Ұлыстың Ұлы күні – Наурыз мерекесін Семей жұртшылығы да ерекше ықыласпен қарсы алды. Әсіресе қаланың Орталық алаңындағы мерекелік салтанат айрықша сипатта болды. Халықтар бірлігін, табиғат пен адамның жаңаруын білдіретін әз Наурыз шаһардың өзге де алаңдарында мерекеленді. Мерекеге орай қазақ киіз үйлері тігіліп, онда халқымыздың дәстүрі мен ұлттық құндылықтарынан сыр шертетін көріністер мен жабдықтар көпшілік назарына ұсынылды.
Орталық алаңдағы салтанатты мерекені Семей қаласының әкімі Ермак Сәлімов құттықтау сөзімен ашты. Көпшілік алдына шыққан шаһар басшысы барша семейліктер мен қала қонақтарын осынау ұлық мерекемен құттықтап, Наурыз мейрамына ізгі тілегін білдірді.
— Ардақты ағайын, қымбатты жерлестер! Ұлыстың Ұлы күні – Наурыз — жаңару мен жасампаздықтың бастауы. Семей өңірі бұл мерекені, жылдағы дәстүр бойынша, сән – салтанатымен, думанды тойымен, ән-жырымен қарсы алады. Ұлыстың Ұлы күнінде ел бірлігі, ұлттар достығы, қайырымдылық барынша насихатталып, дәстүрге құрмет көрсетілуі тиіс. Биылғы жыл үлкен саяси шараның өтуімен ерекше. Барша қазақстандықтар конституциялық реформаны қолдап, Жолдауға сенім білдірді. Себебі баянды болашақ бүгіннен басталады. Наурыз мерекесі Отанымызда өмір сүріп, еңбек етіп жатқан жұрттың ынтымағын нығайта берсін. Осы бір шуақты күні баршаңызға мықты денсаулық, молшылық тілеймін. Әр отбасында шат көңіл, бақыт, береке салтанат құрсын, — деді қала әкімі Ермак Бидахметұлы.
Құттықтаудан кейін қала басшысы жерлесіміз, халықаралық дәрежедегі спорт шебері, Қазақстанның бірнеше дүркін чемпионы, Алматы қаласында өткен Универсиаданың жеңімпазы, Азия ойындарының төрт дүркін чемпионы Галина Вишневскаяға «ҚР Тәуелсіздігінің 25 жылдығы» мерекелік медалін табыс етті. Көпшілік алдына шыққан семейлік спортшы Ұлыстың Ұлы күнімен қала тұрғындарын және қонақтарын құттықтап, ақ тілегін жеткізді.
Осыдан соң Наурыз мерекесінің салтанатты ашылу рәсімі басталды. Қаланың үздік әртістері, шығармашылық ұжымдарының қатысуымен театрландырылған мерекелік қойылым ұйымдастырылды. Қазақтың этнографиялық тұрмыс-тіршілігінен мол мағлұмат беретін көріністер көпшіліктің көңілінен шықты. Батырлар көшін бастап келген Қызыр баба үлкен-кішіге батасын беріп, Самарқанның көк тасы еріп, көктемнің жылы шуағымен туған жер төсінде әуелеп ұшқан құстар әуені Ұлыстың Ұлы күнін паш етіп, жер-дүниеге бейбітшілік дарытып, құт-береке әкелсін деген тілегін жеткізді. Ал ұлттық киімдер киген мектеп оқушылары, колледждер мен қаламыздағы жоғары оқу орындарының студенттері зор даярлықпен келгендіктерін көрсетті.
Бұл күні ән де әуеледі, күй де күмбірледі. Жергілікті өнерпаз ұжымдар ұлттық және эстрадалық әндер орындап, мерекені тамашалаушы көпшіліктің қошеметіне бөленді.
Баршамызға белгілі, Наурыз «жаңа күн» деген мағынаны білдіреді. Наурыз айында күн мен түн теңеліп, табиғат түрленіп, жасарып, жайнайды. Наурыздың келуімен ел елжірей қуанып, дастарқан жайып, бірін-бірі құшақтап, құттықтайды. Ұлыстың Ұлы күні жаңа күн болғандықтан, көп жаңалық, қуаныш, игілік осы күннен басталуы тиіс. Наурыз тойында ән шырқалып, күй тартылады, жыр айтылады. Сөйтіп, жұрттың көңілі көтеріледі. Ондайда ұжымдасып, ұйымдасып өнер көрсетудің мәні зор. Ұлыстың Ұлы күні әрбір адам, бұрынғы реніш, өкпе-наразылығы болса, бәрін кешіп, бірін-бірі мейман етеді. Сый-сияпат жасалады. Қазақ халқының бірлігін насихаттайтын мерекеде осы дәстүрден семейліктер де жаңылған жоқ. Айта кетер бір жайт, Наурыз мейрамына орай, Орталық алаңда мерекені тамашалауға келген халық жағалай орналасқан қазақ үйлерден наурыз көже, қымыз, палау және басқа да қазақтың ұлттық тағамдарынан дәм татты.
Биылғы жылы Семей қаласы бойынша 40-қа жуық киіз үй тігілген болатын. Сонымен қатар қалалықтар мен қала қонақтарына балаларды атпен серуендету, жастарға арналған көңіл көтеру бағдарламасы, қаланың жетекші әртістері мен шығармашылық ұжымдарының қатысуымен өткен мерекелік концерт, мерекелік сауда ұйымдастырылып, ұлттық тағамдардан дәм тату ұсынылды.
Айта кету керек, осы күні қаланың алаңдарында тігілген киіз үйлердің үздіктерін арнайы құрылған қазылар алқасы анықтаған болатын.Ұлттық үрдістің жарқын үлгісін көрсетіп, жасау-жабдығы, безендірілуі арқылы Наурыздың нақышын бейнелей білген, ұлттық тағамдарды үйлесімді әзірлеп, қонақ күтуде салт-жоралғыларды сақтай білген киіз үйлер қатары көп ұзамай анықталды. Нәтижесінде Орталық алаңда тігілген 19 киіз үйдің ішінен Семей қаласының Шәкәрім атындағы мемлекеттік университетінің киіз үйі бас жүлдеге ие болса, қаланың сол жағалауында тігілген киіз үйлердің арасынан «Цемент зауыты» ЖШС киіз үйі үздік деп танылды. Жүлде иелері «ЭКСПО — 2017» халықаралық көрмесін тамашалауға арналған арнайы билеттермен, бағалы сыйлықтармен және алғыс хаттармен марапатталды.
Осылайша, қаланың әр ауданында, атап айтқанда, Орталық алаңда, Темір жол бекеті ауданында, Цементшілер кенті мен Әуезов алаңында Наурыз думаны айрықша сипатта өрбіді. Семейліктер Ұлыстың Ұлы күнін абыроймен өткізді. Осылайша, Орталық алаңдағы Наурыз думаны түс ауғанша толастаған жоқ. Қуанышты көңіл мен рухани ләззат сыйлаған бұл күнде жиылған қауым жылы лебіздерін бір-бірінен аямады. Ұлыстың Ұлы күнінде жоғары деңгейде өткізілген мерекелік іс-шараларға 20 мыңға жуық қалалық қатысып, ақ пейілмен, көтеріңкі көңіл-күймен қарсы алды.
Асан МЫРЗАХАН, «Семей таңы»
