Ақ бантиктегі сыныптас қыз… Ақ фартук таққан парталас құрбы… Әр адам балалық шағын, сыныптастарын еске алғанда, осы көрініс көз алдына келетін шығар. Балалықтың, тазалықтың бейнесі секілді мектеп формасы… Соңғы кездері әр мектеп өзіндік төсбелгісімен өрнектелген мектеп формасын айқындады. Қандай жарасымды! Алайда сол әсемдіктен гөрі баланың бет-аузын тұмшалап жабатын хиджабқа түседі ата-ананың таңдауы. Олай дейтініміз — хиджап киіп мектеп табалдырығын аттап жатқан бүлдіршіндер бар қоғамымызда. Әрине, бұл дұрыс немесе бұрыс деп шешім айтудан аулақпыз…
Аталған мәселе сәрсенбі күні қалалық әкімдікте қала әкімдігі жанындағы Діни бірлестіктермен байланыс жөніндегі кеңестің отырысында талқыланды.
Кеңес отырысында тақырып төңірегінде баяндама жасаған Семей қаласының білім бөлімі басшысының орынбасары Гүлнар Оразбекованың айтуынша, қаладағы №№48,30 жалпы орта білім беретін мектептерде хиджаб киіп келетін оқушылар бар екен. ҚР Білім және ғылым министрлігі бекіткен мектеп қағидасы, оқушы формасы бар десек те, Қазақстан -зайырлы мемлекет. Яғни, оқушының дәстүрлі емес киімін күштеп шешіп алу немесе киюіне тыйым салу түйткілдің түйінін тарқататын жол емес.
Білім бөлімі мамандарының мәліметіне сәйкес, бұл мәселе аясында жұмыс жүргізіліп жатыр, құқық қорғау органдары, психологтер мен педагогтер қауымы ата-аналармен бірлесе әрекет етуде.
— Облыстық білім басқармасында дәстүрлі емес киім киетін оқушылармен жұмыс жүргізу алгоритмі дайындалған. Алгоритм көз жеткізу, нандыру арқылы жүргізіледі. «Баламен бірнеше рет әңгімелестік, оқушы дәстүрлі емес киімін шешеді» деген түсінік жоқ. Ата-аналарының қарсыласуын да ескерсек, жұмыс жан-жақты, заң талаптарын сақтай отырып жүргізіледі. Нақтылай кетсем, олар жалпы білім беретін мектептер. Ал жалпы білім беретін мектептердің ішкі тәртібіне сай дәстүрлі емес киім киюге тыйым салынған. Сонымен қоса, Ата Заңға сәйкес, біз мектеп жасындағы балаға жалпы орта білім беруге тиістіміз. Сондықтан әкімшілік жазаға тарту немесе тыйым салу арқылы мәселе шешілмейді,- деді қала әкімінің орынбасыры Надежда Шарова.
Кешенді жұмыстардың арқасында 2015-2016 оқу жылында екі қыз бала хиджабтарын шешіп, бастарына ақ бантик таққан. Бірақ осы өзгеріс дәстүрлі емес киім киетін оқушылар қатарын сиретпепті. Себебі жаңа оқу жылында бастарына шыт таққан екі бүлдіршін мектеп табалдырығын аттаған.
Дін — нәзік тақырып. Әр оқушының санасында діни түсінік қалыптастырып, бұл тұрғыда сауаттылықтарын арттыру мақсатында жалпы орта мектептерде дінтану негіздері және зайырлылық факультативі оқытылады.
— Жалпы, 2016 жылдың 1 қыркүйегінен бастап еліміздегі барлық жалпы орта білім бере-тін мектептерде дінтану негіздері пәні енгізілді. Қаладағы мектептердің 9 сыныптарына аталмыш пән қазақ және орыс тілінде факультатив ретінде жүргізіледі. Оған 34 сағат берілген, яғни аптасына 1 рет жүргізіледі. Оқушылардың пәнді қаншалықты меңгергендігі оқу жылының соңында анкеталық сауалнама немесе тест түрінде анықталады,- деді Гүлнар Оразбекова.
Кеңес отырысына қатысушылар баланың дамуында, өмірлік көзқарасының қалыптасуында ата-анасы басты рөл атқаратындықтан, оқушылармен қоса ересектермен де жұмыс істеудің маңыздылығын атап өтті.
Сонымен бірге Кеңес жұмысы аясында Озерки ауылдық округінің әкімі Бақытжан Нұғманов конфессияаралық келісімді сақтау және ҚР «Діни қызмет және діни бірлестіктер жөніндегі» Заңының орындалуына қатысты Озерки ауылдық округі аймағында өткізіліп жатқан жұмыстар жөнінде баяндама жасады.
Әйгерім СӘРСЕНҒАЛИ,
«Семей таңы»
