Жексенбі, 23 сәуір күні Семей қалалық әкімдігінде қала әкімі Ермак Сәлімов және қала прокуроры Марат Турубаев «Восточный Правый» саяжай массиві тұрғындарымен кездесу өткізді. Жиынға сондай-ақ тұрғын үй-коммуналдық шаруашылығы, «Шығысэнерготрейд» ШҚ АЭК мекемесінің өкілдері қатысты.
Саяжай тұрғындарын алаңдатқан мәселе — электр энергиясы. Кейбір тұрғындар «Восточный правый» кооперативін қолдаса, енді бірі кооператив жұмысына наразы. Ал кооператив басшысы Сәуле Қаһарманова болса саяжайдағы жағдайдың тұрақты екенін айтады.
— Электр энергиясы үшін қарызымыз жоқ. Салықты, жер жалдау құнын уақытында төлеп отырмыз. Алдымыздағы жалғыз мақсат – саяжай тұрғындарын қатарға қосу. Алдағы уақытта саяжай тұрғындарының басын қосып, есеп беру – сайлау жиналысын өткіземіз. Оған заң бойынша 70 адам қатысу керек. Бүгінде саяжайда 1200-ге жуық тұрғын бар,- деп атап өтті ол.
Осы кооператив мәселесіне байланысты 27 мамыр күні есеп беру-сайлау жиналысы өтеді. Кооператив туралы барлық мәселелер осы жиналыста өз шешімін таппақ.
Жиын барысында тұрғындар кооператив басшысының жұмысына наразылық білдірді. Кооператив басшысы есеп беру жиналысын өткізбейтінін айтып шағымданды тұрғындар.
«Жарғы бойынша, наурызда есеп беру жиналысы өту керек болған. Әлі өткен жоқ. Өткен жолғы жиналыс хаттамасында менің атымнан басқа адам қол қойған. Бұл заңға қайшы. Біз ақшаны не үшін жинап жатқанымызды да білмейміз. Бізге себебін айтып түсіндірмейді. Сондықтан бізді ШҚ АЭК мекемесіне көшіруіңізді сұраймыз»,- деді тұрғындардың бірі.
Ермак Сәлімов бұл мәселені әкімшіліктің шеше алмайтынын, электр энергиясы мәселелері тікелей ШҚ АЭК мекемесіне қарасты екенін жеткізді. Ал ШҚ АЭК мекемесінің өкілі болса саяжай массивіндегі электр желісі қалыпты жағдайда емес екендігін, сондықтан саяжай массивін өз иеліктеріне ала алмайтындықтарын айтты.
Өз кезегінде саяжай тұрғындары үшін электр құрылғыларын қалыпқа келтіру де біраз шығынды қажет етеді. Сондықтан кейбір тұрғындар бүгінгі электр энергиясын қанағат етіп, тек кооператив басшысын ауыстырса деген ниеттерін білдірді.
Ал қала прокуроры Марат Турубаев тұрғындарды сабырға шақырып, барлығын заң тұрғысынан шешуге кеңес берді:
— Кейбір саяжай тұрғындары прокуратураға келіп, бұл жағдайды бұрын да талқылаған болатын. Желіні жекешелендіру мәселесіне келетін болсақ, кооператив басшысы оны өз атына меншіктеген жоқ, кооператив атына меншіктеді. Егер бұған қарсы болсаңыздар, заңды түрде сотқа арыз беріңіздер. Бұл мәселені тек сот арқылы шешуге болады,- деді қала прокуроры Марат Турубаев.
Жадыра ТӨЛЕГЕНҚЫЗЫ,«Семей таңы»
