Сенбі, 3 маусым күні шаһар басшысы Ермак Сәлімов Комсомол кентінің тұрғындарымен кездесті. Кездесуде жарық, су, тұрғын үй, қоғамдық көлік мәселелері сөз болды.
Кездесуде айтылғандай, Комсомол кентінің негізгі бес көшесі екі аптадан соң электр қуатымен қамтамасыз етіледі. Осыған дейін Дружба, Достық, Жидебай, Ермек, Шөптіқақ көшелеріне инженерлік желілер тартылмаған болатын. Кейбір үй иелері электр қуатын ретсіз қосып алып пайдаланған болса, кейбірі электр қуатына қосылмаған. Осы сұрақтарды шешу мақсатында жобалық-сметалық құжат әзірленіп, «Вула» ЖШС құны 132 млн. теңгені құрайтын құрылыс жұмыстарын жүргізген. Шамалы уақыттан соң кенттің негізгі бес көшесі жарықпен қамтамасыз етіледі, ал қалған көшелерді электр қуатымен қамтамасыз ету келер жылдың еншісіне қалды.
Комсомол кентінің тұрғындарын алаңдатқан тағы бір мәселе бар. Ол — су құбырының тартылмауы. Қала басшысының сөзіне қарағанда, қазір магистралды және кварталішілік желілерді тарту үшін құжаттар әзірленіп жатыр.
Магистралды желілерді тарту 7,5 млн. теңгені, кварталішілік желілерді тарту құны 6,5 млн. теңгені құрап отыр. Магистралды желілерді тарту үшін Алматы қаласының «ҚазСантехпроект» ЖШС-мен, ал квартал іші желілерді тарту үшін Өскемен қаласының «Феррата» ЖШС-мен келісімшартқа қой қойылған. Жоба бойынша, осы мәселе төңірегіндегі құжаттарды әзірлеу қыркүйек айының соңына дейін аяқталуы тиіс.
Комсомол кентіне тұрғын үй салу мәселесі де назарға ілініп отыр. Тұрғын үй салу үшін 930 жер телімі жобаланған. Оның ішінде мемлекеттік актімен әзірленген 328 жер теліміне 197 үй салынған болса, 52 тұрғын үй салынып жатыр. Қалған 602 жер телімі әзірлену барысында.
— Бүгінгі күні қала әкімдігінде жеке тұрғын үй салу үшін жер телімін алуға 23 885 адам кезекте тұр. Соның ішінде Комсомол кенті — болашақта тұрғын үй салу мәселесі жоспарланған аудандардың бірі. Қазіргі күні Ақсай, Ұшақтар және Комсомол кенттерін сумен және жарықпен қамтамасыз ету үшін жобалық-сметалық құжаттар әзірленуде. Келесі жылы осы жобаларды жүзеге асырамыз деп үміттенемін. Осы жобалар жүзеге асқаннан кейін тұрғындарға жер телімін жалға бере бастаймыз. Тұрғын үй салынып біткен соң, тұрғындар жер телімін өз аттарына меншіктей алады. Облыс әкімі Даниал Ахметов айтқандай, Семей қаласын үлкен ауылға айналдырудың қажеті жоқ, салынатын үйлер ретті, әдемі болуы керек. Сондықтан «Тұрғын үй құрылыс жинақ банкі» АҚ арқылы да осы аудандарға тұрғын үй салуды жоспарлап отырмыз,- дейді Е.Сәлімов. Кездесу барысында Комсомол кентінің тұрғындары депутат Қайрат Құсайыновқа аялдаманың алыстығына, жолдың нашарлығына шағым айтты. Өз кезегінде халық қалаулысы қоғамдық көліктердің жекеменшікте екенін және кенттегі халық санының аз екенін алға тартты. «Бұл мәселе төңірегінде тасымалдаушылармен сөйлескен болатынмын. Ең алдымен жолдың сапасын жақсарту керек»,- деген Қайрат Құсайынов қоғамдық көлік проблемасын алдағы уақытта шешуге тырысатынын жеткізді.
Комсомол, Селевина, Юность, Жаңа құрылыс аудандарының мектептерінде бала санын азайту мақсатында қазіргі күні Ұшақтар ықшам ауданында 1200 орынға арналған жаңа мектеп салынуда. Бас мердігер «Фирма Азия» ЖШС мектеп құрылысын қараша айында аяқтауды жоспарлап отырған көрінеді. Сондай-ақ Комсомол кентінде балабақшаға деген сұраныс та жоғары. Кезекте тұрған 1 690 бала Ұшақтар кентінде салынып жатқан жаңа балабақшадан кезектерін күтуде. Ал 2018 жылға қарай аталған ауданда 200 орынға арналған балалар ауруханасының құрылыс жұмыстары басталмақ.
Жадыра ТӨЛЕГЕНҚЫЗЫ, «Семей таңы»
