Айтпай келген апатқа ұшырап, баспаналары түгелдей отқа оранған Х.Дүйсенов көшесіндегі №57 үй тұрғындарына аудан халқы тарапынан жан-жақты қолдау көрсетілуде. Арнайы комиссия құрылды, төрағасы — аудандық мәслихаттың хатшысы Сейілбек Ысқақов. Жұмысшы тобы да құрылып, тазалау жұмыстары басталып та кетті.
Жайсыз жағдай орын алған соң, аудан әкімі Бақытжан Байахметов қыстың көзі қырауда баспанасыз қалған азаматтарға көмек көрсету мақсатында бірнеше қабылдаулар мен жиындар өткізген еді. Ақпанның 9-ы күні қызмет бабымен Аягөзге келген ҚР Парламенті Мәжілісінің депутаты Нұртай Сабильянов үйсіз қалған тұрғындармен кездесті.
— Қайырымдылық көрсету — әркімнің азаматтық парызы. Мен өз тарапымнан арнайы ашылған есепшотқа қайырымдылық мақсатында 500 мың теңге қаржы аударамын. Үйсіз қалған тұрғындардың баспанасын қалпына келтіру, салу үшін барлық аудан тұрғындары да өз мүмкіндігінше атсалысады деген ойдамын. Қорға жиналған қаржыға қатаң бақылау болсын. Қамкөңіл ағайынды демеу мақсатында жиналған ақшаның ешқандай талан-таражға түспеуін бақылаңыздар. Астанаға барғанда Үкіметке және облыс әкімдігіне өз тарапымнан хат жолдайтын боламын. Әрине, олар да заң талаптарына сәйкес қолдайтын болады. Салынатын үйдің сапалы болуын қадағалап, тұрғындарды алаламай, барлығына бірдей көңіл бөлуді назарда ұстаңыздар. Ешкім де мұндай жағдайды қалаған жоқ. Ең бастысы, адам шығыны жоқ, соған қуанамын. Алаңдамаңыздар, бұл мәселені мен назарымнан тыс қалдырмайтын боламын. Барлықтарыңыз шыдамдылық танытып, береке-бірлікте жұмыс істеңіздер, — деді халық қалаулысы Нұртай Салихұлы.
Тұрғындар да өз тарапынан баспаналары өртенгеннен бастап мүмкіндігінше қолдау танытып, демеу көрсетіп жүрген аудан әкімі Б.Байахметовке, аудандық мәслихат хатшысы С.Ысқақовқа және жұмысшы тобына, сонымен бірге арнайы кездесіп, ашылған есепшотқа алғашқы болып көлемді ақша аударған Нұртай Салихұлына да шексіз алғыстарын айтты.
Осы орайда айта кеткен жөн, бірер күн бұрын Үржар ауданында да осындай қайғылы оқиға орын алып, көп пәтерлі тұрғын үй толығымен жанып кетті. Оған да Нұртай Салихұлы 500 мың теңге ақшалай қолдау көрсеткен екен.
Е.ДАЙЫРБАЕВ,
Аягөз ауданы.
