Жарты әлемді шарпыған соғыс өртінің мәңгіге сөнгеніне биыл 72 жыл. Адамзат тарихындағы ең сұрапыл, ең қатыгез кезеңді бастан өткерген Кеңес халқы ауызбіршілігінің арқасында жеңіске жетті. Жасанған жауға тойтарыс беріп, елдің ертеңі, балалардың болашағы үшін жан аямай шайқасқандардың қатарында семейліктер де болды. Уақыт өткен сайын қатары сиреген қарт майдангерлерге Жеңіс күні қарсаңында жыл сайын құрмет көрсету ұмыт қалған емес. Биыл да Орталық алаңға жиналған қала тұрғындары бүгінгі бейбітшілікті тарту еткен сол ардагерлерге ерекше қошемет көрсетті.
Орталық алаңда өткен мерекелік салтанатқа Семей қаласының әкімі Ермак Сәлімов, қалалық, облыстық мәслихат депутаттары, түрлі қоғамдық ұйымдар өкілдері, соғыс және тыл ардагерлері қатысты. Бүгінгі таңда Семей өңірі бойынша 50-ден астам соғыс ардагері бар. Жалынды жастығын өртті жылдардың еншісіне қалдырып, соғыстан кейінгі уақытта иіні түскен халықтың еңсесін тіктеуде аянбай еңбек еткен де солар. Ахметкәрім Ахмадиев ақсақал 17 жасында майданға аттанған. Отан алдындағы азаматтық борышын Қиыр шығыста өтеп, жапон басқыншыларына қарсы соғысады. Жеңісті де сол жақта қарсы алған. Алайда, соғыс аяқталғанымен, елге 1950 жылы бірақ қайтқан көрінеді.
— Мен 3 жасымда әке-шешеден бірдей айырылып, жетім қалдым. Ол заманның адамдары кеңпейіл еді ғой. Бір орыстың тәрбиесінде өстім. Майданға аттанбас бұрын алдымен қысқа мерзімді дайындықтан өтіп, әскери бұйрық бойынша жіберген аумақта қызмет еттім. Елге капитан шенінде оралып, ұсақ колхоздарды үлкен совхоздарға біріктіру жұмыстарына қатыстым. Өзім де 25 жасымда бір совхоз директоры болдым. Осы жұмысты зейнетке шыққанымша атқарып, елдің дамуына үлес қостым деп ойлаймын. Ендігі жастарға айтарым — біз сендерге бейбітшілік сыйладық, соның қадірін біліңдер, білімге ұмтылып, еңбектен қашпаңдар. Бақытты болыңдар дегім келеді,- дейді қарт жауынгер.
Орталық алаңға жиналған көпшілік алдында өнер ұжымдары мен студент жастар, мектеп оқушыларының күшімен сахналанған көріністер қойылып, соғыс жылдарына арналған әндер шырқалды. Жеңістің 72 жылдығымен жерлестерімізді құттықтаған шаһар басшысы Ермак Сәлімов бабалардың ерлігін балалар ұмытпайтындығын атап өтті.
— Елдік пен ерліктің, батылдық пен батырлықтың белгісі Жеңіс күні құтты болсын! Бұл күн — халқымыздың мызғымас бірлігінің, қайсар рухының, атамекен, туған жерге деген адалдықтың ұлы мерекесі. Отан соғысы әр шаңыраққа, әр азаматтың жүрегіне қаралы ізін қалдырды. Біз алдыңғы толқын ардагер ағаларымыздың, ұрыс даласында мерт болған батырлардың ерлігіне бас иіп, тағзым етеміз. Баянды болашақ үшін жанын берген боздақтардың ерлігін біздер және болашақ ұрпақ мәңгі ұмытпайды. Ерлік даңқы өшпейді. Таулар алыстаған сайын биіктей түсетіні секілді, ардагер ата-апаларымыздың сол кездегі ерлігі — өскелең ұрпаққа үлгі–өнеге. Тылдағы еңбеккерлердің тынымсыз еңбегін де ешкім жоққа шығара алмайды. Жеңіс күнін жақындатуға олардың да қосқан үлесі зор. Әрқашан ашық аспан, бейбіт өмірде кездесе берейік. Мереке баршамызға құтты болсын!- деді Ермак Бидахметұлы өз сөзінде.
Мерекелік шара алаңға жиналған көпшіліктің «Мәңгілік полк» шеруіне қатысуымен жалғасты. Соңғы бірнеше жылдан бері қаламызда тұрақты түрде өткізіліп келе жатқан шеруді әскери жеңіл көлікке мінген ардагерлер бастап жүрді. Интернационал көшесін бойлай сап түзеген қала тұрғындары ардагер аталарына гүл шоқтарын ұсынып, алғыстарын жаудырды. Осы орайда қала басшысының да «Мәңгілік полк» шеруіне белсене қатысқанын айта кеткеніміз жөн. Әкім акцияға ұрыста ерлікпен қаза тапқан танк көздеушісі, «Ерлігі үшін» медалі мен ІІ дәрежелі ҰОС орденінің иегері, ағасы Рафхат Сәлімовтің есімі жазылған тақтаны алып жүрді.
— «Мәңгілік полк» шеруі — өткенді еске түсіріп, дүниеден өткен ата-апаларымыздың, әке–шешелеріміздің рухына тағзым етуге үндейтін акция. Менің әкем Жұмағали Серікболов қаламыздағы кен–барлау техникумының 3-ші курсында оқып жүргенінде әскерге алынып, Кенигсбергке дейін жеткен. Осы қаланы азат еткені үшін майданнан қос бірдей «Ерлігі үшін» медалін, И.Сталиннің алғыс хатын алып қайтқан. Соғыстан кейінгі бейбіт заманда «Семей таңы» газетінде еңбек еткен. Бүгінде әкеміз ортамыз-да жоқ. Мына шеруге қатысып, әкеміздің фотосын алып жүру маған ерекше сезім сыйлайды. Тіптен әкеміз қасымызда бірге келе жатқан сияқты. Өзім акцияға былтырдан бері қатысып келемін. Әкеміздің фотосуретін көтеріп бір сіңлім дәл осындай шеруге Алматы қаласында қатысып жатса, Ресейде оқитын немересі Мәскеудегі акцияға қатыспақ. Біз әкемізді мақтан тұтамыз, оны ешқашан ұмытпаймыз,- дейді акцияға қатысушы Әлия Қаймолдина.
Жеңіс саябағына жеткен шерушілер Мәңгілік алауға гүл шоқтарын қойып, қыршын кеткен боздақтар мен өмірден озған ардагерлерді бір минут үнсіздікпен еске алды. «Шығыс» өңірлік әскери қолбасшылығына қарасты әскери бөлімдер дала асханасын ұйымдастырып, ардагерлерге сарбаз ботқасынан дәм татқызды. Мерекелік шара қала өнерпаздарының орындауындағы әскери әндермен жалғасын тапты. Ал кешкісін қала тұрғындары Жеңістің 72 жылдығына арналған отшашуды тамашалады.
Ермек ИСАБАЕВ,
«Семей таңы»
