Сенбі күні Ертіс жағалауындағы абаттандыру жұмыстары мәресіне жетіп, қала тұрғындары жаңа субұрқақтың ашылуын тамашалады. Шаһардың көрігіне көрік қосқан нысан бой көтерген аумақта мерекелік концерт ұйымдастырылып, тұрғындарды қала әкімі Ермак Сәлімов арнайы құттықтады.
Сенбінің кешінде Ертіс жағалауына жиналған халық әуелі мерекелік концерт пен спортшылардың өнерін тамашалады. Флешмоб ұйымдастырылып, тұрғындар спорттық сайыстардан сынға түсті.
— Биылғы жыл — саяси, мәдени, әлеуметтік жаңғырулар кезеңі. Елмен бірге сүйікті қаламыз Семей де құлпырып келеді. Аймақ басшысы Даниал Ахметов Семейді абаттандыру жұмыстарына мейлінше көп көңіл бөлуде. Қала өмірінде айтарлықтай игі істер атқарылып жатыр. Жуырда ғана ұлт көсемі Әлихан Бөкейхановтың ескерткішін өз тұғырына қондырып, Алаш тойын республика көлемінде атап өттік. Семейдегі дүбірлі той Мұхтар Әуезовтің 120 жылдық мерейтойымен жалғасты. Қала күні де өз деңгейінде тойланды. Алаңқайлар мен күре жолдар қайта жөндеуден өтіп, аялдамалар жаңартылды. Әлі де жөндеуді қажет ететін нысандар баршылық. Бірлік пен халық сенімінің арқасында мақсаттарға бірге жетеміз деп ойлаймын. Ерке Ертістің жағасындағы ел игілігіне беріліп отырған жаңа субұрқақ құтты болсын! Семейдің көрікті жерлерінің қатары бүгін тағы бір нысанмен толықты,- деді қала әкімі Ермак Сәлімов тұрғындарға арнаған құттықтау сөзінде.
Осыдан соң қала тұрғындары Ертіс жағалауында екі жылға созылған жөндеу жұмыстарының қорытындысы ретінде қайта жаңғыртылған каскадты фонтанның ашылуын тамашалады. Сондай-ақ аумақта балалар ойын алаңдары пайдалануға беріліп, жарықтандыру жұмыстары жүргізілген. Жалпы алғанда, Ертіс жағалауын абаттандыру жұмыстарына бюджеттен 345 млн. теңге бөлініпті. Бұл бағыттағы абаттандыру жұмыстары келесі жылы да жалғасын тауып, алғашқы кезекте жүгіру жолына жөндеу жұмыстары жүргізілмек.
— Ертіс жағалауы — қала тұрғындарының сүйікті демалыс орындарының бірі. Жөндеу жұмыстарының аяқталып, жаңа субұрқақтың ашылғанына қуаныштымыз. Ертіс жағалауының әсіресе түнгі көрінісі өте әдемі. Аумақтың толық жарықтандырылуы қала тұрғындарының кешкі серуеніне жайлылық туғызып отыр. Ойын алаңдарына енді балаларымды үнемі әкеліп тұратын болдым. Қаламызда осындай көрікті жерлер қатары көбейе берсе екен,- дейді қала тұрғыны Алмагүл Рақымбаева.
Күннің суықтығына байланысты жұмысын тоқтатқан жаңа субұрқақты қала тұрғындары енді келесі көктемде ғана тамашалай алады.
Жадыра ТӨЛЕГЕНҚЫЗЫ, «Семей таңы»
