Ұзақ жылдар түрлі лауазымды қызметтерді атқарып, бар білімін ел дамуына арнаған білікті басшылардың бірі Сүлеймен Медеуов құрметті еңбек демалысына шықты. Өз ісінің нағыз білгірі болған кәсіби маманға әкімдікте лайықты құрмет көрсетілді. Салтанатты шараға Семей қаласы әкімі аппаратының басшысы Зәуреш Исабаева, қалалық мәслихат хатшысы Бейсенбек Ақжалов, облыстық, қалалық мәслихат депутаттары, салалық бөлім басшылары мен қызметкерлері қатысты.
Жиынды ашқан Зәуреш Рамазанқызы Сүлеймен Медеуұлының қызмет жолына қысқаша тоқталып, оның қай салада болмасын табысты еңбек еткенін атап өтті.
— Сүлеймен Медеуұлы 40 жылдан астам уақыт бойы мемлекеттік қызметте еңбек етіп келді. Осы уақыт аралығында өзінің іскерлігі мен еңбекке деген табандылығының арқасында қызметтің сан түрлі баспалдағынан өтіп, қатардағы қызметкерден басшыға дейін өсті. Әріптестері арасында беделі артып, жас кадрларды даярлауда үлгі–өнеге көрсетті. Оның ынта-жігері мен әлеуеті, өмірлік іс –тәжірибесі мол, әлі де еңбек етуге мүмкіншілігі жетеді. Алайда, еліміздегі Заңға сәйкес, зейнеткерлікке шығудың да өз тәртібі бар. Осыған орай, қала әкімі Ермак Бидахметұлы мен жергілікті әкімдік қызметкерлері атынан осы айтулы күнмен құттықтап, әріптесімізге тек жақсылықтар ғана тілейміз,- деді аппарат жетекшісі өз сөзінде.
Соңынан ұзақ жылғы табысты еңбегі үшін қала әкімінің алғыс хатын табыс етті.
Қазақтың Еңбек Қызыл Ту орденді ауыл шаруашылығы институтын, Қазақ қаржы-экономикалық институтын экономист-менеджер мамандығы бойынша бітірген Сүлеймен Медеуұлы өзінің еңбек жолын бұрынғы Семей облысы нормативтік-зерттеу станциясының егін шаруашылығы бөлімінің агрономы болып бастап, қала, облыстық деңгейдегі түрлі бөлім, басқарма, комитеттерде басшылық қызметте болған. Соңғы жылдары Семей қаласының ауыл шаруашылығы, кәсіпкерлік, экономика және бюджеттік жоспарлау бөлімдеріне жетекшілік етті. Мерейтой иесі 2015 жылдың ақпан айынан бері Семей қаласы жер қатынастары бөлімін басқарды. Осы бөлімнен зейнеткерлікке шығып отыр.
Ізгі тілектер легін қалалық мәслихаттың хатшысы Бейсенбек Ақжалов жалғастырып, қалалық, облыстық депутаттар атынан құттықтап, мәслихаттың алғыс хатымен марапаттады.
Ал Сүлеймен Медеуұлының жеке қасиеттері туралы мемлекеттік-құқықтық бөлім басшысы Сержан Әзбергенов, шыққан тегі, өскен ортасы жайлы жазушы Медеу Сәрсеке әңгімелеп, әріптестері қай құрметке де лайықты азаматты тағы бір қырынан таныды.
Ермек Исабаев,«Семей таңы».
