Айдынды Алакөлде демалыс аумағын абаттандырып, туризмді дамыту бүгінде басты назарға алынған. ШҚО әкімі Даниал Ахметов 22 ақпан күнгі халық алдындағы есептік кездесуінде Алакөлдің жағалауында туризмді дамытуды ерекше бақылауға алатынына тағы да тоқталып өтті. Есептік жиында аймақ басшысы демалыс аумағына өзінің екі мәрте барғанын, арнайы құрылған жұмыс тобы санитарлық, өртке қарсы қауіпсіздік талаптарын бұзу фактілерін көптеп анықтағанын атап өтті. Сонымен қатар Даниал Кенжетайұлы тексерістің қорытындылары бойынша атқарушы орган әр кәсіпкермен анықталған кемшіліктерді келесі демалыс маусымы басталғанға дейін жою туралы меморандум бекіткенін айтты. Аймақ басшысы өз сөзінде кәсіпкерлер, қызметтерін заң талаптарына сәйкестендірумен қатар, иеліктеріндегі нысандарды абаттандырып, демалушыларға қолайлы жағдай жасауға тиіс екендігін баса айтты.
Аталған мәселе бірқатар бұқаралық ақпарат құралдарында жарияланып, әлеуметтік желілерде Шығыс Қазақстан облысының әкімі Даниал Ахметовтің Алакөлдің маңында орналасқан көптеген демалыс базаларына жаңа маусымда келушілерді қабылдауға тыйым салғаны туралы хабарланды. Ал ШҚО туризм басқармасы мен ШҚО әкімінің баспасөз қызметінің түсіндіруінше, кәсіпкерлердің жұмысын тоқтатып, ешкімге де көлге баруға шектеу қойылмаған. Оның үстіне шипажайда демалу мерзімі маусым айының ортасынан басталады. Мәселе демалыс аймағындағы нысан иелері мен жергілікті атқарушы билік өкілдерінің ортақ меморандумға келуіне қатысты болып отыр. Меморандумға сәйкес, кәсіпкерлер құжаттарын, санитарлық талаптарды белгілі бір мерзімде ретке келтіріп, демалушыларға жағдай жасаулары қажет.
Аталған заң бұзушылықтар 2016 жылы демалушылардан түскен шағымдар негізінде анықталған. Ортақ келісімге сай, кемшіліктер алдағы маусымға дейін жойылған жағдайда, кәсіпкерлерге шектеу қойылмайды.
Осы ретте біз Үржар ауданы әкімінің орынбасары Құсайын Сейітқановқа жолығып, мәселенің мәнісін түсіндіруін сұраған едік. Құсайын Бейсенұлының айтуынша, жағалаудағы кәсіпкерлік нысандардың санитарлық, өрт қауіпсіздігі және құрылыс жұмыстарының талаптарына сай болуы және кәсіпкерлік нысандардың маңайын заман талабына сай абаттандыру шараларын жүргізу туралы жеке кәсіпкерлермен кездесу жиындар өткізіліп, түсіндірме жұмыстары жүргізілген.
— ҚР заңнамасына сәйкес, әр кәсіпкерлік нысанның талапқа сай құжатының болуы, санитарлық және өрт қауіпсіздігі талаптарын сақтауы, абаттандыру, көгалдандыру жұмыстарын жүргізуге қатысты 160 кәсіпкерлік нысан иелерімен меморандумға қол қойылды. Меморандум шарттарына сәйкес, жеке кәсіпкерлер жазғы маусымның ашылуына дейін жоғарыда аталған талаптарды орындауға келісімдерін берді,- дейді Құсайын Сейітқанов.
— Азаматтардың демалыс орындарын да абаттандыруды жалғастыратын боламыз. Сондықтан да Алакөл мен Сібені абаттандыруға 700 млн. теңге бөлінді. Сіздер алдағы уақытта жүргізілген жұмыстардың куәсі боласыздар. Жұмыстар тиісті деңгейде атқарылады деп ойлаймын. Алакөл көлін абаттандыруға тек биылғы жылы 550 млн. теңге бөлінеді. Жағдай жасайтын уақыт жетті. Сәйкесінше, кәсіпкерлер де талапқа сай жұмыс істеуге тиіс,- деп атап өткен болатын облыс әкімі Даниал Ахметов есептік кездесу барысында.
Асан МЫРЗАХАН,
Бауыржан ЖАҚЫП,
«Семей таңы»
