Сәрсенбі, 29 наурыз күні Семей қалалық білім бөлімінің ұйымдастыруымен Балалар мен жастардың шығармашылық сарайында «ЭКСПО-2017» балалар көзімен» атты қолданыстағы модельдер, роботты техника, компьютерлік технологиядан көрме-сайысы өтті.
Көрме-сайысқа шаһардағы жалпы орта білім беретін мектептердегі, мектептен тыс ұйымдардағы, тұрғылықты жердегі клубтардағы техникалық және сәндік-қолданбалы үйірмелерге қатысатын оқушылардың 40 жекелей және топтық жұмысы қабылданды.
Көрмені ұйымдастыру-шылардың айтуынша, басты мақсат оқушылардың ғылыми-техникалық шығармашылығын дамытуға ықпал ету, балалардың сәндік-қолданбалы шығармашылығын дамыту, шығармашылық әлеуеті бар дарынды балаларды анықтау және жас техниктердің үздік жұмыс тәжірибесін насихаттау болып табылады.
Жас дарындылардың басын қосқан шараның ашылу салтанатында мұндай сайыс дәстүрлі түрде өткізіліп тұратынын айтқан қалалық білім бөлімінің әдіскері Айдар Әбдіхамитов қатысушыларға сәттілік серік болсын деген тілегін жеткізді.
Көрме техникалық шығармашылық, ғылыми-зерттеу жобасы, педагог шығармашылығы сынды бөлімдерден құралған. Әр бөлім бойынша заманауи авиа-, авто-, судомодельдеу макеттері ұсынылды. Жас өнертапқыштар өз жұмыстарында роботты техника, медицина, биотехнология, жанармай және экология, энергетика мен табиғатты тиімді пайдаланудың жолдарын көрсетуге тырысты.
Новобаженова ауылының оқушысы сайысқа өзі ойлап тапқан қайығы мен шар үрлейтін компрессор аппаратын, «Беларусь» тракторын әкеліпті. Техникасының ерекшелігі пультпен басқарылатындығында.
— Қолданыстағы қайықтардың моторлары соңғы бөлігінде орналасса, мен екі бүйіріне орналастырдым. Ал компрессорды тоңазытқыштың моторын пайдалану арқылы ойлап таптық, ол тоқ көзін пайдаланбай жұмыс істей алады, тракторымыз да пультпен басқарылады,- дейді Ибраев мектебінің 8 сынып оқушысы Нұрбол Айтқазин.
Ал Шәкәрім атындағы гимназия оқушыларының ұшқыр қиялдарынан туған туындылар әлдеқайда күрделірек. Сумен әрекет ететін эксковатор, ауа күшімен көтерілетін кран, күн көзімен қозғалатын болашақтың автомобилі, «ЭКСПО қалашық» сынды тоғыз туынды бар.
— Ұлттық нақыштағы «ЭКСПО қалашығын» сайысқа әкеліп отырмыз. Орталықта шар тәрізді нысан, ол шарға барар жолда домбыра, шыға берісінде қазақ үй орналастырылған. Қазақтың үнімен, күйімен әрлеп, қонақтарды көрмеге кіргізсек, одан кейін қонақжайлығымызды киіз үйде көрсетсек деген ойдан туындаған. Домбырадан үн шығады, киіз үйдің есігі ашылып, жабылады. Ал шарымыз әртүрлі түске еніп, шамдары шуақ шашады. Барлығы да робот жасау бағдарламалары арқылы жүзеге асырылды,- дейді Шәкәрім гимназиясының мұғалімдері Айдар Мердемғалиев пен Әлем Мұқанов.
Бұл туындыны ұстаздарының бағыт-бағдар беруімен 16 жасар Санжар Амантаев бір аптада дайындаған екен. Айта кетерлігі, аталмыш қалашық бұл сайысқа дейін облыстық байқауда топ жарыпты.
Көрмеге қойылған экспонаттардың барлығы дерлік өзіндік ерекшелікке ие, табиғатты қорғауға, шикізатты тиімді пайдалануға, қоршаған ортаны ластанудан сақтауға бағытталған. Десе де, жүзден жүйрік озатындығы сынды, 40 туындының ішінен санаулысы ғана суырылып шығатыны белгілі. Жеңімпаздар облыстық кезеңге жолдама алмақ. Ал республикалық кезеңде топ жарған туынды халықаралық көрмеге ұсынылады деп жоспарлануда.
Әйгерім СӘРСЕНҒАЛИ, «Семей таңы»
