Балалар мен жастардың шығармашылық сарайында Радиотехника және байланыс колледжінің ұйымдастыруымен ІТ-марафон өтті. Шараға колледж ұжымы мен студенттері, мектеп оқушылары мен ұстаздары және ата-аналар қатысты. Марафон ұйымдастырудағы мақсат – мектеп оқушыларын техникалық мамандықтарды таңдауға шақыру.
— Басты мақсат – қала мектептеріндегі оқушылар арасынан талантты жастарды анықтау. ІТ – ақпараттық технология — ол болашақтың кілті. Қазақстан экономикасындағы барлық салалар бұл технологиямен ұштасып жатыр. Өмірді ІТ технологиясыз елестету мүмкін емес. Оқушылардың бұл салаға деген қызығушылығын арттырып, ынталандыру үшін марафон ұйымдастырып, жеңімпаздарға бағалы сыйлықтар әзірледік,- дейді Радиотехника және байланыс колледжінің директоры Оралхан Сартаев.
Айта кетерлігі, мұндай марафон өткен жылы тұңғыш рет қолға алынған. Биыл екінші рет ұйымдастырылып отыр. ІТ-марафон барысында Радиотехника және байланыс колледжі арнайы сайт ашыпты. Сайтқа тіркеліп, сауалдарға жауап беру арқылы онлайн режімде №№26, 10, 31, 37, 16 мектептердің оқушылары марафонға қатысып, білімдерін сынауға ниет білдірген. Нәтижесінде бәсекеге қабілетті 11 талапкер ақтық сынға жолдама алды. Олар осы марафонда информатика және бағдарламалауға қатысты сауалдарға жауап беріп, білімдерін таразылады.
Ресей Федерациясының Барнауыл қаласында «AltayScool-CTF» мектеп оқушылары мен колледж студенттері арасында компьютерлік қауіпсіздік тапсырмаларына құрылған халықаралық білім додасы ұйымдастырылған. Оған аталмыш колледждің 4-ші курс студенттері Әлішер Бекенов, Виктор Кох, Евгений Малыга, Артем Титоренко сынды студенттер қатысып, 26 команда арасында Радиотехника және байланыс колледжі командасы 12-ші орынға табан тіреген. Екі студент 1-2- орындарды жеңіп алып, медаль, сертификаттарға ие болыпты. ІТ-марафон барысында колледж директоры халықаралық чемпионатта бірінші орын алған Евгений Малыгаға 50 мың теңгенің, екінші орын алған Виктор Кохқа 25 мың теңгенің сертификатын, ал ата – аналарына алғыс хат табыс етті.
Енді екі жеңімпаз мамыр айының басында Астана қаласында өтетін Қазақстан чемпионатына барып қатысады. Өз білімдерін дәлелдеп, жүлдемен қанжығаларын майласа, Біріккен Араб Әмірліктерінде өтетін байрақты білім бәсекесіне жолдама алмақ. Колледж басшылығының айтуынша, жас байланысшылар алдарына мақсат қойып отыр, бұл жолда біраз белестерді бағындыратындарына сенім зор екен.
Шараны ұйымдастырушылардың айтуынша, колледжің барлық салтанатты жиындары ұзақ жылдар бойы Балалар мен жастардың шығармашылық сарайында өткізіліп келеді екен. Бұл тұрғыда колледж ұжымының Балалар мен жастардың шығармашылық сарайы ұжымына айтар алғысы көп. Сөзіміздің дәлелі ретінде айтсақ, марафон аясында Балалар мен жастардың шығармашылық сарайы директорының орынбасары Татьяна Матычукке «Радиотехника және байланыс колледжіне 75 жыл» мерекелік медалі табыс етілді.
ІТ-марафон қорытындысы бойынша, І орынға ноутбук, ІІ орынға планшет, ІІІ орын иегеріне ұялы телефон тарту етілді. Қонақтар арасында лотерея ойнатылып, сәттілік серігі болған жандар ынталандыру сыйлықтарына ие болды.
Әйгерім СӘРСЕНҒАЛИ,
«Семей таңы»
