Ұлыстың Ұлы күні қарсаңында, 14 наурыз күні, Семей қалалық Достық үйінде дәстүрлі «Татар қызы-2017» және «Татар тағамдары» байқаулары өтті. Шараның мақсаты — аталған ұлттың мәдениеті мен дәстүрін жан-жақты таныту.
«Татар» қоғамдық бірлестігінің президиум мүшесі Райхангүл Закирқызы шараны ұйымдастыру арқылы ұрпақ сабақтастығын сақтаймыз дейді.
— Аталған шара биыл сегізінші жыл ұйымдастырылып отыр. Біздің ұлттық киім үлгілеріміз, тағамдарымыз, салт-дәстүріміздің барлығы жастарға берілетін қазынамыз. Мүмкіндікті жіберіп алмас үшін, жасөспірімдерді шақырып, үлкендердің басын қосып, ұрпақ сабақтастығын орнатамыз. Бүгін дастарқан 40-қа жуық тағаммен көмкерілген. Аға буын осындай жүздесулерде жастарға бұл тағамдар қандай мерекеге орай, қалай дайындалатынынан ақпарат бере алады. Сондықтан шараның маңызы зор,- дейді Райхангүл Закирқызы.
Байқауға 9 жастан асқан қыздардан бастап жоғары сынып оқушылары, колледждер мен университет студенттері, жалпы, барлық жастар қатыса алады. Қатысушыларға қойылатын басты талап – ұлттық құндылықтарды ұлықтау. Яғни ұлттық киім үлгісін көрсету, татар тілін және ұлттық өнерін дәріптеу, сондай-ақ тағамдарын дайындау арқылы өз ұлттарына деген сүйіспеншіліктерін білдіру.
Үздік татар қызын анықтауға арналған байқауларға 6 жыл қатарынан қатысып жүрген 16 жасар Елена Балтачева жеңімпаз атану үшін емес, татар мәдениетін жаңғырту үшін сынға түседі екен.
— Байқауға ұзақ жылдар бойы қатысу арқылы мен татар халқының ұлттық құндылықтарын, өнері мен мәдениетін, тілін бұрынғыдан да жақсырақ меңгердім. Сонымен қоса бәліш, чак-чак, кабак бәліші және басқа да татар тағамдарын әзірлеуді үйрендім. Сынға түсудің арқасында осы уақыт аралығында сахна мәдениетін де меңгердім. Татар орталығында ұйымдастырылатын барлық байқаулар мен шаралардың маған берері мол болды. Менің ойымша, әрбір ұлт өкілі өзінің туған тілі мен өнерін, мәдениетін, дәстүрін, құндылықтарын білуі керек және оны көзінің қарашығындай сақтауы керек. Байқауға «Су буйлап» атты халық әнін дайындадым. Соңғы кездері халық әндері ұмыт болып бара жатыр. Бұл әнді орындау арқылы өзге қандастарыма, өзімнен кішілерге мұндай әннің бар екендігін паш етіп, оның атадан балаға мұра болып жалғасуына атсалысқым келеді. «Су буйлап» — әжелеріміздің жастық шағындағы сүйікті әндерінің бірі, ұлттық құндылық. Бұл ән ұмыт болмауы керек,- деді Елена Балтачева.
Ал татар асханасын таныстыратын дастарқанда қырыққа жуық тағам дайындалды.
Тарихына көз жүгірсек, татар асханасы тұзсыз, ашытқымен, май мен сүтке иленген, қышқыл, тәтті қамырлардан пісірілген тоқаштарымен аты шыққан екен. Татарларда игілік пен молшылықтың белгісі ретінде «икмэк» атты нан аталады. Ол нан да ақ дастарқаннан табылды.
Шара соңында «Татар қызы — 2017» анықталып, үздіктер марапатталды. Сондай-ақ татар тағамдары бойынша үздік аруға «Татар асханасының жұлдызы» ауыспалы тәжі табыс етілді. Белсенді аспаздарға дипломдар берілді.
Әйгерім СӘРСЕНҒАЛИ,
«Семей таңы»
