Елімізде жаңа жылдан бастап Нәтижелі жұмыспен қамтудың және жаппай кәсіпкерлікті дамытудың 2017 — 2021 жылдарға арналған бағдарламасы қабылданды. «Жұмыспен қамтудың жол картасы — 2020» бағдарламасының орнын басатын аталған жаңа бағдарламаның артықшылығы мол. Бағдарлама аясында еңбек нарығында өз кәсібі бойынша жұмыс таба алмай жүрген азаматтар даярлықтан өтіп, өзге кәсіпті игеруге мүмкіндік алмақ.
Семей қаласы әкімінің орынбасары Надежда Шарова, қалалық жұмыспен қамту және әлеуметтік бағдарламалар бөлімінің басшысы Азамат Құрманғалиев, қаладағы жалпы білім беретін мектептер мен колледж директорлары және үкіметтік емес ұйымдар өкілдерінің қатысуымен Қазақстан Республикасы Президентінің «Қазақстанның Үшінші жаңғыруы: жаһандық бәсекеге қабілеттілік» атты халыққа Жолдауын іске асыру мақсатында Нәтижелі жұмыспен қамтуды және жаппай кәсіпкерлікті дамытудың 2017 – 2021 жылдарға арналған бағдарламасы шеңберінде дөңгелек үстел отырысы өткізілді.
Іс-шара барысында бағдарламаны іске асыру шеңберінде жұмыспен қамтуды қамтамасыз ету мәселелері талқыланды. Сонымен қатар Нәтижелі жұмыспен қамтуды және жаппай кәсіпкерлікті дамытудың 2017 — 2021 жылдарға арналған бағдарламасы, аталған бағдарлама аясында іске асырылып жатқан іс-шаралар жайы сөз болды. Дөңгелек үстелде алғаш болып сөз алған Семей қаласы әкімінің орынбасары Надежда Шарова үстіміздегі жылдан бастап елімізде тұрақты жұмыс орындарын ашуға күш салынатынын, сондай-ақ табысы төмен қазақстандықтарға жеке ісін ашу үшін де мемлекеттік қолдау көрсетілетінін атап өтті.
— Мұндай мүмкіндіктер Нәтижелі жұмыспен қамту және жаппай кәсіпкерлікті дамытудың жаңа мемлекеттік бағдарламасының аясында жүзеге асырылмақ. Елбасы Нұрсұлтан Назарбаевтың тапсырмасы бойынша әзірленген жаңа бағдарламаның басты мақсаты – елімізде нәтижелі жұмыспен қамтуға жағдай жасай отырып, халыққа өз табыстарын арттыруға мүмкіндік беру,- деді қала әкімінің орынбасары.
Азаматтардың кәсіп ашуын жеңілдететін жоба үш бағыттан тұрады. Алғашқысы — бағдарламаға қатысушыларды техникалық және кәсіптік біліммен қамтамасыз ету, екіншісі — жаппай кәсіпкерлікті дамыту мақсатында ауылдар мен қалаларда несие беруді жолға қою, үшіншісі — халықты жұмыспен қамтуға жәрдемдесу.
Аталған жоба табысы төмен ауыл халқының елеулі бөлігіне кәсібін ашуда алғашқы қадамдарын жасауға және өздерінің бизнес-бастамаларын жүзеге асыруға мүмкіндік береді. Жаңа бағдарлама жастардың мамандықты тегін игеруіне де жол ашпақ. Бұрын «Жұмыспен қамтудың жол картасы — 2020» бағдарламасының шеңберінде уақытша жұмыс орындарын құруға басымдық берілген болса, енді оқыту арқылы тұрақты еңбекпен қамтуға ден қойылмақ. Ең бастысы, өз кәсібін ашуға мүмкіндік берілмек.
Бағдарлама аясында азаматтарға бірінші және екінші мамандықты тегін алып шығу мүмкіндігі беріледі. Бұдан өзге ҰБТ тапсыра алмаған мектеп түлегін, оқу орнына түсе алмағандар мен тұрмысы төмен отбасынан шыққан балаларды оқыту көзделген. Оқу ақысына, бір рет тамақтануға қаржы бөлініп, стипендия қарастырылады.
Қазіргі таңда барлығына бірдей жұмыс тауып беру экономикалық тұрғыдан мүмкін емес. Осыған орай тығырықтан шығудың тың жолы ретінде жаппай кәсіпкерлікті дамытуға ден қойылып отыр. Негізгі мақсат — жұмыссыз және өзін-өзі жұмыспен қамтыған азаматтар үшін микрокредиттеуді қолжетімді ету. Бұл оларға өз ісін ашуға немесе кәсібін кеңейтуге, кооперативтер құруға немесе кәсіпкерлікке қажетті инфрақұрылымды жақсартуға мүмкіндік бермек. Сонымен қатар жоба аясында қосымша жұмыс орындары құрылатын болады.
Ауыл тұрғындары үшін несиелер сомасын өтеу мерзімі 5 жылға дейін, мал шаруашылығы саласындағы жобалар және ауыл шаруашылығы кооперативтерін құру үшін 7 жылға дейін және несиенің жылдық мөлшерлемесін 6% деңгейінде сақтай отырып, 16 млн. теңгеге дейін арттыру қарастырылған.
Сонымен қатар мемлекет тарапынан ауылдық елді мекендерде микробизнес ашуды, жұмыс істеп тұрған бизнесті кеңейтуді, кооперативтер құруды жоспарлап отырған өзін-өзі жұмыспен қамтыған және жұмыссыз азаматтар үшін шағын несиелендіруді кепілдендіру қарастырылған.
Дөңгелек үстелдің соңында қатысушылар бағдарламаның нәтижелі болуы әр саланың атқаратын жұмыс сапасына тәуелді екенін айтып, сала мамандарына жемісті еңбек тіледі.
Асан МЫРЗАХАН,
«Семей таңы»
