29 наурыз, сәрсенбі күні Семей қалалық мәслихатының кезекті он екінші сессиясы өтті. Сессия жұмысына қала әкімі Ермак Сәлімов, қала прокуроры Марат Турубаев, қалалық Қоғамдық кеңестің төрағасы Қайноллан Мусин мен қала әкімінің орынбасарлары, қоғамдық ұйым өкілдері, қалалық әкімдіктің дербес салалық бөлім басшылары мен БАҚ өкілдері қатысты.
Сессия жұмысы басталмас бұрын, жол ақысын көтеруге қатысты ешқандай құжаттардың қалалық мәслихатқа түспегені және бұл мәселенің сессия жұмысының күн тәртібінде қаралмайтыны хабарланды. Одан кейін қалалық мәслихат депутаты Қайрат Мирашев сөз алып, Семей қаласының 300 жылдығына қатысты өз пікірін білдірді. Халық қалаулысының айтуынша, таяуда депутаттардың атына зиялы қауым өкілдерінен хат келіп түскен. Хатта Семейде патша заманындағы қамалдың 1718 жылы салынғаны, ал шаһардың тарихы сонау ІХ ғасырдан басталатыны көрсетіліпті. Халық қалаулысы сондықтан келер жылы Семей қаласының 300 жылдығын тойлап ұятқа қалмай, мәселені барынша елеп-екшеп, бір шешімге келу керектігін айтып, тұшымды пікір білдірді.
— 2018 жылы Семей қаласының 300 жылдығын тойламақшымыз. Айталық, Тараз қаласының 2000 жылдық, Түркістанның 1500 жылдық, ал Алматы шаһарының 1000 жылдық тарихы бар. Сол сияқты Семей шаһарының да тарихы сонау ІХ ғасырдан басталады. Сондықтан біз де көпшілікпен ақылдаса келе, келер жылы Семей қаласының 1000 жылдығы мен Семипалатинск қамалының 300 жылдығын атап өтуіміз керек деп есептеймін,- деді қалалық мәслихат депутаты Қ.Мирашев.
Ал қалалық мәслихат сессиясының күн тәртібінде алты мәселе қаралды. Алдымен Семей қаласының 2016 жылғы қала бюджетінің атқарылуы туралы экономика және бюджеттік жоспарлау бөлімінің басшысы Гүлжан Алтынбекова баяндады. Одан кейінгі өзекті тақырып көктем – қыс мерзіміндегі жолдардың жай – күйі және олардың пайдаланылуы туралы болды. Аталған мәселе бойынша қаланың жолаушылар көлігі және автомобиль жолдары бөлімінің басшысы Юрий Пазынаның есебі тыңдалды. Бөлім басшысы еріген қар суын сору мен инертті материалдарды дайындауға қала бюджетінен 15 млн. теңге мөлшерінде қаржы бөлінгенін, бұл жұмыстармен мердігер «Хазипов» ЖШС айналысатынын жеткізді. Қысқа ақпараттан кейін халық қалаулылары сұрақ-жауапқа көшіп, бөлім басшысына қаладағы көктеммен келген бірқатар проблемаларды кезек-кезек тізіп шықты.
Депутаттардың бірі ескі көпірдегі көлік кептелісін қозғап, оны болдырмау үшін жылдамдықты шектеу керектігін ұсынса, енді бір депутат Интернационал көшесі бойындағы жер үсті өткелінің жайын білгісі келді. Жаяу жүргіншілер өткеліне қатысты жауап берген Ю.Пазына алдағы уақытта құрылысты жүргізетін мердігер анықталып, мәселе осы жылы шешімін табатынына сендірді. Халық қалаулылары сондай-ақ жол жөндеуге қатысты барлық ақпараттың бар екенін, дегенмен, БАҚ өкілдеріне түсінікті болуы үшін, ағымдағы жылы қандай көшелерге жөндеу жұмыстары жүргізілетінін атап өтуді сұрады.
Қаланың жолаушылар көлігі және автомобиль жолдары бөлімінің мәліметіне сүйенер болсақ, қала жолдарының сапасын жақсарту мақсатында 2017 жылғы ағымдағы жөндеу жұмыстарын жүргізуге 200 млн. теңге жоспарланған, ал бұл өткен жылмен салыстырғанда едәуір қомақты көрінеді. Сондықтан жұмыстар да кеңінен атқарылмақ. Ал өткен жылы мүлде жүргізілмеген орташа жөндеу жұмыстары биыл қаланың 8 көшесінде атқарылмақ. Атап айтар болсақ, жақын уақытта Шәкәрім даңғылы, Б.Момышұлы, Интернационал, Абай, Ж.Шайжүнісов, М.Жұмабаев және Шмидт көшелері жаңа келбетке енеді. Ал бұл жұмыстарға 949,2 млн. теңге қарастырылып отыр. «Біз осылайша қаланың орталық бөлігін барынша қамтып отырмыз. Егер бұл жұмыстар сәтімен атқарылатын болса, келер жылы шеткері аумақтарға жөндеу жұмыстарын жүргізбекпіз», — дейді Юрий Пазына.
Сессияда депутаттар қалада көктем келісімен су алатын бірқатар көшелер мен аумақтарды да атап өтті. Айтуларынша, Боровой, Подгорная, Олимпийская көшелері мен Шығыс кентіндегі №12 және №42 мектептердің аумағында еріген қар суынан, мектеп оқушылары тұрмақ, үлкен кісілер үшін қатынас қиындаған. Жыл сайын қайталанатын осы құбылысқа депутаттар назар аударатын кез келгенін баса айтты.
Сонымен қатар мәслихат сессиясында сәулет және қала құрылысы бөлімі басшысының 2016 жылғы орындаған жұмысы жөніндегі есебі, Семей қаласында өрт қауіпсіздігін қамтамасыз ету жөніндегі ақпарат және қалалық мәслихаттың құқықтық мәселелер, депутаттық этика және өкілеттіктер жөніндегі тұрақты комиссиясының есебі талқыланды.
Сессия соңында депутаттар күн тәртібіндегі барлық мәселелер бойынша тиісті шешім шығарды.
Отырыс соңында Семей қаласының әкімі Ермак Сәлімов сөз алып, сессияда көтерілген бірқатар мәселелерге жеке-жеке тоқталды. Келер жылғы мерейтойға қатысты өз пікірін білдірген шаһар басшысы аталған мәселенің шынымен де өзекті екенін, алдағы уақытта оны талқылауға салып, ғалымдармен кеңесу керектігін, ұсыныс – пікірлеріне құлақ асу қажеттігін атап өтті. Ермак Бидахметұлы ескі көпірдегі көлік кептелісі жайын да айналып өткен жоқ. Қала әкімі бүгінгі күні аталған көпірде ғана емес, қаланың басқа жерлерінде де мәселе туындап жататынына тоқталды. Ал ағымдағы жылы қаламыздағы ескі көпірді күрделі жөндеуден өткізу үшін жобалық — сметалық құжаты әзірленеді. Шаһар басшысының айтуынша, бұл – көпірді күрделі жөндеуден өткізу үшін республикалық бюджеттен қаржы алуға мүмкіндік береді. Қала әкімі ескі көпірді жөндеу қажеттілік екенін, бүгінгі күні ол бағытта тиісті жұмыстар атқарылып жатқандығын жеткізді.
Ермак Бидахметұлы жолаушылар тасымалы мәселесіне қатысты да көзқарасын білдірді. Бұл тұрғыда қала басшысы тасымалдаушылардың 24 наурыз күні ғана емес, жалпы, қоғамдық көліктердің желіге шықпауы күнделікті орын алатын жағдай екенін және оның баршаға белгілі екенін айтты.
— Тасымалдаушылармен жол ақысы мәселесі бойынша жұмыс жүргізіп жатқанымызға екі жыл болды. Біз әлі де оларға өз есептерін беруді сұрап отырмыз (жол ақысын көтеруге қатысты есептерді растайтын құжат — авт.). Тарифті көтеру керектігін түсінеміз. Есесіне тасымалдаушылар да қоғамдық көліктердегі мәдениетті сақтап, көліктердің жүйелі қатынасын қамтамасыз етулері керек. Сондықтан да біз бүгінгі күні қосымша келісімшарт әзірлеп жатырмыз. Аталған құжатта жоғарыда айтылғандардың барлығы нақты көрсетілетін болады,- деді Ермак Сәлімов.
Асан МЫРЗАХАН, «Семей таңы»
