Елбасының биылғы Жолдауын талқылап әрі насихаттау мақсатында ҚР Парламенті Мәжілісінің депутаты Светлана Ферхо Семейге жұмыс сапарымен келді. Халық қалаулысы «Нұр Отан» партиясы Семей қалалық филиалының қоғамдық қабылдау бөлімінде қала тұрғындарын жеке өтініштері бойынша қабылдау жүргізіп, мекемелерде бірқатар жиындар өткізді.
Елбасы, «Нұр Отан» партиясының Төр-ағасы Н.Назарбаев партияның қоғамдық қабылдау бөлімдерінде жергілікті мемлекеттік органдар басшылары мен барлық деңгейдегі әкімдер, құқық қорғау органдарының басшылары азаматтарды жеке өтініштері бойынша жүйелі түрде қабылдау өткізу керектігіне баса назар аударған-ды.
Бұл жолы Светлана Ферхоның қабылда-уына жиыны 20-дан аса қала тұрғыны жазылыпты. Қабылдауға, сонымен қатар, «Нұр Отан» партиясы Семей қалалық филиалы төрағасының бірінші орынбасары Гүлнар Жігітбаева мен қалалық білім бөлімінің басшысы Гүлжан Алтынбекова, ШҚО денсаулық сақтау басқармасы басшысының орынбасары Ғалия Жуасбаева, қалалық жұмыспен қамту және әлеуметтік бағдарламалар бөлімі басшысының орынбасары Қалияс Жұмабай сынды басқа да құзырлы мекемелердің басшылары мен қызметкерлері қатысты. Әр адамды мұқият тыңдаған Светлана Ивановна байыппен жауап қайтарып, мәселелерінің шешімін қатысушылармен бірге талқылады. Халық қалаулысының қабылдауына І топтағы мүгедек Танзира Жаманқызы Новобаженово ауылынан арнайы келіпті. 27 жастағы Танзира Моңғолия елінде туған. Бала күнінде отбасымен бірге атамекеніне оралған ол Новобаженово ауылындағы орта мектептің табалдырығын аттап, 5-сыныпта оқып жүрген ке-зінен бастап айықпас дертке шалдығыпты. Алайда, арбаға таңылған қыздың ауруының себебі әлі күнге дейін анықталмаған. Қабылдауға әпкесімен бірге келген Танзира халық қалаулысына бірнеше өтініш-тілегін айтты. Қамкөңіл жанның айтуынша, жасы 70-тен асқан жал-ғыз басты қарт анасы екеуі мекен етіп отырған ауылдағы баспаналары ескі әрі жайсыз көрінеді. Сондай-ақ, науқас қызын күту 70-тегі қарияға да оңайға тимеуде. Сондықтан, оларға көп қабатты пәтерде тұру қолайлырақ екенін айтады Танзираның әпкесі. Халық қалаулысынан осы мәселені шешіп беруге көмектесуін сұраған соң Танзира Жаманқызы шипажайда ем алғысы келетінін, сонымен қатар, жоғары білім алуға да құлықты екенін жеткізді. Әңгіме барысында Светлана Ферхо Танзираға Заң шеңберінде тиісінше көмек көрсетілетіндігін айтты. Құзырлы мекемелер мамандарына қамкөңіл жанның барлық мәселелерін мүмкіндігінше шешіп беруді тапсырды. Алайда, Танзираның тіркеуде ауылда тұрғанын білген мамандар пәтерге кезекке тұру үшін қалаға тіркелуі міндет екенін жеткізді. Дегенмен, бұл мәселе назарында болатынын айтқан Светлана Ивановна шипажай мәселесін бірден шешіп берді. С.Ферхоның сөзінше, енді жаз шыға Танзира мен оның күтушісі екеуі мемлекеттік шипажайлардың бірінде ем алуға тиіс. Ал, білім алу алдағы уақыттың еншісінде екенін, әзірге осы мәселелерді бір жақты етіп алғаны дұрыс болатынын айтып, қамкөңіл жанды жылы сөздермен жұбатты. Ал, баласының жүрегі ауыратынын айтқан көпбалалы ана Жанар Айсанова ҚР Парламенті Мәжілісі депутатынан баласын мүгедектік топқа шығарып беруіне көмек сұрай келіпті. Қабылдауда бол-ған барлық азаматтарға олардың мәселелерінің Заң тұрғысында шешілу жолдарын айтып, өзінің де қолынан келгенше көмек көрсететінін, кейбір мәселелерді ми- нистрліктерге жеткізуге өзі ықпал жасайтынын айтқан С.Ферхо:
{jcomments on}- Соңғы уақытта мүгедектік топқа шығу мәселесі жиі көтеріліп жүр. Сонымен қатар, қай топтағы мүгедек болмасын жыл сайын тексерістен өтіп тұрады. Қолы немесе аяғының кемістігі бар адамдарды жыл са- йын тексерістен өткізіп, оларды қайта-қайта әурелеудің не қажеті бар? Бұл жағына да мән беруіміз керек екен. Сондықтан, алдағы уақытта осы жөніндегі Заңға өзгерістер енгі-зуді қолға алу қажет сияқты, — деп атап өтті.
Халық қалаулысының қабылдауында болған қала тұрғындары Светлана Ферхоның атына жазған өтініштерін тікелей өз қолдарымен табыс етті. Құрғақ уәде беруден аулақ екенін айтқан Светлана Ивановна барлық өтініш-тілектерді қараусыз қалдырмайтынын, мәселелердің оңды шешімін табуына қол ұшын беруге барынша тырысатынын жеткізді.
«Нұр Отан» партиясының Семей қалалық филиалы мекемесінен шыққан соң ҚР Парламенті Мәжілісінің депутаты Светлана Ферхо жұмыс сапары барысында Семей қаласының Шәкәрім атындағы мемлекеттік университетінің белсенді студенттерімен кездесіп, Елбасының Жолдауының маңыздылығын түсіндірді.
Ал, тәуліктің екінші жартысында «Восток бройлер» ЖШС-нің ұжымымен, одан кейін қалалық әкімдіктің кіші залында қала активімен кездесті. Әкімдіктегі жиынға, сонымен қатар, бөлім басшылары, қалалық және облыстық мәслихаттың депутаттары, білім саласының мамандары мен колледж және мектеп басшылары қатысты. Жиында қалалық мәслихаттың хатшысы Бейсенбек Ақжаловтың кіріспе сөзінен соң Севтлана Ферхо мінберге шығып, баяндама жасады.
— Елбасының биылғы Жолдауы бұрынғы жылдардағыдан мүлдем өзгеше. Өйткені, онда елдің алыс болашағына, яғни 2050 жыл-ға дейінгі уақыт жеті бес жылдыққа бөлініп, бағыт-бағдар жасалған. Жоспар бойынша осы уақыт ішінде әлемдегі дамыған 30 елдің қатарына қосылу мақсаты тағы бар. Бұл үлкен міндетті орындау үшін аянбай еңбек етуіміз қажет. Сондай-ақ, Жолдауда «Мәңгілік Ел» идеясы айтылған. Бұл да еліміздің келешегінің кемел екенінің дәлелі болса керек, — деді С.Ферхо өз сөзінде.
Семейге дейін жұмыс сапарымен Өскемен мен Риддер қалаларында болған Мәжіліс депутатының Семейден кейінгі жұмыс сапары Риддер қаласы мен Глубокое ауданында жалғасты.
Нұрдәулет КӘКІШЕВ,
«Семей таңы»
