Семейдегі «Солтүстік» сауда логистикалық орталығында ауылшаруашылық өнімдері жәрмеңкесі ұйымдастырылды. Бұл жолы қала тұрғындарына Бородулиха ауданының он сегіз ауылдық округінің шаруа қожалықтары өз өнімдерін әкеліпті.
Бородулихалық шаруалар қала халқына 3100 келі сиыр еті, 500 келі жылқы еті, 700 келі қой еті мен сүт және бал өнімдерін нарықтағы бағадан төмен етіп саудалады. Таңертеңнен жәрмеңкеге асыққан семейліктердің қарасы да қалың еді. Көпшілік табиғи таза ауыл өнімдерін сатып алуға асықты. Семейде әр сенбі сайын мұндай жәрмеңкелерді ұйымдастыру дәстүрге айналған. Халыққа ұсынылған азық-түліктің бағасы да базардан біршама арзан. Сондықтан сенбілік жәрмеңке қарапайым тұрғындарға қаржыларын үнемдеуге, ең бастысы, таза өнімдерді алуға мүмкіндік береді.
Сондай-ақ осындай жәрмеңкелер әлеуметтік маңызы зор азық-түлік құнының тұрақтылығын қамтамасыз етуге де септігін тигізбек. Бородулиха ауданы ауыл шаруашылығы бөлімінің бас маманы Бақтияр Құдайбергеновтің айтуынша, семейліктердің таза табиғи өнімге сұранысы жоғары.
— Бүгінгі ауылшаруашылық жәрмеңкесіне ет, май, құрт сияқты ауылда өндірілетін өнімдерді алып келдік. Атап айтар болсақ, 3100 келі сиыр еті, 500 келі жылқы, 680 келі қой еті жеткізілді. Сондай-ақ 400 литр сүт, 150 келі сары май, жұмыртқа мен қаймақ, құрт, май, ірімшік төмен бағада саудалануда. 200 келідей бал өнімі де жақсы өтуде. «Солтүстік» сауда логистикалық орталығы ашылғалы, ауданның шаруалары өнімдерін осында саудалауда. Бұл шаруалар мен тұтынушыларға да тиімді болып отыр,- дейді Бақтияр Құдайбергенов.
Бородулиха ауылдық округі Коростели ауылынан келген Бақыт Әубәкірова жәрмеңкеге қатысуды дәстүрге айналдырған.
— Осы жолы өзіміздің қосалқы шаруашылығымыздан бір бас сиыр етін алып келдік. Сиыр етін 1300 теңгеден саудалап жатырмыз. Осындай жәрмеңкелерге ұдайы қатысып отырамыз. Бұл біз сияқты шаруаларға өте қолайлы, баршаларыңызға рақмет,- дейді.
Ал Белағаш ауылдық округінен келген Шынар Салихова сүт өнімдерін жеткізіпті. Ол да қосалқы шаруашылығынан алынған өнімдерін демалыс сайын жеткізіп отырады екен.
— Жәрмеңкеге демалыс сайын келіп отырамыз. Сүт, қаймақ, ірімшік, сары май саудалаймын. Осы жолы 30 литр қаймақ, 20 литр сүт, 30 келі сары май әкелдім. Таңертеңнен өнімдеріміз жақсы өтіп жатыр. Бағасы да халыққа қолжетімді деп ойлаймын. Сүт өнімдері сапалы әрі табиғи болғандықтан, өтімі жақсы,- дейді.
Осы орайда қала халқының да пікірін білген едік. Көбіне ет және сүт өнімдерін сатып алғандар бағаның шынымен қолжетімді екенін айтады. Жалпы, осындай жәрмеңкелер бағаны бір қалыпты ұстауға мүмкіндік береді. Оны тәжірибе де көрсетіп отыр.
Асан МЫРЗАХАН, «Семей таңы»
>
«Семей таңы»
