Мирный кентіндегі апатты үйлерге жөндеу жұмыстарының басталуына орай, өткен жұма, 8 маусым күні қала әкімі Ермак Сәлімов атқарылып жатқан шаруалар барысын арнайы барып бақылап қайтты.
Мирный кентінде 50-ге жуық үй апатты деп танылса, мердігер компания «Востокстройгрупп» ЖШС әзірге тек 2 үйге құрылыс жұмыстарын бастапты. Себебі үй иелері жергілікті әкімдіктен қаражатты қолдарына беруін өтініп отыр екен. Ал шаһар басшысы, заң бойынша, қаражаттың қолға берілмейтінін тұрғындарға қайталап айтуда. Олар өздеріне ұсынылған мердігерлердің ішінен біреуін таңдап, әкімдікке өтініш берулері керек.
— Бобровка кентін қоспағанда, қалған аудандар бойынша әзірге тек екі үйді ғана қалыпқа келтірудеміз. Тағы алты үй мердігерлерін жуырда ғана анықтады. Дүйсенбі күні осы мердігер компанияларға республикалық бюджеттен қаражаттың 30 пайызы беріледі. Ал қалғандары өздеріне тиімді жолдарды қарастыруда. Көбі қаражаттың қолдарына берілуін сұрап отыр,- деді қала әкімі Ермак Сәлімов. Шаһар басшысының сөзіне сүйенсек, бүгінде Бобровка кентіндегі 110 үйдің жөндеу жұмыстары аяқталуға жақын.
Мердігерлердің көмегіне жүгінгендердің бірі — Мирный кентіндегі Загородная көшесінің тұрғыны Ольга Машкова. Сол күнгі қызыл су бұл үйдің терезесіне дейін жетіп, бір тәулік тұрған. Мердігерлер болса баспананың жөндеу жұмыстарын 2 млн. 330 мың теңгеге бағалап отыр.
— Қожайынмен бірлесе жұмыс атқарып жатырмыз. Алғашында тек еденді ауыстырамыз деп ойлап едік. Бірақ еденді ашқаннан кейін ылғалдан қаптап өскен саңырауқұлақтарға тап болдық. Сондықтан алдымен бәрін тазартып, бетон құю керек. Цемент төсегеннен кейін ғана еден жабындысын саламыз. Сонымен қатар үйдің қабырғаларын түзеп, тұсқағаз жабыстырамыз. Есіктердің орнын да ауыстыру керек. Екі аптадан соң барлық жұмыстарды тамамдаймыз,- дейді «Востокстройгрупп» ЖШС директорының орынбасары Кирилл Андреев.
Аталған екі үйдің бірі зейнеткерлер — Николай және Лидия атты Романовтар отбасына тиесілі. Олардың сөзіне қарағанда, еден мен жертөлесі әлі кеуіп үлгермеген. Сондықтан құрылысшылар қуатты желдеткіштерді әкеліп қосыпты. Қазір барлық жұмыстар аулада жүріп жатыр екен.
Айта кетейік, комиссияның шешімімен тұруға жарамсыз деп танылған Мирный кентіндегі бес үйді және Пристань кентіндегі төрт үйді жаңасына ауыстыру үшін бюджеттен 58 млн. теңге қарастырылған. Ал аталған аудандардағы қызыл судан зардап шекен 204 үйдің шығыны 371 млн. теңгені құрап отыр.
Жадыра ТӨЛЕГЕНҚЫЗЫ, «Семей таңы»
