14 қараша, сейсенбі күні «Нұр Отан» Семей қалалық филиалының қоғамдық қабылдау бөлімінде қала прокурорының орынбасары Руслан Мұратбеков азаматтарды жеке сұрақтары бойынша қабылдады. Прокурор орынбасарымен ресми жүздесуге келгендер қатарында болған қала тұрғыны Ербол Ежебаев 2016 жылдың 19 наурызында 17 жасар ұлын ұрып өлтірген күдіктіге қатысты арызын арқалап келіпті. Шағымданушының айтуына қарағанда, қылмыстық істі Затон полиция бөлімінің тергеушілері әуеліде Кодекстің 106-шы бабының 3-тармағы бойынша жүргізген. Яғни, осы баптың бірінші немесе екінші бөліктерінде көзделген абайсызда жәбірленушінің өліміне әкеп соққан не қылмыстық топ жасаған іс-әрекеттер нәтижесінде, күдікті 8-ден 12 жылға дейін бас бостандығынан айырылу жазасына кесілуі керек. Алайда таяуда қылмыстық сипаттағы іс Кодекстің 104-ші, яғни абайсызда қазаға ұшырату бабына ауыстырылып, қылмыскердің жазасы жеңілдетілген екен. Соттың мұндай шешімімен келіспеген ата-ана еріксіз көзіне жас алды.
— Қазіргі уақытта іс тек соттың құзыретінде. Кезекті сот отырысында бұл шешіммен, сотталушыға қатысты қылмыстық іспен келіспеу туралы сотқа шағым-арыз жіберіп, жазасын қиындататын 106-шы бапқа ауыстыру жөнінде талап-тілек беруге құқығыңыз бар. Заң жүзінде іс прокуратураның қарауында емес, дәл қазір соттың құзыретінде,- деп бір ауыз кеңес берумен шектелді, прокурордың орынбасары Руслан Мұратбеков.
Құқық қорғау органдарының әрекетсіздігіне налып, бейқамдығына наразылық білдірген шағымданушы Ербол Ежебаев облыстық, тіпті бас прокуратураға да хат жазып, әділдік іздеп, көмек сұраған. Қалалық прокуратура тарапынан ағымдағы жылдың 23-ші наурызында «оқиға куәгерлері тергеліп, жәбірленушінің әлеуметтік желідегі хабарламалары, ұялы телефонындағы детализациясы тексерілсін» деген нұсқау берілген екен. Алайда он ай ішінде полиция қызметкерлері үш рет қана тергеу амалдарын жүргізгенін айтады, Ербол Ежебаев. Әділдікке қол жеткізу мақсатында шарқ ұрған әке Алматы қаласынан жекеменшік сарапшыларды да жалдаған. Олар ажал құшқан өрімдей жас жігіттің мәйітіне эксгумация жасап, сараптамадан өткізді. Нәтижесінде қаза болған баланың бет жарақаттары бар екені, сондай-ақ мұрын, көз сүйектері сынғаны анықталған. Бірақ сараптама қорытындысы жоққа шығарылып, Өскеменде, кейін Қарағанды қаласында қайта жасалған. Куәгерлердің сөзіне сүйенген сарапшылар жәбірленуші кеуде тұсынан соққы алып, артынша жүрегі тоқтап қалған деген қорытындыға келген. Бұл іске қатысты соттың кезекті отырысы 16 қараша күні өтпек. Соттың жауабы қанағаттандырмаса, шындық іздеген ата-ана аппеляцияға бермек ниетте.
Қала прокурорынан көмек сұрай келгендердің шағымдарының басым бөлігі қылмыстық істерге қатысты болды. Барлығының тілегі бір – әділеттілікке қол жеткізу. Заңға сәйкес кеңес алған қала тұрғындары түйткілді мәселелерінің түйіні шешіледі деген зор үмітпен үйлеріне тарқасты.
Жібек СЕРҒАЗЫ, «Семей таңы».
