Сейсенбі, 18 сәуір күні қалалық әкімдікте баспасөз мәсли-хаты ұйымдастырылды. Өңірдің БАҚ өкілдерінің басын қосқан жиында жол жөндеу, су тасқынының алдын алудағы атқарылған жұмыстар, сенбіліктер ұйымдастыру сынды мәселелер қарастырылып, жылу беру маусымы қорытындыланды.
Баспасөз мәслихатында қала әкімінің орынбасарлары Надежда Шарова, Николай Ушаков, Жолаушылар көлігі және автомобиль жолдары бөлімі басшысының орынбасары Нұрлан Серғазинов, тұрғын үй-коммуналдық шаруашылық бөлімінің басшысы Марат Аленов журналистердің сұрақтарына жауап берді.
Жиында айтылғандай, осы жылы қала жолдарын қалыпқа келтіруге 1 млрд. 200 млн. теңге қаражат жұмсалмақ. Соның ішінде 200 млн. теңге ағымдағы жол жөндеу жұмыстарына, 654 млн. теңге орташа жол жөндеу жұмыстарына бөлінген. Сегіз көшеге орташа, бір көшеге күрделі жөндеу жұмыстары жүргізіледі деп жоспарлануда. Әзірге анықталғаны — Шәкәрім даңғылы, Бауыржан Момышұлы, Қайым Мұхамедханов, Жақия Шайжүнісов, Мағжан Жұмабаев, Міржақып Дулатов, Абай көшелері орташа жөндеуден өтсе, Дальняя көшесін күрделі жөндеу жұмыстары күтіп тұр. Сондай-ақ Мичурин көшесіндегі аяқталмаған күрделі жол жөндеу жұмыстары үшін де бюджетке өтініш берілген. Бұл орташа және күрделі жол жөндеу жұмыстары ауа райы жылынғаннан соң басталмақ.
— Қазір ағымдағы жол жөндеу жұмыстары жүргізіліп жатыр. Орташа жол жөндеу жұмыстарына жақында кірісеміз. Бұл жұмыс бойынша барлық конкурстар аяқталды. «Гордорстрой» ЖШС-мен келісімшартқа отырдық. Облысқа жол жөндеу жұмыстары үшін тағы 400 млн. теңге өтінім берілді. Қолдау табады деп ойлаймын. Орталықта орналасқан көлік қозғалысы көп 8 көшеге орташа жол жөндеу жұмыстары жүргізіледі. Тасымалдаушылармен де сөйлесіп, олардың өтініштерін де ескеріп жатырмыз. Сондықтан жол мәселесі бақылауда. Алдымызда ескі көпірді қалыпқа келтіру туралы өткір мәселе тұр. Халыққа қиындық туғызбас үшін көпірді сенбі, жексенбі күндері ғана жабамыз. Нақты уақытын анықтап, семейліктерге, БАҚ өкілдеріне хабарлаймыз, — дейді қала әкімінің орынбасары Николай Ушаков.
Оның айтуынша, орташа жол жөндеу жұмыстары үшін 3 жыл, күрделі жол жөндеу жұмыстары үшін 5 жыл кепілдік беріледі.
Баспасөз мәслихатында айтылған тағы бір өзекті мәселе көктемгі су тасқынына байланысты болды. Семей қалалық төтенше жағдайлар басқармасы бастығының орынбасары Бақытбек Байбуровтың айтуынша, бүгінгі күні, Красный кордон ауданын, Северный кентін қоспағанда, қаладағы жағдай тұрақты.
— Ертіс өзенінің деңгейінен 320 см-ге көтерілуіне байланысты кей өңірлерде су басу жағдайлары орын алды. Ал шамадан тыс көтерілу деңгейі 420 см-ге дейін жетті,- дейді ол.
Жергілікті атқарушы органдар мен ТЖБ №2 жасағының көмегімен суда қалған үйлердегі суды тарту жұмыстары жүргізілген.
— 26 сәуірге дейін Шүлбі СЭС-да су жіберу жұмыстары жалғаса береді. Бүгінгі күнге дейін жіберілген су көлемі 3000 текше метрді құрайды. Су жіберу әлі де жалғасатындықтан (3500 текше метрге дейін), су деңгейінің көтеріле беретінін хабарлаймын, — деді Б.Байбуров.
Ал ауылдық округтердегі жағдай тұрақты. Тек Семей-Курчатов тас жолындағы 43 шақырымдағы бөлікті су шайып кеткендіктен, ауыр жүк көліктерінің қозғалысы әзірге тоқтатылған.
Жаз маусымында ыстық су беру мәселесі туралы Николай Ушаков:
— Тұрғындар жылу энергиясы үшін қарыздарын қайтармайынша, бұл мәселе шешімін таппайды,- деп жауап қайтарды. Ал 2018 жылы жаңғырту жұмыстары аяқталатын РК-1 жылу орталығында «Шығысэнерготрейдтен» сол және оң жағалауға берілетін электр энергиясы тоқтатылып, сол жағалау тұрғындары ыстық суды №1 ЖЭО-дан алатын болады.
Сәуір айын қоспағанда, тұрғындардың жылуға қарызы 700 млн. теңгені құрап отыр.
Жадыра ТӨЛЕГЕНҚЫЗЫ,
«Семей таңы»
