Жұма, 17 қараша күні Шығыс Қазақстан облыстық сотының төрағасы Нұрлан Қайырбеков Семейге келіп, қала судьяларымен кездесу өткізді. Басқосуда ол процессуалдық кодекс пен басқа да заңнамалық актілерге енгізілетін өзгерістер мен толықтырулар жайлы ақпар беріп, заң қызметкерлерінің ұсыныс-пікірлерін тыңдады.
Заң саласындағы өзгерістер Ұлт жоспары — «100 нақты қадамда» көрсетілген бағыттарды жүзеге асыру мақсатында қолға алынып отыр. Тергеуші судья мен оның мәртебесі, сондай-ақ экономикалық қылмыс саласындағы мәселелер талқыланған дөңгелек үстел басында электронды сот ісі жайында да тың идеялар көтерілді.
— Заң саласына енгізілетін өзгерістер мен толықтырулар заман талабына сай туындап отыр. Қылмыстық процессуалдық кодекстің жаңа жобасы және саладағы реформа ең алдымен азаматтардың құқықтарын қорғауды және нығайтуды көздейді. Тергеу барысында қос тараптың мүмкіндігін арттырып, сот бақылауын кеңейту сот процесінің ойдағыдай жүзеге асуына септігін тигізеді деген ойдамыз. Заң саласындағы аталған өзгерістерді қолданысқа енгізбес бұрын Германия, Ұлыбритания, Эстония және Грузия елдерінің тәжірибесі есепке алынды. Бақылаушы және сот органдарынан түскен барлық ұсыныстар Жоғарғы сотта қаралатын болады,- дейді облыстық соттың төрағасы Н. Қайырбеков.
ШҚО-да «Прокурордың сотқа қашықтықтан қатысуы» атты жаңа жоба қолданысқа енгізілді. Бұл әдіс прокурорлардың сотқа қатысуын жеңілдетіп, уақытын оңтайлатпақ.
— Аудандарда да прокурордың қатысуын талап ететін сот процестері өтеді. Ал ол үшін бюджеттен арнайы іссапар шығындары қарастырылмаған. Әсіресе қыстыгүні ауыл арасында жол жүру қиынға соғады. Кейде мұндай сот отырыстары небәрі 15-20 минутқа созылуы да мүмкін. Әкімшілік сот ісі қарастырылатын уақытта енді «True conf-online» лицензиялық бағдарламасы арқылы облыспен байланыс қосылады. Осы арқылы екі жақтың уақытын үнемдеп, сот процесін жеңілдетуге мүмкіндік туып отыр,– деді Күршім ауданының прокуроры Е.Тағаев.
Айта кетейік, жаңа жоба Үржар, Ұлан, Жарма, Күршім, Көкпекті, Тарбағатай, Катонқарағай аудандарында да іске қосылыпты.
Жадыра ТӨЛЕГЕНҚЫЗЫ, «Семей таңы»
