынды еншілесе, Мақатаевтың поэзиясымен сусындаған Дана Мүкпенова ІІ орынға ие болды. Ал «Шұбат пен ботаны» оқыған Ақбота Амангельдинова ІІІ орынмен марапатталды. Аталған оқушылар кіші және орта топ бойынша жүлдеге ие болса, жасөспірім топ қатысушысы Еркежан Тұрсынғалиева анасының бақытты екендігін жүректен жүрекке жеткізіп, бас жүлдеге ие болды.
Тұрсынғазы Рахимовтың әніне жазылған ақынның «Қазағым-ай» әнін Эльдана Таурбаева орындап, І орынды, «Бақыт деген…» әнін Әмина Ермекова шырқап, ІІІ орынды жеңіп алды. Қос жұлдыздың екінші қосымша әндері балалар композиторы Алтын Маханбетованың қорынан болғандығын ескерте кетуді жөн санаймын. Жанар Ашманқызы Айтбаеваның жетекшілігімен дайындалған «Тұяқ» биі мен ақынның «Туған өлке» әніне қойылған композиция жоғары көрсеткішке ие болып, бас жүлдемен марапатталды.
Ұйымдастырушы топтар, қазылар алқасы марапаттау барысында Семей ұландарының өте жоғары деңгейдегі дайындықпен келгендіктерін атап өтіп, өзгелерге үлгі етіп, Абай, Мұхтар, Шәкәрім туған жерге ыстық сәлемдерін жолдады. Өз ісінің мамандарынан мақтау естіген Аманов мектебінің оқушылары қуанып, жетекшілері де еңбектерінің жемісін көрді. Оқушыны басынан аяғына дейін дайындап, әрбір сөзін нық айтқызып, киім киісіне, тұрысына, сахна мәдениетіне ерекше көңіл бөлген ұстаздардың қатарында Ж.Дүсебаева, М.Ажгожина, К.Қағазбаева, Б.Нұрғалиев, Ж.Айтбаева, Д.Байболова бар. Балаларын шыңдап, аталмыш байқауға қатыстырып отырған мұғалімдерге және үнемі қолдау көрсетіп отыратын мектеп директоры Б.Құрманғалиеваға ата-аналардың алғысы шексіз. Бір аптаға созылған сапарда оқушылар Алматы қаласында, байқаудан тыс, өмірлеріне азық болатын кітапханалар мен мұражайларға барып, түрлі көрмелермен танысты. Мұқағали Мақатаев туралы білімдерін толықтырып, ой-өрістерін кеңейтіп қайтты.
Д.ОРАЛБАЙ,
Семей қаласы.
