18 қазан күні қала әкімдігінде қалалық мәслихаттың кезектен тыс, он тоғызыншы сессиясы өтті. Күн тәртібіндегі екі мәселе депутаттар назарына ұсынылды. «Әлеуметтік көмек көрсетудің, оның мөлшерін белгілеудің және мұқтаж азаматтардың жекелеген санаттарының тізбесін айқындаудың қағидаларын бекіту туралы» Семей қаласы мәслихатының 2014 жылғы 31 наурыздағы №28/150-V шешіміне өзгерістер мен толықтырулар енгізу туралы жұмыспен қамту және әлеуметтік бағдарламалар бөлімі басшысының орынбасары Айдар Самаев баяндама жасады. Ал Семей қаласы экономика және бюджеттік жоспарлау бөлімінің басшысы міндетін атқарушы Сәуле Қасенова қаланың 2017-2019 жылдарға арналған бюджетіндегі өзгерістерге тоқталды.
Сессияда белгілі болғандай, қаланың бюджет көлемін ұлғайту көзделіп отыр. ҚР Бюджет кодексінің 106, 109-баптарына сәйкес және облыстық мәслихаттың шешімі негізінде қала қазынасына аймақ бюджетінен трансферттер мен несиелер бөлінген. Қосымша қарастырылған қаражат қала мектептеріне оқулықтар мен оқу-әдістемелік құралдарды алуға, мектепалды мекемелерінің қызмет процесін автоматтандыруға, «Абай — Арена» мәдени-спорт кешенін салуға арналған жобалық-сметалық құжаттарға, сондай-ақ Қарағайлы ықшам ауданында бой көтеріп жатқан сегіз қабатты тұрғын үйлердің құрылыс жұмыстарына бөлінді. «Қоғамдық тәртіп, қауіпсіздік, құқықтық, қылмыстық-орындаушылық қызмет» функционалдық тобы бойынша, «Білім беру» қызметі бойынша «Әлеуметтік көмек және әлеуметтік қамту» қызметіне де қаражат бөлініп отыр.
— Бұған қоса тұрғын үй-коммуналдық шаруашылық, елді мекендердегі көшелерді жарықтандыру, спорт нысандарын дамытуға қатысты шығындар көбейеді. Ал инженерлік-коммуникациялық инфрақұры-лымды, сумен қамту және жылу беру жүйелерін дамытуға, ауыл шаруашылығын өркендетуге, көлік инфрақұрылымын жетілдіруге қатысты шығын азаяды,- дейді Семей қаласы экономика және бюджеттік жоспарлау бөлімі басшысының міндетін атқарушы Сәуле Қасенова.
Бюджеттік қаржының тиімді жұмсалуын мақсат еткен халық қалаулылары қаралған мәселелерге бір ауыздан қолдау білдірді. Күн тәртібіндегі екі мәселе де комиссия отырысында талқыланып, тиісті шешімдер қабылданатын болады.
Жібек СЕРҒАЗЫ, «Семей таңы»
