Сейсенбі, 12 желтоқсан күні Семейде «Рухани жаңғыру: Ұлттық болмыс пен бірегейлікті сақтаудағы отбасының рөлі» тақырыбында республикалық форум өтті. Форумға ҚР Дін істері және азаматтық қоғам министрлігінің өкілі Мейрам Иманбаев, қала әкімі Ермак Сәлімов және қаладағы үкіметтік емес ұйымдар мен бірлестіктер өкілдері, ата-аналар, оқушылар, студенттер қатысты.
Ұлттық бірегейлікті қалыптастыруда діннің маңызы зор. Мемлекетіміз ұстанып отырған дін саясатына қатысты дәстүрлі емес діни ағымдар тарапынан айтылып жатқан сыни пікірлер де жоқ емес. Дін саласында орын алып жатқан кейбір келеңсіздіктерді жою мақсатында өткен жылы қыркүйек айында Елбасының тапсырмасымен Дін істері және азаматтық қоғам министрлігі құрылып, дін саласындағы мемлекеттік саясаттың 2017-2020 жылдарға арналған арнайы тұжырымдамасы да әзірленді. Сол тұжырымдамалардың негізінде биыл дін саласындағы кейбір заңнамаларға өзгерістер мен толықтырулар енгізілмек.
— Жоба бойынша, дін саласын қамтитын 10-нан астам заң мен 3 кодекске өзгерістер енгізілді. Жаздан бері діни бірлестіктермен, қоғамдық ұйымдармен бірге бірнеше мәрте қоғамдық тыңдау өткіздік. Бұл мәселе мемлекеттік органдар тарапынан да әлденеше рет талқыланып, сүзгіден өтті. Бүгінгі күні аталған заң Президент әкімшілігінің келісімін алды. Алдағы уақытта заң жобасы халық қалаулыларының талқылауына түседі,- деді Мейрам Иманбаев.
Оның айтуынша, Заңға енгізілетін өзгерістер мен толықтырулар әртүрлі діни бірлестіктер мен мемлекеттің өзара қарым-қатынасын және теріс діни ағымдарға қарсы заңнамалық тұрғыда жүргізілетін жұмыстарды нығайта түспек. Мәселен, жаңа заң бойынша 16 жасқа толмаған жасөспірімдердің ата-анасының рұқсатынсыз ғибадат орындарына баруына болмайды. Олай болмаған жағдайда, діни бірлестік басшылары әкімшілік жауапкершілікке тартылатын болады. Ата-аналарға да белгілі бір жауапкершілік көзделген. Елімізде әртүрлі діни ұйымдар мен бірлестіктердің кең қанат жайып келе жатқанын ескерсек, бұл жастарды теріс діни ағымдардың жетегінен қорғаудың тиімді жолы екенін айтады мамандар.
— Күз айында мектепте форма мәселесі қайта-қайта көтерілетінін де білесіздер. Қазақстан – зайырлы мемлекет, яғни мемлекет пен дін бір-бірінің ісіне араласпайды. Конституцияның 1-бабында бұл туралы нақты айтылған. «Білім туралы» Заңда да, Білім және ғылым министрінің №26 бұйрығында да оқушының мектепте бірыңғай оқу формасын сақтауы керектігі көрсетілген. Қарап отырсақ, мектеп формасы туралы нақты заңнамалық нормалар қабылданған. Осыған қарамастан, қыз балаларды мектепке жібермей отырған ата-аналар бар. 6 желтоқсан күні ҚМДБ мектеп формасына қатысты өз ұстанымын жариялап, мемлекет заңына азаматтардың бағынуы тиіс деген қорытындыға келді. Демек, ҚМДБ тарапынан да, мемлекет тарапынан да бұл мәселеге қатысты ортақ түсіністік бар,- дейді М.Иманбаев.
Отбасының мемлекетті құрушы фактор екені белгілі. Бабаларымыз «Отан от басынан басталады» дейді. Халқымыз ақ неке, адал жар ұғымдары арқылы отбасы мен некенің қасиетін ардақтайды. Қазіргі кезде кейбір жастардың отбасы құндылығы мәселесіне атүсті қарайтындары көңіл қынжылтады. Неке — отбасын құрудың негізі, ер мен әйелді рухани және материалдық тұрғыдан біріктіретін жол.
— Материалдық тұрғыда отбасын қамтамасыз ету әкенің міндеті болса, балаларының тәрбиесіне көңіл аудару ананың жауапкершілігінде. Қазір көп жас-тар Батыс елдеріне еліктеп, азаматтық некеге алданып жатыр. Шындығында, отбасын құрудың өзіндік шарттары бар. Өзара келіскен екі жас алдымен ата-анасының рұқсатын алады, олар куәгерлердің болуы, некені көпшілікке жариялау, АХАЖ бөліміне тіркелу сияқты жолдардан өту керек. Қоғамда жетім-жесірдің пайда болып, ортаның бұзылып жатқаны отбасы құндылығына терең мән бер-меуден. Әр халықтың бала тәрбиесіне қатысты ұстанатын өз ерекшелігі болады. Қазақ халқының бала тәрбиесіне тән ерекшелігі – жасы кіші адам үлкенге сіз деп сөйлейді, үлкен тұрып кіші, әке тұрып ұл, шеше тұрып қыз сөйлемейді. Қазақ қыз баланы аз күндік қонағым деп құрметтесе, ұлын ұрпағымды жалғастырушы деп бағалаған. Ата дәстүрімізден алшақтамай, ұлттық құндылықтарымызды сақтай білейік,- деп пікір білдірді Семей қалалық Орталық мешіттің наиб имамы Бекзат Баешов.
Жадыра ТӨЛЕГЕНҚЫЗЫ, «Семей таңы»
