«Сандық Қазақстан: IT – технологиялар — техникалық және кәсіптік білім беру жүйесінде мамандарды сапалы дайындау құралы». Осындай тақырыпта «Кәсіпқор» холдингінің қолдауымен 7 қараша күні қаладағы электротехника колледжінде республикалық семинар болып өтті. Семинарға «Кәсіпқор» холдингі» коммерциялық емес акционерлік қоғамы Кәсіптік білім беру орталығының басшысы Гуля Қарсыбекова, Атырау қаласы «APEC Petrotechnic» жоғарғы колледжінің жалпы кәсіптік пәндер оқытушысы Әсел Ермекова, Семейдегі кәсіптік-техникалық білім беретін бірнеше колледж ұстаздары мен студенттері қатысты.
Семинардың мақсаты техникалық және кәсіптік білім беру ұйымдарының оқу үрдісіне IT-технологияларды енгізу және жүзеге асыруға байланысты тәжірибе алмасуға, осы салада білім беретін мамандардың біліктілігін арттыруға бағытталды.
— Шығыс Қазақстан облысындағы техникалық — кәсіптік білім беретін 23 оқу орнында 1208 студент бар. Оның 766-сы мемлекеттік білім беру тапсырысы аясында білім алуда. Есептеу техникасы мен ақпараттық жүйе мамандықтары бойынша 8 мемлекеттік және 15 жекеменшік колледждер базасы негізінде кадрларды дайындау жұмыстары жүргізіледі. Ағымдағы жылы «Есептеу техникасы» және «Бағдарламалық қамтамасыз ету» мамандықтары бойынша мемлекеттік тапсырыс шеңберінде 96 орын бөлінсе, «Ақпараттық жүйе» мамандығы үшін 20 орын қарастырылған. Бүгінгі күні еңбек нарығында IT-технологияны жақсы меңгерген жоғары білімді мамандарға сұраныс артып отыр. Осыған орай биыл республикада алғаш рет жергілікті бюджет есебінен 14 білім гранты бөлінді. Келесі жылдан бастап «Сандық Қазақстан» жобасын жүзеге асыру жолында IT-технолог мамандарына жоғары білім беру мақсатында грант санын көбейтіп, ақпараттық-коммуникациялық технологиялар саласының қыр-сырын меңгерушілерді даярлау жұмыстары жалғасатын болады,- дейді ШҚО Техникалық және кәсіптік білім беру және кадрларды қайта даярлау орталығы директорының орынбасары Дамир Серғазы.
«100 нақты қадам» Ұлт жоспарына сәйкес, өзінің әлеуеті, мамандыққа бағдарлауы, материалдық-техникалық жағдайы тұрғысынан өңірлік даму жобасына сай келетін 10 колледж таңдалып алынған. Облыстағы 83 колледждің ішінде электротехникалық колледж үздік ондықтың тізіміне еніп отыр. Электротехникалық колледж директоры Азат Сарпеков:
— Бүгінде электротехникалық колледж – техникалық және кәсіптік білім беретін, IT-технолог мамандарын даярлайтын бірден-бір оқу орны. Техникалық және кәсіптік мамандықтардың әлеуетін арттырып, жалпы еңбек қоғамын қалыптастыру мақсатымен ҚР Білім және ғылым министрлігінің ұйымдастыруымен еліміздің 823 колледжі арасында өткен WorldSkills Kazakhstan Ұлттық чемпионатында электротехника колледжінің «Мехатроника» мамандығының студенті 1-ші орынға ие болды. Осыдан-ақ колледж ұстаздарының біліктілігін аңғаруға болады. Республиканың озық оқу орындарының қатарында Атырау қаласындағы «APEC Pertotechnic» жоғарғы колледжі бар. Бұл — Батыс Қазақстандағы негізгі мемлекетаралық қатынасқа бағытталған мұнай өңдеуді үйрететін білім ордаларының бірі. 2018 жылдың наурыз айына дейін «Кәсіпқор» холдингі және ШҚО білім басқармасы Семейдегі электротехникалық колледжді де дүниежүзілік стандарттарға сай келетін оқу орны етуді жоспарлап отыр. Биыл колледждің 34 оқытушысы шет мемлекеттерде біліктіліктерін арттырып келді, енді 5 оқытушы 20 қараша күні Ұлыбританияға білім жетілдіру курсынан өтуге аттанбақ,- деді Азат Сарпеков.
Жібек Серғазы, «Семей таңы»
