Семей қаласының әкімі Ермак Сәлімов Знаменка ауылдық округінде болып, қалаға қарасты ауылдық округтің тұрғындармен кездесті, сондай-ақ өңірдегі көктемгі су тасқынының алдын алу шаралары барысымен танысты.
Знаменка ауылының Семей қаласынан алшақтығы 60 шақырымды құрайды. Ауыл республикалық маңыздағы Семей — Қайнар автокөлік жолының бойына орналасқан.
Республикалық және жергілікті БАҚ өкілдерін ерте барған қала әкімі шаһардан шығаберістегі Қайнар – Курчатов жолының қиылысына аялдады. Көктем мезгіліндегі күннің күрт жылынуы бұл аумаққа да әсер етіпті. Еріген қар суы тас жолдың үстімен ағып, сол маңдағы жол бойы орналасқан қабірлерге қарай жайылып жатыр екен. Оқиға орнынан табылған жауапты сала мамандары қала әкіміне қар суының қабірге қарай аға бастағанына бір-екі сағат қана болғанын, көп кешікпей арнайы техника судың бағытын өзгертетінін баяндады.
Қала басшысы жауапты мамандарға шұғыл түрде істі қолға алып, жағдайды реттеуді тапсырды. Бұдан кейін қала әкімі бастаған топ одан әрідегі Мұқыр өзені арқылы өтетін көпірге келді.
Аталмыш көпір бүгінгі күні апатты жағдайда. Сол себепті көлік қатынасына да шектеу қойылған. Есесіне жүргізушілерге төменнен уақытша айналма жол жасалыпты. Алайда өңір тұрғындары айналма жолдың жағдайына да алаңдаулы. Өйткені қар суы уақытша жолға төселген бір ғана құбырдан өтуде. Ал судың күн санап артып келе жатқанын ескерсек, өткел шыдас бермеуі мүмкін.
Айта кетуіміз керек, аталмыш жол «Қазавтожол» ҰК» АҚ-на қарасты «ДЭУ-25» мекемесінің участогына тиесілі. Жауапкершілік те аталмыш мекемеде. «ДЭУ-25» мекемесінің басшысы Талғат Сұлтановтың айтуынша, уақытша өткелге қосымша құбырлар салынбақ, ал апатты деп танылған көпір арқылы жеңіл көліктерге жүруге рұқсат берілмек. Оның айтуынша, бүгінде апатты көпірді жөндеу үшін жобалық-сметалық құжат әзір, егер қаражат бөлінетін болса, биыл толықтай күрделі жөндеуден өткізілмек. Ал көпір басына келген «ФИК «Алел» АҚ директоры Григорий Яковенко уақытша өткелге қосымша құбыр қойып, іргесін бекітуге көмек көрсететінін жеткізді.
Сондай-ақ қала басшысы Знаменка ауылында болып, тұрғындармен кездесіп, тілдесті. Алдымен Знаменка ауылдық округінің әкімі Әбусана Қарсақбаев көктемгі су тасқынына орай атқарылып жатқан жұмыс барысын баяндады. Ал Ермак Бидахметұлы ауылға келгендегі мақсатына тоқталып, ауыл тұрғындарының сұрақтарына жауап берді. Ауыл тұрғындары, әсіресе жастар тарапынан көтерілген мәселелердің бірі — жұмысқа орналасу жағы. Осы ретте Ермак Бидахметұлы кездесуге өңірдегі ірі кәсіпорындардың бірі «ФИК «Алел» АҚ директоры Григорий Яковенко келіп отырғанын жеткізді. Ал аталмыш кәсіпорын басшысы ауыл тұрғындарына жұмысқа қалай орналасуға болатынын түсіндірді. Кәсіпорын басшысының айтуынша, қазірдің өзінде мекемеде 50-ге жуық ауыл тұрғыны жұмыс атқарып жатқан көрінеді. Ал жастар жағы жұмысқа орналасқылары келсе, арнайы білім алып келулеріне болатынын атап өтті. Кездесу барысында ауыл тұрғындары көтерген бұдан басқа да сауалдарға тұшымды жауаптар қайтарылды. Жиын соңында ауыл тұрғындары Семей қаласының әкімі Ермак Сәлімов пен аталмыш кәсіпорын басшысына алғыстарын жеткізіп, осындай басқосулар жиі өткізіліп тұрса деген тілектерін білдірді.
Асан МЫРЗАХАН, «Семей таңы»
