Су тасқынынан зардап шеккен семейліктерге алматылық «Тепло» қоғамдық қоры 100 қорап киім-кешек жіберді. Кеше, яғни 5 сәуір күні, Семей қалалық мәслихатының депутаты Мәрлен Көкірекбаев бастаған халық қалаулылары, «Нұр Отан» партиясының Семей қалалық филиалының өкілдері Павлодар — Алматы бағытындағы «Тұлпар — Тальго» пойызын күтіп алып, Алатаудың бөктерінен жеткен сәлемдемелерді жүк машинасына тиеді.
Шаһардағы қоғамдық ұйымдардың барша қазақстандықтарға арнаған Үндеуіне үн қосқан Алматы қаласындағы «Тепло» қоғамдық қоры Семей қаласына 100, Аягөзге 50 қорап жылы киім — кешек жіберді. Бұл заттар тасқыннан зардап шеккен мұқтаж жандарға үлестірілетін болады. Алдыңғы кезекте жалғыз басты аналар мен қарттар, ардагерлер, жағдайы төмен отбасылар қамтылмақ.
— Бізге қолдау көрсетіп жатқан алматылық қоғамдық қорға рақмет айтамыз. «Тепло» қоғамдық қоры төтенше жағдайлар кезінде мұқтаж жандарға әрдайым көмек қолын созып келеді. Осы уақытқа дейін Семейде тасқыннан зардап шеккендерге 3 тоннадан астам азық-түлік таратылды. Ал мектептерде білім бөлімінің ұйымдастыруымен оқу құралдары жиналып жатыр. «Ақшың» сауда үйінде және қала мешіттерінде көмек көрсету жәшіктері қойылған. Барша семейліктерді осы акцияларға қатысуға шақырамыз,- деді «Нұр Отан» партиясының Семей қалалық филиалы төрағасының орынбасары Зульфия Жамалтдинова.
«Қазақстан темір жолының» Семей тасымалдау бөлімшесінің директоры, қалалық мәслихат депутаты Мәрлен Көкірекбаев темір жол қызметкерлерінің де гуманитарлық көмек көрсетуден тысқары қалмағанын және Қазақстанның әр аймағынан жәрдем келіп жатқанын айтуда.
Жадыра ТӨЛЕГЕНҚЫЗЫ, «Семей таңы»
