Сейсенбі, 16 қаңтар күні «Нұр Отан» партиясының Семей қалалық филиалының қоғамдық қабылдау бөлімінде Сыбайлас жемқорлыққа қарсы іс-қимыл ұлттық бюросының Шығыс Қазақстан облысы бойынша департаменті басшысының орынбасары Кенжебай Жұмабеков азаматтарды жеке сұрақтары бойынша қабылдады.
Алматылық Ернат Қалқа-баевтың Семей қаласындағы ОВ156/14 түзеу мекемесінде жазасын өтеп жатқанына биыл он екі жыл болыпты. Жастықпен қателікке бой алдырып, жазасын темір торда өтеп жатқан жалғыз ұлын көріп қайту үшін Алматыдан анасы да келіп тұрады. Алайда ұлының қазіргі халіне көңілі толмаған Қалдыгүл Бейсембиева қоғамдық қабылдау бөлімінен көмек сұрай келіпті.
— Ұлыма жылына бір рет келемін. 8 қаңтар күні Алматыдан шығып, 9-шы қаңтарда сағат 11.00-де мекемеге келдім. Ұлымды түстен кейін, яғни сағат 2-де ғана жүздесуге алып келді. Өз баламды өзім танымай қалдым. Бүкіл денесі ісіп кеткен. Не болғанын сұрағанымда, мардымды жауап берген жоқ. Тек ертеңінде ғана камерасындағы өзімен бірге отырған 4-5 жігіттің соққыға жыққанын айт-ты. Қалалық прокуратурадан көмек сұрадым. Олар баламның соққыға жығылғанын растаса да, істі бір ай қарайтындарын жеткізді. Енді сіздерден көмек сұрай келдім. Балама жәрдем берсеңіздер екен. Немесе Алматыға ауыстырып беруге қол ұшын созуларыңызды сұраймын,- деді Қалдыгүл Тоқтабекқызы.
Сала мамандары істің анық-қанығын қадағалауға аламыз деген жауап қайырды.
Қоғамдық қабылдауда қарал-ған келесі мәселе шаһардағы «Айдана» балабақшасына қатыс-ты болды. Аталған балабақ-шадағы жеткіншектердің ата-аналары мекеменің сенімді басқаруға берілуіне қарсы екенін айта келіпті.
— Қала орталығында орна-ласқан мемлекет қарамағындағы «Айдана» балабақшасын сенімді басқаруға беру үшін тендер өтіп жатыр. 23 қаңтар күні қорытындысы жариялануы тиіс. Біз, ата-аналар, бұл туралы балабақша сайтынан кездейсоқ көріп қалдық. «Айдана» балабақшасы — өңірдегі алдыңғы қатарлы мекемелердің бірі. Мұнда тәрбие ісі мен әдістемелік жұмыстар өте жақсы жолға қойылған. Балаларға арналған түрлі үйірмелер қолжетімді бағада. Тәрбиешілердің кәсіби деңгейін де жоғары бағалаймыз. Балабақшада қазір 325 бала тәрбиеленуде. Аумағы үлкен әрі балалар үшін барлық жағдай жасалған балабақшаға сырттан инвестиция тартудың қажеті шамалы деп ойлаймыз. Қысқасы, біз балабақшаның сенімді басқаруға берілуін қаламаймыз,- дейді Рая Масаева есімді ата-ана. — Осы мәселе төңірегінде қала прокурорына электронды хат жолдадық. Әзірге жауап жоқ. Ал қала әкіміне жолдаған хаттың жауабын 15 күн күту керек. Оған дейін кешігіп қаламыз ба деп ойлаймыз. Егер балабақша сенімді басқаруға өтсе, ата-аналар 12 мың емес, одан 2-3 есе көп ақы төлейтін болады.
Ал Елена Велицкая есімді азаматша жұбайының қазасына байланысты қозғалған істі бақылауға алуды сұрайды. Елена Велицкаяның айтуынша, 22 шілде күні Велицкий Владимир Владимирович науқастанып, жедел жәрдем көлігімен Семей қаласының ММУ медициналық орталығының қабылдау бөліміне түседі. Жедел жәрдем дәрігерлері асқынған соқырішек диагнозын қойғанымен, аталған аурухана дәрігерлері оны келесі күнге дейін қараусыз қалдырып, тек ауруды басатын дәрілер салған. 23 шілде, яғни жексенбі күні оны үйіне шығарып, учаскелік гастроэнтерологке апаруды тапсырады.
— Облыстық аурухананың хирургия бөлімі марқұм жолдасымның соқырішек диагнозын жоққа шығарып, бауыры ауырады деп топшылаған. Жексенбі күні амалсыздан үйде болдық. Отбасылық дәрігер тек дүйсенбі күні кешке келіп, гастроэнтерологке жолдама берді. Алайда гастроэнтерологке келесі аптада ғана жолымыз түсті. Ол бізді ФГДС-қа жолдады. Ақыры, 27 шілде күні гастроэнтеролог соқырішек диагнозын растап, жедел операция жасау керектігін айтты. Сонымен, кешкі сағат 9-да ғана операция жасалды. Жолдасым дәрігерлердің жауапсыздығынан көз жұмды,- дейді Е.Велицкая.
5 ай бойы осы істің соңында жүрген Елена Велицкая қылмыстық істі қараудың тым созылып кеткенін айтып, кінәлі тарапқа тиісті жаза қолдануды өтінді.
Сыбайлас жемқорлыққа қар-сы іс-қимыл ұлттық бюросының ШҚО бойынша департаменті басшысының орынбасары Кенжебай Жұмабеков бұл істің жемқорлыққа қатысы жоқтығын айтып, шағымданушыға жағдай-ды түсіндірді.
Жадыра ТӨЛЕГЕНҚЫЗЫ, «Семей таңы»
