Семейде жолаушылар тасымалымен айналысатын монополистер қоғамдық көліктерде жол жүру ақысын 60 теңгеден 80 теңгеге дейін көтеруді сұрап отыр. Тасымалдаушылар бұл мәселе бойынша облыс әкімі Д.Ахметовке, Шығыс Қазақстан облысы ҰҚКД бастығы Б.Валениязов пен Шығыс Қазақстан облысының прокуроры Б.Тайымбетовке арнайы хат жолдаған екен.
Олардың пайымынша, мұндай қадамға олар мәжбүрліктен барып отырған көрінеді. Өйткені қазір жол ақысынан түскен табыс шығынның орнын жабуға ғана жетеді екен. Тасымалдаушылар сондай-ақ тарифтің өсуін республиканың басқа қалаларымен салыстырады. Тіпті облыс орталығы Өскеменде жол жүру құны көтерілгенін мысалға келтірген. Мұнымен қоймай, жолаушы тасымалымен айналысатын мекемелер өз талаптары орындалмаған жағдайда, қоғамдық көліктің жүру уақытын шектейтіндерін де айтыпты.
Осыған орай өткен сейсенбі, 14 ақпан күні қалалық әкімдікте арнайы жиын өтті. Басқосуға Семей қаласының әкімі Ермак Сәлімов, қала прокуроры Марат Турубаев, қалалық мәслихат депутаттары, Қоғамдық кеңес пен қалалық ардагерлер кеңесінің өкілдері қатысты. Аталған кездесуге сондай–ақ жолаушы тасымалдаушы мекемелердің басшылары да келді.
Жиында алғаш болып сөз алған қаламыздың жолаушы тасымалымен айналысатын мекеме өкілдері мен жетекшілері жиналғандардың алдында өздері ұсынған тарифке жергілікті биліктің келісімін сұрады. Алайда тасымалдаушылар бағаның көтерілуіне негіз болатын ешқандай құжаттарын көрсете алмады.
— Ешкім де сіздерге жол ақысын көтеруге қарсылық танытып отырған жоқ. Жол ақысын 80 теңгеге дейін көтеруге болады. Есептеріңізді көрсетіңіздер, сонда ғана мәселе шешімін табады,- деді жолаушылар көлігі және автомобиль жолдары бөлімінің басшысы Юрий Пазына.
«Семдортехника» ЖШС директоры Геннадий Пьянов жол ақысын көтеру керектігін айтады. Алайда тасымалдаушылардың шыққан шығынды көрсетуге ешқандай мүмкіндіктері жоқ екен.
Осы орайда қала әкімі Ермак Сәлімов, аталған жұмыстарды тасымалдаушылар орындай алмаса, қаламызға шақыртылған арнайы мамандар анықтайтынын, сонда барып жолаушылардың нақты саны анықталатынын жеткізді. Осыдан кейін арнайы құрылған жұмыс тобы бұл ұсыныстың қаншалықты негізді болатынын анықтамақ.
Айта кетейік, семейлік тасымалдаушылар шаһарда 2013 жылғы қаңтардан бері қолданысқа енген тариф бүгінгі күнге дейін өзгермей отырғанын айтып, жоғарыда атап өткеніміздей, өз талаптарын да қойыпты. «Егер Семей қаласындағы жолаушылар тасымалы бойынша тариф мәселесі жақын арада шешімін таппаса, тасымалдаушылар 2017 жылғы 20 ақпаннан бастап жолаушылар тасымалының қысқарған режіміне – сағат 19.00-ге дейінгі жұмыс күніне көшуге мәжбүр болады»,- деген екен арнайы жазған хаттарында.
Ал атқарушы билік жол жүру құнының Қазақстан Республикасы Көлік және коммуникация министрінің қызмет көрсетуге тарифтердің арнайы есептеу әдістемесіне сәйкес белгіленетінін, осыған орай тасымалдаушылардың растаушы құжаттары болуы керектігін, кейін тасымалдау тарифтерін қалыптастырудың экономикалық-математикалық моделіне сәйкес белгіленетінін айтады.
Тасымалдаушылар, жоғарыда атап өткеніміздей, бұған дейін де жол ақысын көтеруді ұсынып келеді. Айталық, өткен жылы «Таксомоторный парк» ЖШС мен «Семдортехника-2» ЖШС қоғамдық көлікте жол жүруге тарифті 80 теңгеге жоғарылату туралы өтініш білдірген. Тасымалдаушылар ұсынған есептер бойынша, бір жолаушының жол жүру құны 92-127 теңгені, орта есеппен 110 теңгені құрайды екен. Алайда ол кезде де атқарушы билік тасымалдаушылармен кеңес өткізіп, есептерді растайтын құжаттарды сұраған. Дегенмен онда да қажетті құжаттар ұсынылмапты.
Жиынды қорытындылаған қала прокуроры Марат Турубаев та барлық мәселенің заң аясында шешілуі керектігін, тасымалдаушылардың көбі өздерінің кірісі мен шығыстарын растай алмай отырғанын атап өтті.
— Келісімшартқа отырғаннан кейін, сіздердің қоғамдық көлік санын қысқартуға, уақытты шектеуге құқыларыңыз жоқ. Егер олай істейтін болсаңыздар, жауапкершілікті алуға дайын болыңыздар. Мәселені дау-жанжалмен немесе бопсалаумен емес, заң аясында шешу керек. Мен түсінемін, сіздерге шығындарыңызды жауып, табыс табу керек, алайда ол қарапайым халықтың есебінен шешілмеуі керек,- деп қорытты өз сөзін Марат Турубаев.
Асан МЫРЗАХАН, «Семей таңы»
