Семей қалалық білім бөлімінің басшысы Наталия Фесенконың қатысуымен баспасөз конференциясы өтіп, оқу жылы қорытындыланды.
— Биылғы жыл білім саласында өзгерістерге толы болды. Елбасы Жолдауында айтып кеткендей, үш тілді білім беруге көшіп жатырмыз. Балаларды оқулықпен жабдықтауға қаражат жеткілікті бөлінді. Келесі оқу жылында 2, 5 және 7 сыныптардың оқулықтары жаңартылады. Ағымдағы жылы 1-2 сыныптардың оқу дәптерлері жеткіліксіз болуына байланысты ата-аналар дәптерлерді өз қаражаттарына сатып алуға мәжбүр болған еді. Келесі жылы бұл олқылықтардың орнын толтыруға тырысамыз. Оқулықтардың жаңаруына байланысты 2, 5 және 7 сыныптардың және бірінші сыныптың мұғалімдері қайта оқу курстарынан өтеді,- дейді білім бөлімінің басшысы Наталия Фесенко.
Қаланың бас мұғалімінің сөзіне қарағанда, ұстаздар үш түрлі оқу курстарынан өтеді. Олар Кембридж бағдарламасының деңгейлік курсы, оқулықтардың жаңаруына байланысты және үштілділік бойынша оқыту курстары.
— Ұстаздарды терең біліммен қаруландыру қажет. Осы бағытта екі жыл қатарынан мұғалімдердің кәсіби деңгейін арттыруға көп көңіл бөлініп жатыр. Барлық оқу курстарынан өткеннен кейін, олар диагностикалық тест тапсырады. Жақында ғана облыс әкімі Даниал Ахметов ұстаздардың қазақ және ағылшын тілдерін нашар меңгергенін атап өткен еді. Бұл тек қаламыздағы ғана емес, облыс, рес-публика деңгейіндегі проблема, — дейді Н.Фесенко.
Оқу жылы барысында «Мәңгілік Ел» бағдарламасы бойынша 25 кабинет ашылған. «Туған жерге тағзым» акциясы аясында мектеп түлектері білім ошақтарына қолдау көрсеткен.
— Осы жылы Өнімді жұмыспен қамту және жаппай кәсіпкерлікті дамыту бағдарламасына қосылдық. Қаламыздағы 7 колледж осы бағдарлама арқылы түлектерді тегін оқытады. Бұл бағдарлама, негізінен, жұмысшы мамандықтарына басымдық береді. Алдымен әлеуметтік жағынан аз қамтылған немесе толық емес отбасылардың балалары осы бағдарламамен қамтылады. Түлектердің тізімін жасадық. Тамызда өтетін арнайы отырыста комиссия мүшелері бұл тізімді анықтайтын болады, — дейді білім бөлімінің басшысы.
Мектепке дейінгі даярлық топтары мен қала мектептері биыл «Дарынды мектеп» бағдарламасына қосылған. №23 орта мектеп оқу ісіндегі жетістіктеріне байланысты облыстық білім басқармасының қаулысымен лицей атағын алған.
Сондай-ақ, жиында айтылғандай, Назарбаев Зияткерлік мектебінің бұрынғы ғимараты экономикалық лицейге беріледі. 240 оқушы білім алатын экономикалық лицей енді оқушыларды 6-7 сыныптан бастап қабылдамақ. Осылайша, оқушылар санын 650-ге жеткізу жоспарланған.
Сонымен қатар биылғы оқу жылында 53 оқушы облыстық, 2 оқушы республикалық олимпиаданың жеңімпазы атанды. Халықаралық ғылыми жобадан жеңімпаз атанған 8 оқушы ҰБТ-дан босатылған. Спортшыларымыз да биылғы жылы құралақан емес. «Озерки» командасы хоккейден облыс жеңімпазы атанып, миллион теңгені қанжығасына байлаған.
— Ата-аналармен қарым-қатынасқа көп көңіл бөліп жатырмыз. Жалпы, Ата-аналар кеңесі құрылды. Тек қана ұйымдастыру ісімен айналысатын ата-аналар белсенділері жұмыс істейді. Жыл бойы олармен жұмыс атқарып, жаңалықтармен бөлістік. Олар да бізге жақсы көмек көрсетті. Жақында ғана Әкелер кеңесінің жиналысын өткіздік. Бұл жиналыс әкелер бала тәрбиесінде белсенді емес деген пікірді жоққа шығарады,- дейді Н.Фесенко.
Оқушылардың жаз мезгілін тиімді ұйымдастыру мақсатында «Радуга» (120 орын), «Жас қанат» (80 орын), «Түрксіб» (320 орын) лагерьлері ұйымдастырылған. Олар 4 ауысымда жұмыс істемекші. Лагерьге 2000-нан астам баланың 466-ы тегін қамтылады. Бір баланың демалыс құны 22 мың теңгені құрап отыр. Лагерьлердің алғашқы жұмысы 15 маусымнан басталмақ. Сондай-ақ қалалық білім бөлімі оқу үлгерімі жақсы, белсенді 150 оқушыға, ал облыстық «Дарын» орталығы 200 оқушыға «ЭКСПО-2017» көрмесіне қатысуға жолдама берген.
Отырыста оқу жылы соңында мектептерді жөндеуден өткізу мәселесі де сөз болды. Наталия Фесенко ата-аналардың қаражат жинауы міндетті емес, алайда демеуші болам деген ата-аналарға қарсылық жоқ екенін атап өтті. Оның айтуынша, мектептер мен оқу кабинеттерін толық жөндеуден өткізу үшін әлі 1 млрд. 200 млн. теңге қаражат қажет.
Жадыра ТӨЛЕГЕНҚЫЗЫ, «Семей таңы»
