Қала тұрғындары жағалау мен «Ақ балкон» деп аталатын тарихи нысанының аумағын тазалап, өңірдің маңызды табиғи аймақтарының бірін сақтауға өз үлестерін қосты.
Абай облысының Курчатов қаласында «Ертіс таза жағадан басталады» атты экологиялық акция өтті. Іс-шараға қоғамдық ұйымдар мен кәсіпорындардың өкілдері, жастар, еріктілер және белсенді қала тұрғындары қатысып, Ертіс өзенінің жағалауын тазалау және абаттандыру жұмыстарына атсалысты.
Акция қаланың ең танымал демалыс орындарының бірі саналатын жағалауда және Ертістің көркем көрінісін тамашалауға мүмкіндік беретін тарихи «Ақ балкон» нысанының аумағында ұйымдастырылды. Бұл орындар тұрғындар мен қала қонақтары үшін сүйікті серуендеу және демалыс аймақтарының бірі болып табылады.
Экологиялық бастамаға 130-дан астам адам қатысты. Акция барысында қатысушылар жағалау аумағы мен қоғамдық кеңістіктерді қоқыстан тазалап, қоршаған ортаның тазалығын сақтауға өз үлестерін қосты. Ұйымдастырушылардың айтуынша, мұндай іс-шаралар қаланың санитарлық жағдайын жақсартып қана қоймай, тұрғындардың экологиялық жауапкершілігін арттыруға да ықпал етеді.
Курчатов қалалық Жастар ресурстық орталығының директоры Айжан Мусатаева мұндай бастамалардың жастар арасында экологиялық мәдениетті қалыптастырудағы маңызын атап өтті.
«Экологиялық мәдениет әр адамның жеке жауапкершілігінен басталады. Ортақ іске жұмылған тұрғындар табиғатқа және өз қаласына деген саналы көзқарасты қалыптастырады», – деді ол.
Курчатов қалалық Ардагерлер кеңесінің төрағасы Ғалымжан Жұмаділов табиғатты қорғау ұрпақтар сабақтастығының маңызды бөлігі екенін жеткізді.
«Туған жерге деген сүйіспеншілік нақты істерден көрінеді. Біз жас ұрпаққа қоршаған ортаға ұқыпты қарау мәдениетін және туған өлкенің табиғи байлығын сақтауға деген жауапкершілікті жеткізуіміз қажет», – деп атап өтті.
Курчатов қалалық Қоғамдық кеңесінің мүшесі Любовь Валерьевна Киселева тұрғындардың экологиялық бастамаларға белсенді қатысуының маңыздылығына тоқталды.
«Ертіс жағалауы – қаламыздың бет-бейнесі. Оның тазалығы мен көркін сақтау – баршамызға ортақ міндет. Бүгінгі қамқорлығымыз келешек ұрпақтың жайлы әрі қолайлы ортада өмір сүруіне негіз болады», – деді ол.
Акцияға қатысушылар Ертіс жағалауының қала тұрғындарының бірнеше буынын біріктіретін маңызды қоғамдық кеңістік екенін атап өтті. Сондықтан жағалаудың тазалығын сақтау және оны абаттандыру мәселесі өзектілігін жоғалтпайды.
Курчатовтағы экологиялық акция Абай облысында өткізілген ауқымды санитарлық тазалық науқанының бір бөлігі болды. Биылғы жылдың 4 сәуірі мен 30 мамыры аралығында облыстың барлық елді мекендерінде абаттандыру және тазалық жұмыстары жүргізілді. Осы кезеңде сенбіліктерге 233 471 тұрғын қатысып, 3 987 ұйым мен 1 784 бірлік техника жұмылдырылды. Нәтижесінде 21 272 аула тазартылып, 523 саябақ пен сквер ретке келтірілді, сондай-ақ 25 559 тонна қатты тұрмыстық қалдық шығарылды.
