Елбасы Жолдауларында көрсетілген басты мақсаттардың бірі — индустриалды-инновациялық жобаларды дамыту болып табылады. Қазіргі таңда Семейде бұл бағытта «Қазақстанинжиниринг» АҚ екі зауыты жұмыс істеп келе жатыр. Жұмыс сапары барысында аталмыш кәсіпорындардың жұмысшыларымен облыс әкімі Бердібек Сапарбаев пен Президент әкімшілігінің мемлекеттік инспекторы Сәлімгерей Бақбергенов, Сенат депутаттары Талғат Абайділдин мен Сергей Плотников кездесті.
«Семей машина құрастыру зауыты» мен «Семей инжиниринг» кәсіпорындарының ұжымымен кездесу барысында «Қазақстан Инжиниринг» ұлттық компаниясының төрағасы Болат Смағұлов жиналғандарды 2013 жылдың нәтижелерімен таныстырды. Ол бір жыл ішінде өндіріс көлемінің 81 миллиард теңгеге жетіп, активтердің 2,6 есеге, табыстың 12 есеге өскенін мәлімдеді. Сондай-ақ ол, инвестициялар көлемінің де 12 есеге ұлғайғанын, еңбек өнімділігінің артып, жалпы республикалық көрсеткіштен асып отырғанын айтты. Соңғы жылдары бұл компанияда 950 жұмыс орны ашылса, таяу арада тағы да 500 жұмыс орнын ашуды жоспарлап отыр. Жалақы мөлшері екі есеге жуық көбейген. Қазіргі таңда компания бойынша жалақының орташа көлемі 125 мың теңгені құрайды.
{jcomments on}- Халықаралық қауымдастықтың қолдауына ие болдық. Соның арқасында 200 миллион доллар инвестиция алдық. Бұл өз кезегінде өңірге де пайдасын әкелді: өткен жылы компанияның екі зауыты жиыны 1 миллиард 200 миллион теңге салық төледі. Екі кәсіпорынның ұжымдарында 1000-ға тарта адам еңбек етуде. Жас мамандардың өндіріске қайтып келгенін көріп отырмыз. Зауыттарды қайта жаңғырту жұмыстары жүргізілгені тағы бар. Қазір біз «Семей инжиниринг» кәсіпорнында қайта жаңғыртудың 4 кезеңін бастадық. Бұл кезең аяқталған кезде қарапайым тұрғындарға қажетті өнімдерді жасай алатын боламыз. Аталмыш жұмыстарды атқаруға шамамен 3 миллиард теңге жұмсалады. Бұл өз кезегінде зауытта қосымша жұмыс орындары пайда болады дегенді білдіреді,- деді Болат Смағұлов. Сондай-ақ, ол биыл Елбасы Жолдауында көрсетілген әлеуметтік саладағы тапсырмаларды орындау мақсатында жұмысшыларды тұрғын үймен қамтамасыз ету мен спорт залын ашу жоспарланып отырғанын жеткізді.
-Біз қарапайым жұмысшыларға жағдай жасайтын боламыз, өйткені олар өндірістің қозғаушы күші. Елбасы міндеттеген мамандарды оқыту, ғылымды өндіріске енгізу мақсаттарын орындауға басты назар аударамыз. Себебі, бүгінгі таңда инженер болсын, слесарь болсын, ағылшын тілін білуге, бағдарламалар ісі мен жоғары технологяларды меңгеруге тиіс мамандар санатына жатады,- деді компания төрағасы. Басшылық алдында тұрған үлкен мақсат — компания айналымындағы ақша көлемін 1 миллиард доллардан асырып, компанияны трансұлттық компанияға айналдыру.
Қазіргі таңда екі зауыт та дамудың жаңа сатысына көтерілді. Әлемнің 30 еліне өнім экспорттап, кәсіпорындармен әріптестік байланыс орнатқан.
— Өз басым Елбасының тапсырмасымен басты бағдарламалық құжат- Жолдауды түсіндіру жұмыстарын жүргізуге Шығыс Қазақстуан облысына келгеніме қуаныштымын. Өзінің 2050 жылға дейінгі Жолдауында Нұрсұлтан Әбішұлы Назарбаев стратегиялық мақсатты орындаудың басты жолдарын көрсетіп берді – ол әлемнің дамыған отыз елдерінің қатарына кіру. Бірінші кезең орындалды. Мен ұлттық компания да осы бағытта жұмыс жасай беретініне сенімдімін,-деді халық қалаулысы Сергей Плотников.
Кездесуді қорытындылай келе, екі зауыттың да басшылары алдағы уақытта да ерінбей еңбек етуге уәде берді. Өз кезегінде аймақ басшысы Бердібек Сапарбаев облыс халқының алдында тұрған басты мақсаттарды тағы да бір атап өтті.
— Елбасы өндіріске жаңа технологияларды енгізу, жұмысшыларға лайықты жалақы төлеу мақсатын қойды. Семей үшін бұл екі зауыттың үлкен маңызы бар. Бізге қолдау көрсетіп келе жатқан Қорғаныс министрі Әділбек Жақсыбеков пен ұлттық компания басшыларына алғысымызды білдіреміз. Біз алға қарай жүруіміз керек. Бұрынғы кездері әскери өнім шығарған зауыттар енді халық үшін де жұмыс жасауға тиіс,-деді облыс әкімі.
Мирас ҚҰСАЙЫН, «Семей таңы»
