«Семей қаласының тілдерді оқыту орталығының жұмысын жаңғырту және болашаққа бағдар». Осындай тақырыпта өткен жұма, 3 қараша күні қалалық Достық үйінде Семей қаласының тілдерді оқыту орталығының директоры Олжас Соғымбай мен мәдениет және тілдерді дамыту бөлімінің тіл секторының меңгерушісі Маржан Бахатованың қатысуымен баспасөз конференциясы болып өтті. Журналистермен кездесу барысында шаһардағы тілдерді оқыту орталығының ҚР тілдерді дамыту мен қолданудың 2011-2020 жылдарға арналған мемлекеттік бағдарламасын іске асыру жолында атқарған ауқымды жұмыстары айтылып, орталықтың жан-жақты талқыланды жұмысы.
Бұрнағы жылдары жекеменшік ретінде жұмыс істеген тілдерді оқыту орталығы биыл, қала әкімінің жарлығына сәйкес, мемлекеттік мекеме болып қайта құрылған. Содан бері орталықта қазақ тілінің мәртебесін көтеруге, өзге ұлт өкілдерінің тілдерін жетік меңгеруге бағытталған бірқатар шаралар іске асты. Мәселен, Қазақстан халықтарының тілдері мерекесіне орай, «Тілдер шеруі» айлығы, сондай-ақ әскери бөлімдер арасында «Тіл мәртебесі – ел мәртебесі» тақырыбында сайыс ұйымдастырылды. Айта кету керек, биылғы жылы тіл үйретуде, сайыстар ұйымдастыруда тек мемлекеттік қызметкерлерге ғана емес, әскери адамдарға да баса мән берілді.
— Қала бойынша Әуе шабуылына қарсы мемлекеттік мүлік және жекешелендіру департаменті, Семей қаласының №2 қалалық соты, облыстық соттар, Семей өңірлік гарнизоны Әскери полиция жасағы және ҚР ҰҚК ШҚ 2098 әскери бөлімінің тыңдаушылары тіл жарыстарына белсенді түрде атсалысты. Сонымен бірге еліміздің тілдерді дамыту мен қолданудың 2011-2020 жылдарға арналған мемлекеттік бағдарламасын жүзеге асыру мақсатында Ұлттық тестілеу орталығымен бірлесіп ҚазТЕСТ жүйесі бойынша байқау сынағы мен сертификаттық тестілеу ұйымдастырылды. ҚазТЕСТ жүйесінің диагностикалық тестілеуіне 1154 және сертификаттық сынаққа 117 адам қатысты. Нәтижесінде А2 деңгейі бойынша 54, В1 деңгейі бойынша 19, В2 деңгейіне сәйкес 6 азамат сертификатқа қол жеткізді. Орталықта, мемлекеттік тілді үйренушілерге арналған тіл үйрету курсынан бөлек, «Болашаққа — қазақ тілімен» акциясы бастау алып, бір айдың ішінде 313 адам «Тілашар» бағдарламасы негізінде оқуға тартылды. Семей өңіріне шетелден қоныс аударып келген қандастарға арналып «Қандастарға қамқорлық» шарасы да тілдерді оқыту орталығының мұрындық болуымен өтті. «Қандастарға қамқорлық» акциясы көптеген қандас бауырларға орыс тілінің бастапқы базасын үйренуге мүмкіндік берді,- дейді Семей қаласының тілдерді оқыту орталығының директоры Олжас Соғымбай.
Баспасөз мәслихатында тілдерді оқыту орталығының тыныс-тіршілігімен таныстырған Олжас Соғымбай болашақтағы жоспарларымен де бөлісті. Айтуынша, мемлекеттік қызметшілерге арналған «Іс қағаздарын жүргізу» және өз баяндамасын соңғы нүктесіне дейін ресми тілде оқуды жөн санайтын мемлекеттік қызметкерлерге арналған «Шешендік өнер» бағдарламалары әзірленіпті. Аталмыш бағдарламалар 2018 жылдан бастап жүзеге асырылмақ.
Жібек СЕРҒАЗЫ, «Семей таңы».
