Тарбағатай ауданының әкімі Ділдабек Оразбаев көктемнің алғашқы айының мерейлі мерекесі 8 Наурыз — Халықаралық әйелдер күні мейрамына байланысты Ақжар және Ақсуат ауылдарында салтанатты жиын өткізді. Аудан басшысы мерекелік жиында еліміздің егемендік алғаннан бергі жылдары жеткен жетістіктеріне отбасындағы алтын құрсақты аналардың, қыз-келіншектердің қосқан еңбек үлесі өлшеусіз мол екенін айтты.
Ел демографиясының дамуына елеулі үлес қосқан аналарға «Батыр ана», «Алтын алқа» және «Күміс алқа» төсбелгілері тапсырылып, құрмет көрсетілді. Аудан әкімі қазіргі уақытта болашақ ұрпақ тәрбиесіне үлкен жауапкершілікпен қарап, аянбай еңбек етіп, отбасының ұйытқысы болған аналардың есімдірін атап, олар қандай құрметке болсын лайық екенін айтты.
— Әйелдер қауымының қоғамда алатын орны ерекше. Бұл біздің халқымыздың ананы ардақтайтын және аялайтын, қыздар мен қарындастарын айрықша құрметтейтін бұрыннан келе жатқан дәстүрі. Әйел — ошағымыздың ұйытқысы, Отанымыздың сақтаушысы, береке-бірлігіміздің алтын діңгегі, ұлттық мәдениетіміздің мәйегі,- деді аудан әкімі өз құттықтауында.
Бүгінде қай салада болмасын әйелдердің рөлі артып келеді. Себебі әйелдер мәселесінің гендерлік саясатпен үндесуі демократиялық дамудың ең басты алғышарттарының бірі екендігі басты назарда. Әйелдер саясатта немесе бизнесте болсын, экономиканың барлық секторында, шаруашылықтың әртүрлі салаларында ер-азаматтармен қатар еңбекке белсене араласып өздерінің біліктіліктері мен іскерліктерін танытып келеді. Бүгінде ауданда екі ауылдық округтің әкімі әйел болса, аудандық мәслихаттың 3 депутаты — әйел адам. Бізде 50 мектеп болса, соның 22-сінің директоры — әйел адамдар. Сонымен қатар 6 ірі мекеме, бірқатар кәсіпорындарды әйелдер басқарып отыр.
Ауданда, 8 Наурыз — Халықаралық әйелдер күніне байланысты, жыл сайын 259 «Батыр ана», 523 «Алтын алқа» иегерлеріне, 917 «Күміс алқа» иегерлеріне, 336 «Ана даңқы» иегерлеріне төрт бала және одан да көп баласы бар 1002 анаға — жиыны 2973 анаға аудандық жұмыспен қамту және әлеуметтік бағдарламалар бөлімі арқылы 28 млн. теңге көлемінде бір жолғы материалдық көмек беріліп отыр.
— Қымбатты аналар, апа-қарындастар! Елбасы Н.Ә.Назарбаевтың: «Әйел – өмір тірегі ғана емес, әйел – өмірдің өзі»,- деп атап өтуі біздің қоғамдағы әйел-аналардың орнының биіктігін көрсетеді. Қазіргі кезде қоғамның кез келген саласын әйелдерсіз елестету мүмкін емес. Сіздер адал жар, қамқор ана, сенімді дос қана емес, сонымен бірге жақсы басшы, білікті маман, іскер ұйымдастырушы болып, заман талабына сай қызмет атқарып жүрсіздер. Бүгін біз сіздерге шын жүректен шыққан лебізімізді, ыстық ықыласымызды арнаймыз. Айтар әніміз де, сыйлар гүліміз де, шұғылалы тілегіміз де сіздерге арналады,-деді Ділдабек Оразбаев.
Хамза СӘТИЕВ, «Семей таңы»
