Көктемгі су тасқыны кезінде зардап шеккен Пристань, Мирный және Затон кенттері тұрғындарының материалдық шығынын өтеу жөніндегі қаулы жобасын Үкімет мақұлдады. Осы апта ішінде қаулыға қол қойылғаннан кейін, тиісті қаржы бөлініп, қираған үйлерді қалпына келтіру жұмыстары басталмақ. Бұл туралы Семей қаласының әкімі Ермак Сәлімов сенбі, 2 маусым күні Мирный кентінің тұрғындарымен кездесу барысында мәлім етті.
Баспаналарын топан су басып, үйлерін тастап кетуге мәжбүр болған Мирный кентінің халқы ұзақ күтті бұл күнді. Көп ұзамай Үкімет тұрғындарға өтемақы төлейтін болады.
Төтенше жағдай орын алған кезде біз бағынатын заң, ережелер бар. Үкімет өзінің төтенше жағдайлар қорынан қаражат бөлсін деген өтінішпен Астанаға арнайы барып қайттық. Өкінішке орай, тиісті шаралар бірден жүзеге асырылмайды, бірақ қаулы жобасы қабылданды, бірер күннің ішінде қол қоюлары керек. Құжатта көрсетілгендей, қаржы тек қираған үйлердің орнына жаңа баспана алып беруге, сондай-ақ үйді қайта жөндеу жұмыстарына беріледі. Сондықтан Үкімет қорынан бөлінетін ақшаны жеке шоттарыңызға аударуға келмейді,- деді қала әкімі Ермак Сәлімов.
Қаражат, бағалау комиссиясы есептеп берген көлеміне сәйкес, белгілі мөлшерде құрылыс компанияларына аударылатын болады. Тұрғындардың компанияны өздері таңдауға мүмкіндіктері бар.
Пристань, Мирный аудандары бойынша 205 тұрғын үй жөндеуді қажет етсе, 9 баспана қайта қалпына келтіруге жатпайды, себебі апатты жағдайда. Жаңа үй алуға Үкімет 58 млн. теңге, жөндеу жұмыстарына 285 млн. теңге бөледі. Тұрмыстық техникалар үшін өтемақы жергілікті бюджет есебінен төленетін болады,- дейді әкім.
Жөнделетін баспаналардың сапасына алаңдаушылық білдірген тұрғындардың әрбіреуінің сауалына қала басшысы толыққанды жауаптар берді, ұсынысын да айтты.
Қала әкімінің баспасөз қызметінің мәліметіне сүйенсек, «Гордорстрой» жауапкершілігі шектеулі серіктестігі 16 көшеге ұсақталған тастарды төседі. Ал «Сәт — Транс» серіктестігі бірнеше саяжай үйлерді қалыпқа келтіруді аяқтауға жақын. Саяжайішілік жолдарға қиыршықталған тастар себілді. Сондай-ақ «12 месяцев» құрылыс дүкенімен линолеум, ДСП, ДВП, тұс қағаздар және басқа да қажетті құрылыс материалдарын тұрғындарға беру жөнінде келісімшарт жасалған екен. Айта кетейік, бүгінгі күні Электротехникалық колледждің жатақханасын, қаладағы қонақ үйлерді қызыл судан зардап шеккен 140 адам паналауға мәжбүр болып отыр.
Осы күні Ермак Сәлімов Ұшақтар кентіндегі жеке сектор тұрғындарымен де кездесті. Осыдан он жыл бұрын жер телімдерін алған тұрғындар соңғы жылдары үй салып, тұра бастаған. Бірақ үйлерге электр желілері тартылмағаны негізгі мәселе болып отыр.
Қазіргі уақытта қалалық әкімшілік жобалау-сметалық құжаттарын дайындап, сараптамадан өткізуде. Сараптама қорытындысы осы маусым айында шығып, бюджет нақтыланғанда, қаражатқа өтінім беріледі. Жоба құны 690 миллион теңге. Қазір уақытша болса да тұрғындарға жарық беру мәселесі қарастырылып, тиісті орындарға нақты тапсырма берілді. Ұшақтар кентіндегі жер телімдері республикалық «Нұрлы жер» бағдарламасына енгендіктен, басқа да коммуналдық жұмыстарды шешу жоспарланып отыр. Өткен жылы мектеп пайдалануға берілсе, қазіргі уақытта балабақша салынып жатыр. Тұрғындарды ауыз сумен қамту және емхана салу жұмыстары талқылануда.
Жібек СЕРҒАЗЫ, «Семей таңы»
