21 ақпан күні Семей қалалық мәслихатының кезектен тыс он бірінші сессиясы өтті. Сессия жұмысына ҚР Ұлттық ұланы Бас қолбасшысының орынбасары генерал-майор Мұхамедқали Сатов, қала әкімі Ермак Сәлімов, қалалық прокуратура өкілдері, Қоғамдық кеңес мүшелері, қала әкімінің орынбасарлары, қалалық әкімдіктің дербес салалық бөлім басшылары мен БАҚ өкілдері қатысты.
Сессия жұмысы басталмас бұрын, жиынға арнайы қатысқан Мұхамедқали Сатов бүгінгі Қазақстанның дамуы, Мемлекет басшысының салиқалы саясаты жайында пікір білдірді.
— Мемлекет басшысының көреген саясатының арқасында дамудың даңғыл жолына түстік. «Қазақстан-2050» Страгегиялық бағдарламасын кешенді түрде жүзеге асырып жатырмыз. Бұл тұрғыда семейліктердің де еңбегі еселі,- деді Мұхамедқали Құсайынұлы.
Ел дамуына Ертіс жағалауындағы халықтың да сүбелі үлес қосып отырғандығын айтқан Мұхамедқали Сатов жергілікті Ұлттық ұлан әскеріне қолдау танытып, бірлесе жұмыс атқарғаны үшін, қала әкімі Ермак Сәлімовке, қала әкімінің орынбасары Николай Ушаковқа ҚР Ұлттық ұлан Бас қолбасшысының бұйрығымен «Қазақстан Республикасы құқық қорғау әскеріне 25 жыл» төсбелгісін табыс етті. Содан кейін жуырда Семей қаласының сәулет және қала құрылысы бөлімі басшысы болып тағайындалған Бақтияр Сәлімовті халық қалаулыларына таныстырды.
Сессия жұмысында екі мәселе қаралды.
Семей қаласы мәслихатының 2016 жылғы 21 желтоқсандағы «Семей қаласының 2017-2019 жылдарға арналған бюджеті туралы» шешіміне өзгеріс енгізу жайлы экономика және бюджеттік жоспарлау бөлімінің басшысы Гүлжан Алтынбекова баяндама жасады.
2017 жылғы қаңтардағы жағдай бойынша, қала бюджетінің көлемі кәсіпкерліктің кең қанат жаюының арқасында 370 млн. 572 мың теңгеге артқандығын атап өткен Гүлжан Қайырханқызы дербес салалар бойынша бюджетке енгізілетін өзгерістерге тоқталды.
Экономика және бюджеттік жоспарлау бөлімі басшысының мәліметіне сүйенсек, Мелькомбинат алаңындағы тұрғын үйдің инженерлік желілер құрылысына, Қарағайлы ауданына жоғары вольтты желі тартуға, қала көшелерін жарықтандыруға, №1 ЖЭО-ны қайта жаңғыртуға, Восход кентіне су құбырларын тартуға, қала көшелеріне дренажды суағарлар жүргізуге қаржы қарастырылған.
Сонымен қоса Гүлжан Алтынбекова қала көшелерін қардан тазарту мақсатында 89 миллион теңге қаржы бөлінетіндігін атап өтті. Сессияға қатысқан халық қалаулылары бюджетке енгізілген өзгерістерді бір аузыдан қолдады.
Сондай-ақ сессия отырысында Семей қаласының сәулет-қала құрылысы кеңесінің дербес құрамы бекітілді.
Әйгерім СӘРСЕНҒАЛИ, «Семей таңы»
