Көктемнің алғашқы шұғылалы күндерімен қатар келетін 8 Наурыз — Халықаралық әйелдер мерекесіне орай, аудан әкімі Нұрлан Сыдықов нәзік жандыларға құрмет көрсетті. Бұл мереке биыл да жоғары дәрежеде өтті. Мерекелік шараға өңірдегі батыр аналар, еселі еңбегімен елге таныған жандар, іскер әйелдер қатысты.
Мәні мен мағынасы терең айтулы күнге орайластырылған мерекелік шарада ең алдымен еселі еңбегімен танылған түрлі сала иелеріне аудан әкімінің алғыс хаттары табысталды.
Құрметке ие болғандардың қатарында «Айсұлу» сауда кешенінің директоры Майра Ибиятова, Шалабай ауылдық округінің әкімі Жанар Есембаева, аудандық экономика және бюджеттік жоспарлау бөлімі басшысының орынбасары Сәния Уахитова, Жаңғызтөбе кенті әкімі аппаратының бас маманы Гүлсім Бисатова Құрмет грамоталарымен марапатталды. Ал аудан әкімінің алғыс хаттарына түрлі саладағы нағыз еңбек адамдары — өз істерімен ерекшеленген нәзік жандылар ие болды. Олардың ішінде өмірге деген құлшынысымен көпке үлгі болып келе жатқан қол күресінен мүмкіндігі шектеулі жандар арасында өткен республикалық жарыстың жеңімпазы Зарина Примак та бар.
Құттықтау сөзімен жиынды ашқан аудан әкімі Нұрлан Сыдықов киелі өңірдің өткен тарихына көз жүгіртіп, ондағы әйелдер қауымының еселі еңбектерін еске түсірді.
— Тарихқа зер салсақ, қазақ әйелі — тек қана ошақ басының иесі емес, бүкіл өмірін ұрпағын сақтауға арнаған, ерліктің үлгісін көрсеткен жан. Қолдарына найза ұстаған аруларымыз ерлермен тізе қосып жауға шапқан, бірі би, бірі шешен, бірі ел басқарған көсем болған. Зере сынды асыл аналар терең ақыл-парасатымен тұтастай бір қауымға қамқор, кеңесші, ел анасы бола білген. Зере әжеге туған өлкесінің бел ортасынан ескерткіш орнатылуын бүкіл ұлт аналарына деген құрметіміз деп білеміз. Жарма жерінде әйелдер арасынан шыққан танымал тұлғалар аз емес. Әйелдер қауымы қандай қызмет атқарса да ел игілігі мен отбасының қамын ұштастыра отырып, үлкен жауапкершілік пен сенімділіктің, жоғары кәсібиліктің үлгісін көрсетеді,- деді аудан әкімі өз сөзінде.
Мерекелік салтанатта Сұлусары ауылының тумасы, еркін күрестен Қазақстанның бірнеше дүркін жеңімпазы, қазіргі уақытта еркін күрестен еліміздің бас бапкері Алтай Танабаевтың анасы, бүгінде Алматы қаласында тұратын Гүлбаршын Танабаева, Шар локомотив депосының директоры, 2010 жылғы «Қамқор Менеджмент» ЖШС үздік басшысы атанған көптеген марапат иегері Жұмабек Бесенбаевтың анасы Нұркаш Бейсенова Жарманың «Асыл ана» төсбелгісінің иегерлері атанды. Сонымен қатар Шар қаласының тұрғыны Индира Иманғалиева, Әсел Омарова және Қапанбұлақ ауылының тұрғыны Балшекер Баймұханбетова «Күміс алқа» төсбелгісімен марапатталды. Ұлағатты ұстаз, өз ісімен көпке үлгі бола білген аудандық білім және ғылым қызметкерлері кәсіподағының төрайымы Рәзия Серсенбаеваға Жарма ауданының Құрметті азаматы атағы берілді.
Мейірхан ОСПАНБАЕВ, «Семей таңы»
