Жедел жәрдем дәрігерлерін даярлайтын еліміздегі тұңғыш оқу-клиникалық орталығы Семей мемлекеттік медицина университетінде ашылды. ҚР Ден-саулық сақтау министрлігінің 2017 жылдың 3 шілдесінде жарық көріп, күшіне енген №450 бұйрығына сәйкес, Қазақстанда «жедел жәрдем дәрігері» атты жаңа мамандықтың пайда болғанын газетіміздіңөткен сандарында жазған едік. Осы мамандық иелерінің алғашқы қарлығаштарын даярлау тағы да Семей мемлекеттік медицина университетіне жүктеліп отыр. Айта кетейік, абыройлы оқу орны осыдан бірнеше жыл бұрын да «жалпы тәжірибе дәрігерлерін» оқытуды бірінші болып қолға алып, сәтті жүзеге асырған болатын.
«Жедел жәрдем» дегенде бірден көз алдымызға жылдам қимылдау жайлы ой келеді. Бұл мамандық ең алдымен шапшаңдықты, кәсіби біліктілікті қажет ететіні сондықтан болар. Адам өміріне қауіп-қатер төнгенде алғаш көрсетілетін медициналық көмектің маңыздылығы да даусыз. Осы жауапты қызмет иелерін оқыту, бүкіл Қазақстанға тәжірибе тарату ісі Семей мемлекеттік медицина университетінде әлдеқашан басталған. Университет қабырғасында арнайы оқу-клиникалық база ашылып, триаж жүйесі енгізіліпті. Қабылдау бөлімінен басталатын жүйеде науқастың ауру деңгейіне байланысты көрсетілетін медициналық көмектер белгіленген. Мәселен, шұғыл ота жасауды қажет ететін науқастарды дайындау бөлмелері қызыл сызық бойында орналасса, сары сызықпен екінші кезекте көмек көрсетілуі тиіс бөлмелер қамтылған. Ал жасыл қоршау ауру деңгейі жеңіл науқастарға арналған.
Жалпы, мұнда триаж жүйесімен он бөлме қамтылыпты: тіркеу, науқастарды қарау бөлмелері, медициналық сұрыптау нәтижелері ескерілген функционалды арбалары бар әмбебап қарау аймақтары, манипуляциялық және шокқа қарсы аймақ, шұғыл операция жасау бөлмесі, науқастардыңқысқа мерзімді ем алу аймағы, қарқынды терапия бөлімі, емдік және диагностикалық шаралар көрсетілетін құрылымдық бөлімшелер, сонымен қатар жұқпалы аурулармен науқастанғандар үшін оңашаланған бөлмелер.
— Жедел жәрдем қызметін халықаралық стандарттарға сәйкестендіру үшін ҚР Денсаулық сақтау министрлігінің бұйрығымен Семей мемлекеттік медицина университетінде жедел жәрдем мамандығын оқыту алғаш рет қолға алынып отыр. Науқастың ауруын сұрыптау, медициналық эвакуациясын жүргізу Еуропа, АҚШ, Оңтүстік Корея, Жапония мемлекеттерінің тәжірибесінде бар. Осы елдердің тәжірибесінен үлгі ала отырып, біз де іске кірістік. Қазіргі уақытта Семей қаласының Жедел медициналық жәрдем ауруханасымен тығыз қарым-қатынастамыз. Жуық арада қаламыздағы және еліміздегі медициналық мекемелерде бұл жүйе іске қосылатын болады,- деді ректор Ерсін Жүнісов.
Қазіргі уақытта университеттің оқу-клиникалық базасында Батыс Қазақстан және Маңғыстау облыстарынан келген студенттер мен оқытушылар білім алып, өзара тәжірибе алмасуда. Алдағы уақытта өзге де аймақтардың студенттері мен оқытушылары, дәрігерлері қамтылмақ. Еліміздегі медицина саласын дамытуға сүбелі қосып келе жатқан университет ұжымының бастамасына біз де сәттілік тілейміз!
Жадыра ТӨЛЕГЕНҚЫЗЫ, «Семей таңы»
