15 ақпан күні Семейде, Кеңес әскерлерінің Ауған жерінен шығарылғанына 28 жыл толуына орай, интернационалист жауынгерлерге арналған ескерткішке гүл шоқтары қойылды. Салтанатты шараға Ауған соғысының ардагерлері, Семей қалалық ардагерлер кеңесінің өкілдері, «Шығыс» өңірлік қолбасшылығының басшылығы мен жауынгерлері және қала тұрғындары қатысты. Ең алдымен саябаққа жиналған қауым Ауған соғысында қаза тапқан жауынгерлердің рухына бас иіп, оларды бір минут үнсіздікпен еске алды. Кейін Ауған соғысының ардагерлері бастаған қауым интернационалист жауынгерлерге арналған ескерткішке гүл шоқтарын қойды.
Семей қаласы әкімінің орынбасары Надежда Шарова жиналғандарды атаулы күнмен құттықтай отырып, интернационалист жауынгерлердің ерліктері ешқашан да ұмытылмайтынын айтты.
— Құрметті жерлестер, Ауған соғысының ардагерлері. Арада 28 жыл өтсе де, Ауған жерінде орын алған соғыстың қайғысы елдің санасынан өшкен жоқ. Ерлікті құрметтеу, батырлықты дәріптеу, боздақтар рухын еске алу — азаматтық міндетіміз. Семей жерінен мыңнан астам жауынгер аттанып, Ауған соғысына қатысты. 10 жылға созылған сол бір мағынасыз соғыста талай боздақтарымыздан айырылдық. Бірақ олардың ерліктері ешқашан да ұмытылмайды. Біз қыршын кеткен жауынгерлеріміздің ата-аналары алдында басымызды иеміз. Интернационалист жауынгерлер өздеріне жүктелген міндеттерді абыроймен орындады. Олардың ерліктері ешқашан ұмытылмақ емес,- деді Н.Шарова.
Бұдан кейін ҚР Қарулы Күштерінің ардагері, генерал-майор Александр Мартынов сөз алып, майдан даласында қаза тапқан жауынгерлердің ата-аналары мен ардагерлерге алғысын жеткізді.
— Құрметті жерлестер, Ауған жерінде жауынгерлеріміз өздерінің әскери міндеттерін абыроймен орындады. Олардың ерліктерін халқымыз ешқашан ұмытпақ емес. Бүгінгі күні жауынгерлердің ата-аналарының, тіпті Ауған соғысына қатысқан жауынгерлердің де қатары арамызда сиреп барады. Алайда жыл сайын өткізілетін осы бір еске алу шарасына қатысушылар саны артуда. Ал бұл — жауынгерлердің ерлігін ұлықтау, оларға құрмет көрсетудің белгісі, сондай-ақ Отанға деген сүйіспеншілікті білдірсе керек,- деді генерал – майор А.Мартынов.
Бұдан кейін қалалық Ауған соғысы ардагерлері кеңесінің төрағасы Боранбай Бегатов жиналғандарды осы атаулы күнмен құттықтап, ел Тәуелсіздігі мен бейбітшіліктің баянды болуын тіледі.
Жиын соңында Семей қаласындағы дарынды балаларға арналған Ш.Уәлиханов атындағы «Жас Ұлан» арнайы ерлер мектеп-лицей-интернатының курсанттары салтанатты түрде ардагерлер алдынан сап түзеп өтті.
Айта кетейік, осыдан дәл 28 жыл бұрын, 1989 жылы 15-ші ақпан күні, Кеңес әскерлері Ауғанстан жерінен біржола шығарылған болатын. Соғыс 1979 жылдың желтоқсан айынан 1989 жылдың 15-ші ақпанына дейін созылды. Оған Қазақстаннан 22 269 жауынгер қатысты. 924 жауынгер қаза тауып, 1015 жауынгер елге мүгедек болып оралды. Семейден 1185 жауынгер аттанып, оның 47-сі қаза тапқан. Ал 2 жауынгер із-түзсіз жоғалды. Ауған соғысына қатысқан жауынгерлердің ерлігі қашанда елге мұра, ұрпаққа ұран болары сөзсіз.
Асан МЫРЗАХАН, «Семей таңы»
