5 сәуір күні қалалық әкімдікте Мемлекеттік рәміздер және оларды қолдану тәртібі, ұлттық стандарттарға сәйкес келмейтін ҚР-ның Мемлекеттік Туы мен Елтаңбасын жою қағидаларына қатысты жиын өтті. Семей қалалық ішкі саясат бөлімінің басшысы Айдар Садырбаевтың төрағалығымен өткен жиынға Мемлекеттік рәміздерді қолдану тәртібін сақтауға жауапты мемлекеттік мекемелердің мамандары қатысты.
Естеріңізде болса, 2016 жылдың 1 қаңтарынан бастап жаңа Елтаңба енгізілген болатын. Соған қарамастан, ескі үлгідегі Елтаңбаны 2017 жылдың соңына дейін қолдануға рұқсат етілген. Енді 2017 жылдың 1 шілдесіне дейін барлық мемлекеттік мекемелердегі Елтаңба жаңартылуы тиіс.
Рәміздерді дайындау өндірісі стандарттан алшақ болуына байла —
нысты және оның дұрыс дайындалуына бақылау ұйымдас-тырылмағандықтан, бұл мәсенені шешу үшін СТ 989-2008 «Қазақстан Республикасының Мемлекеттiк Елтаңбасы. Нысаны, өлшемдері және техникалық талаптар» ережелерін қайта қарау қолға алынған. Нәтижесінде жаңа Елтаңба қолданысқа енгізілді. Қазақстан Республикасы Инвестициялар және даму министрлігі Техникалық реттеу және метрология комитетінің Шығыс Қазақстан облысы бойынша Семей қалалық бөлімінің бас маманы Мұхтар Елеусізовтің айтуынша, жаңа рәмізде аса көп өзгеріс болмағанымен, ерекшелік бар.
— Мемлекеттік Елтаңба өндірісінің сапасын жақсартуға мүмкіндік беретін өзгерістер енгізілді. Түсіне орай Lab жүйесі енгізілді, ол барлық түстерді бейнелеп түсіндіреді және кең қамтылған түрлі түстерді анықтайтын құрылыммен (спектрофотометрмен) қамтылған. Сонымен қоса элементтердің жаңа үлгілеріне қажетті барлық өлшемдер келтіріліп, 2008 жылғы редакциясында болмаған элемент құрамаларының аттары келтірілген.
Сондай-ақ өнімді пайдалануға 3 жыл кепілдік мерзім беріледі, ол өндірушілердің сапалы өнім дайындауларына жол ашады,- дейді Мұхтар Ержанұлы.
Ескі нұсқа мен жаңа нұсқадағы Елтаңба айырмашылығы түсі арқылы бірден аңғарылады. Жез түс алтын түспен, көк түс аспан түстес ашық көгілдірмен алмастырылған.
Сонымен қоса жиында Ұлттық стандарттарға сәйкес келмейтін Қазақстан Республикасының Мемлекеттік Туын, Мемлекеттік Елтаңбасын ауыстыру және жою қағидалары түсіндірілді. Бекітілген тәртіпке сәйкес, мемлекеттік органдар мен ұйымдардың тұрақты жұмыс істейтін комиссиялары рәміздерді қайта қолдану мүмкіндігін болдырмау мақсатында өртеу, балқыту, 2,5 шаршы сантиметрден аспайтын мөлшерде майдалап бөлшектеу, ұсақтау, қалыпсыз массаға немесе ұнтақ күйге айналдыру жолымен жояды.
Жиын барысында Айдар Садырбаев осы тәртіпті ескере отырып, бұл уақытқа дейін қолданыста болған Елтаңбаны жойып, ағымдағы жылдың 1 шілдесіне дейін Ұлттық стандарттарға сәйкес әзірленген жаңа Елтаңбаны мемлекеттік мекемелерге орнату жағын қолға алуды тапсырды.
Әйгерім ЖАҚЫП,
«Семей таңы»
