Аптаның алғашқы жұмыс күні «Нұр Отан» партиясы Төрағасының бірінші орынбасары Мұхтар Құл-Мұхаммед Шығыс Қазақстан облысына жасаған жұмыс сапары аясында Семей қаласында болды. Партия Төрағасының бірінші орынбасары Семейдің сол жағалауын жылумен қамтамасыз ететін №1 ЖЭО-дағы жаңғырту жұмыстарымен танысты. Семейге сапары кезінде Мұхтар Құл – Мұхаммед жедел медициналық жәрдем ауруханасында ақ халатты абзал жандармен жүздесті. Мұхтар Абрарұлы дәрігерлермен Елбасының Қазақстан халқына арнаған Жолдауындағы денсаулық сақтау саласын дамытуға бағытталған басым бағыттарды талқылады.
«Нұр Отан» партиясы Төрағасының бірінші орынбасары Мұхтар Құл-Мұхаммед Семейге жасаған сапарында алдымен №1 ЖЭО-да болды. Осыдан бірнеше жыл бұрын Семей қаласындағы өзекті мәселелердің бірі жылумен қамтамасыз ету болатын. Бұл өз кезегінде семейліктер үшін біршама қиындықтар туғызғанын да ұмытқан жоқпыз. Шаһардың қыстан қысылмай шығуы үшін, үкіметтік деңгейде арнайы бағдарлама қаралып, қомақты қаражат та бөлінді. Бұл ретте Семейдің сол жағалауын жылумен қамтуда жаңа жылу беру нысаны салынып, іске қосу кезең – кезеңмен жүзеге асуда. Қазір №1 ЖЭО-да жұмыстар аяқталды десе де болады. Тұрғындар жаңартылған жылу орталығының іске қосылуын асыға күтуде, дегенмен ол үшін әлі де миллиардтан астам теңге қажет.
Тарқатып айтар болсақ, бүгінгі күні орталықты қайта жаңғыртудың негізгі жобасына түзетулер енгізілген. Ол бойынша жоба құны 1,8 млн. теңгеге артыпты. Бұл жұмыстарға №6 және №7 қазандықтардың үстіңгі жылытқыштары ауыстырылмақ. Сонымен қатар орталықты іске қосу және ретке келтіру жұмыстарына 680 млн. теңге қаржы жұмсау көзделуде.
— Семей қаласын жылумен қамту жыл сайын мәселе тудырып келгенін білесіздер. Бұл — қаладағы ірі жылу орталығы. Елбасының тапсырмасы бойынша аталған орталықты қайта жаңғыртудан өткізу үшін бүгінгі күнге дейін 23 млрд. теңге қаражат бөлініп, ауқымды жұмыстар жүргізілген. Елбасының арқасында тек қана Семей қаласындағы бір нысанға осынша қомақты қаражат бөлініп отыр. Осының барлығы Мемлекет басшысының Семейге жасап жатқан үлкен қамқорлығының белгісі. Бүгінгі күні бұл жұмыстардың нәтижесінде қаланың сол жағалауы толықтай жылумен қамтамасыз етіліп отыр. Алдағы уақытта жылу орталығындағы жұмыстарды аяқтау үшін қосымша 2,9 млрд. теңге қаржы қажет. Бұл бюджетке енгізіліп отыр. Семей облыс орталығы болып тұрған кезде, орталықтағы халықтың саны 230 мың болатын, қазір 340 мың халық тұрады. Яғни қазір Семейдің халқы Петропавл, Көкшетау, Қызылорда сияқты облыс орталықтарының халқынан көп. Сондықтан Семей қаласына көп көңіл бөлу керек. «Нұр Отан» партиясы осы позицияны ұстанады және қолдайды,- деді «Нұр Отан» партиясы Төрағасының бірінші орынбасары Мұхтар Құл-Мұхаммед.
Мұхтар Абрарұлы бұдан кейін «100 мектеп – 100 аурухана» бағдарламасының шеңберінде қалада жаңадан тұрғызылған жедел медициналық жәрдем ауруханасында болды. Зәулім әрі кең жаңа аурухана ғимаратында сегіз стационарлық бөлімше мен Семейдің медициналық университетінің алты кафедрасы орналасқан. Аурухана директоры Қайноллан Мусиннің айтуынша, жаңа емдеу мекемесінің сыйымдылығы 325 орын. Ал аурухананың құрылысына республикалық бюджеттен 11 млрд. теңге жұмсалған. Бұл қаражаттың 2,8 млрд. теңгесі заманауи медициналық құрал-жабдықтар алуға жұмсалыпты. Олардың ішінде гемодиализге арналған «жасанды бауыр» аппараты, функционалды модульдермен қамтылған орталықтандырылған мониторинг стансасы, асқынған диализ жүйесі сияқты жаңа құрал-жабдықтар бар. Мұхтар Абрарұлы жаңа аурухананың барлық заманауи талаптарға сай салынғанын, ал құрал-жабдықтармен қамтылуы орталықты әлемдегі ең үздік медициналық мекемелердің қатарына қосуға мүмкіндік беретінін атап өтті. Мамандардың біліктілігі де жоғары екеніне көз жеткізді.
Дәрігерлермен әңгімелесу барысында Мұхтар Құл-Мұхаммед Президент жария еткен «Үшінші жаңғырудың» бүкіл Қазақстанды қамтитынын және денсаулық сақтау саласының да одан тыс қалмайтынын атап өтті.
— Мемлекет басшысының Жолдауында әлеуметтік мәселелерге, оның ішінде денсаулық сақтау саласына айрықша көңіл бөлінген. Елімізде 1 шілдеден бастап жалпы әлемдік тәжірибенің тиімділігіне негізделген міндетті медициналық сақтандыру жүйесі енгізіледі. Біз бұған дайын болып, медициналық қызмет көрсету саласының аясын мейлінше кеңейтуіміз қажет»,- деді «Нұр Отан» партиясы Төрағасының бірінші орынбасары.
Өңірдің медицина қызметкерлері Мұхтар Құл-Мұхаммедке Елбасының Қазақстан халқына Жолдауымен мұқият танысып шыққандарын айтып, Мемлекет басшысы белгілеп берген еліміздің даму бағытын толық қолдайтындарын жеткізді.
Асан МЫРЗАХАН,
«Семей таңы»
