Әйел отбасының береке-бірлігін ғана ойламайды, ол — ел өміріне және саяси мәселелерге белсене араласатын қоғам мүшесі. Сондықтан біздің елімізде әйел адамның әлеуметтік қорғалуына, олардың өмір сүру деңгейін арттыруға ерекше маңыз беріледі.
Осы орайда Үржар ауданы әкімдігінде ішкі саясат бөлімі мен мәдениет және тілдерді дамыту бөлімінің ұйымдастыруымен бар тіршіліктің тұтқасын ұстап тұрған аналар мен мейірімді әжелердің, әдемі арулардың мерекесі 8 Наурыз – Халықаралық әйелдер күні аталып өтілді. Салтанатты шараға ауданның зиялы қауым өкілдері, әр ауылдық округтерден Елбасы Жолдауын тұрғындарға насихаттап, жүзеге асыруда және ауданның әлеуметтік-экономикалық дамуына, рухани өсіп-өркендеуіне, өңірдегі береке-бірліктің сақталуына өлшеусіз үлес қосып келе жатқан азаматшалар шақырылды.
Жылдың ең көрікті де қуанышты мезгілі көктемнің алғашқы мерекесіне арналған салтанатты жиында алғашқы құттықтау сөз Үржар ауданы әкімінің орынбасары Құсайын Сейітқановқа берілді. Әкім орынбасары барша әйелдер қауымына асыл армандарының орындалуын, отбасы бақыты мен берекелерінің сарқылмауын, денсаулықтарының мықты болуын тіледі. Ауданда 1906 «Алтын алқа», 919 «Күміс алқа» иегерлерінің болуы үлкен қуаныш және мәртебе екендігін айтып өтіп, Барқытбел баурайындағы Үржар ауданының дамуы мен өркендеуіне үлес қосып келе жатқан нәзік жандылардың есімдерін атады.
Салтанатты шара барысында бірқатар азаматшалар аудан әкімінің алғыс хаттарымен марапатталса, әр ауылдық округтегі «Алтын алқа», «Күміс алқа» иегерлеріне, еңбек ардагерлері мен тыл еңбеккерлеріне, жеке кәсіпкерлерге, мемлекеттік қызмет ардагерлеріне, ауылдық әйелдер кеңесінің белсенді мүшелеріне Астана қаласында өтетін Халықаралық «ЭКСПО-2017» көрмесіне жолдама, билеттер мен естелік сыйлықтар тарту етілді.
Мереке аудандық Мәдениет үйі қызметкерлері әзірлеген «Махаббат — мәңгі ертегі» атты ән кешіне ұласты.
Бауыржан ЖАҚЫП,
«Семей таңы»
