22 желтоқсан күні Семейдің Орталық алаңында бас шыршаның шамдары жағылды. Мереке алды шарада биыл қалалықтар мен шаһар қонақтары назарына лазерлік және файер-шоу мен Аяз ата және Ақшақарлар шеруі ұсынылды. Шырша шамдарын қала әкімі Ермак Сәлімов жақты. Айта кетерлігі, биіктігі 15 метрлік шыршаны безендіру үшін 200-ден астам жаңа жылдық шарлар мен 65 жарық диодты қарлар жұмсалған. Бұл бағыттағы шараларды, мемлекеттік тапсырыс бойынша, жеңімпаз атанған «Корифей» серіктестігі жүзеге асырыпты. Бас шыршаны құру, безендіру мен бұзуға қала қазынасынан 4 млн. теңге қаржы қарастырылған. Жиналғандар назарына ұсынылған шараны мәдениет және тілдерді дамыту бөлімі ұйымдастырды. Орталық алаңдағы мерекеге ертегі кейіпкерлері мен ескі және Жаңа жылдың символдары да қатысты. Салтанатты шара қала өнерпаздарыныңконцерттік бағдарламасына ұласты. Семей қаласының әкімі Ермак Сәлімов Орталық алаңға жиналған қауымды келе жатқан Жаңа жылмен құттықтады.
— Құрметті жерлестер! Ардақты ағайын! Шын жүректен алдымызда келе жатқан Жаңа жылмен құттықтаймын! Жаңа жыл барлығымызға тек қана жақсылық әкелсін! Ешқашан жамандық көрмейік. 2017 жыл біз үшін өте табысты жыл болды. Осы жылы жеткен барша жетістіктеріміз бен табыстарымыз ескі жылдың еншісінде естелік болып қала бермей, келе жатқан 2018 жылы жалғасын тапсын деген тілектемін. Биіктерге бірге жетейік,- деді қала әкімі өз құттықтауында.
А.ҚИЫҚБАЙ, Семей қаласы.
