Облыс әкімі Даниал Ахметов өңірлік Қоғамдық кеңес мүшелерін Шығыс Қазақстан облысының 2016 жылдағы әлеуметтік-экономикалық дамуының қорытындыларымен және 2017 жылы атқарылатын жұмыстардың басты бағыттарымен жан – жақты таныстырды.
Шығыс Қазақстан облыстық Қоғам-дық кеңесінің отырысында өңір басшысы Даниал Ахметовтің есебі тыңдалды. Облыс әкімі Шығыс Қазақстанның өткен жылдағы әлеуметтік-экономикалық дамуының қорытындылары туралы баяндап, Президенттің Қазақстан халқына Жолдауын жүзеге асырудың аясында биыл атқарылатын жұмыстарға тоқталды.
2016 жылы өңірлік жалпы өнім 14%-ға өсіп, 2,6 трлн. теңгеден асқан. Өнеркәсіп өнімінің көлемі 41%-ға өскен. Астықтың мол шығуы мен мал шаруашылығы өнімі өндірісінің өсуі есебінен ауыл шаруашылығының жалпы өнімінің көлемі 11%-ға артқан. Негізгі капиталға инвестиция 6%-ға, құрылыс жұмыстарының көлемі 44%-ға өскен. Мемлекеттік бағдарламаларды орындаудың аясында жаңа 17 мың жұмыс орны ашылған. 340 мың шаршы метр тұрғын үй мен 10 әлеуметтік нысан салынып, қолданысқа берілген.
Қоғамдық кеңестің мүшелері облыс әкімінің есебін талқылап, бір ауыздан бекітті. Сонымен қатар отырыстың аясында сараптамалық жұмыс топтарының жетекшілері сөз алып, экологиялық жағдайды жақсарту, білім және спорт салаларын дамытуға қатысты бірқатар мәселелерді көтерді. Ең өзекті мәселелерді облыс әкімі бақылауына алатындығын жеткізді.
— Қоғамдық кеңестің бірқатар маңызды сұрақтарға қатысты өз ұстанымының болуы қуантады. Күрделі мәселелерді көтеріп, оларды шешу мақсатында көптеген сараптамалық топтар құрғандарыңыз үшін алғыс білдіремін,- деді аймақ басшысы Даниал Ахметов.
ШҚО әкімінің баспасөз қызметі.
