Өткен аптаның жұмасы күні Болат Тұрлыханов атындағы спорт кешенінде грек-рим күресінен 2002-2004 және 2005-2007 жылдары туған жасөспірімдер арасында Жарма ауданының біріншілігі басталды. Балғын боз кілем шеберлерінің жарысына Жарма ауданына сапарлай келген Жақсылық Үшкемпіров қатысып, жастармен емен – жарқын жүздесу ұйымдастырылды. Қазақтың тұңғыш Олимпиада чемпионы, аты аңыз, есімі мәшһүр спорт саңлағы жеңіске жету жолы турасында сөз қозғап, қызықты оқиғалары жайлы әңгімеледі.
— Бүгінгі байрағын көтеріп отырған жарыстың сендер үшін мәні мен маңызы зор. Бұл жарыс спорт шыңын бағындырудағы негізгі қадамдарың деп білемін. Бейбітшілік пен тұрақтылықтың кепілі болған жасампаз елімізде талаптанған әрбір жасқа жол ашық. Бүгінде халық игілігіне жұмыс істеп тұрған спорт кешені талай спортшылардың томағасын шешеріне сенімім зор. Бұл да еліміздің қол жеткен жетістігі. Дәулет Тұрлыханов тарту еткен бұл орын — сендер үшін таптырмас олжа. Осы орынды игілікке жаратып, спорттың шыңын бағындырып, қазақ елінің туын байрақты бәсекелерде көтерулеріңе тілектеспін,- деді Жақсылық Үшкемпіров.
Боз кілем үстінде әлемге алаш баласын мойындатқан Дәулет Болатұлының ізін қуған өрендердің талабы таудай екендігіне көз жеткізген Жақсылық Үшкемпіров жас спортшылармен жақын тілдесіп, өз ақыл-кеңесімен бөлісті. Бүгінгі таңда Жарма ауданының балалар мен жасөспірімдер спорт мектебінің филиалдары алты бірдей ауылдық, аумақтық бірліктерде табысты жұмыс істеп отыр. Әрбір мектептің намысын арқалаған өрендер боз кілем үстінде барын салып, жеңіске қол жеткізу үшін жинаған тәжірибелерін көрсетті.
Спорт кешенінің жалпы мүмкіндігімен танысқан даңқты спортшы, тиісті материалдық-техникалық базасы қалыптасқан кешенде тәрбие көріп жүрген балғындардың талай биіктерді бағындырарына сенім білдірді.
Мейірхан ОСПАНБАЕВ,
«Семей таңы»
