Қала базарлары мен сауда нүктелеріндегі әлеуметтік маңызы бар азық-түлік тауарларының негізсіз қымбаттауының алдын алу шаралары бірнеше жыл бұрын қолға алынған. Бағаны бірқалыпты ұстау мақсатында арнайы тұрақтандыру қоры да құрылды және соның арқасында халық күнделікті ас мәзіріне қажетті өнімдерді едәуір арзанға сатып алу мүмкіндігіне ие болды. Оң нәтиже берген бұл бастама биыл да жалғасын тауып, оны іске асыру аясындағы шаралардың ауқымы кеңейтіліп келеді. Атқарушы билік тарапынан қаланың сауда кәсіпорындары мен базарларындағы бағаға мониторинг жүргізіліп, оның тым шарықтап кетпеуі қадағалануда. Сондай-ақ, тұрақтандыру қорының өнімдерін саудалайтын арнайы орындардың саны да көбейіп келеді. «Ақшың» сауда орталығынан осындай нүктенің ашылуы соның дәлелі.
Қала әкімшілігі мен сауда кәсіп-орындары жетекшілерінің арасындағы меморандумның жүзеге асырылуы аясында ашылған бұл нүктедегі тауарлардың бағасы келісімге сәйкес базардағыдан біршама арзан. Мәселен, қант келісі 152 теңгеден, қарақұмық 120 теңгеден, өсімдік майы 280 теңгеден, көкөністердің барлық түрі 55 теңгеден сатылады. Базарға келген қала тұрғындары азық-түліктің осы бір түрлерін арзан бағамен сатып алу мүмкіндігінің пайда болғанына разы екендіктерін жасырмайды. Мысалы, Махфуза Құдайбергенова есімді әже: «Осындай күнделікті пайдаланатын тауарлардың базардағыдан гөрі аз ақшаға пұлданып сатылып жатқанына ризамыз. Біз сияқты зейнеткерлерге бұл үлкен жеңілдік. Жағдайымызды ойлап осындай сауда орындарын ашып жатқан азаматтарға рахмет»,- деп алғысын білдірді.
Аталмыш сауда нүктесінің ашылуына келген «Шығыс Самғау» ЖШС төраға-сының орынбасары Талғат Мұратов пен кәсіпкерлік бөлімінің кәсіпкерлік және сауда секторының меңгерушісі Әмина Сыздықова бұл орындағы тауарлар құнының жуық арада ешқандай өзгеріске ұшырамайтынын айтты.
— Тағы да айта кетерім, бүгін Юность шағынауданында да тұрақтандыру қорының өнімдерін саудалайтын осындай үш нүкте ашылды. Сондай-ақ, Дальняя көшесіндегі «Дина» дүкенінде де азық-түлік өнімдерін төмен бағамен сататын арнайы орын бөлінді. Қазір қалада тұрақтандыру қорының өнімдерін саудалайтын 40-тан астам нүкте бар. Жалпы алғанда осы аптаның соңына дейін олардың санын алпысқа дейін жеткізуді жоспарлап отырмыз, — деді Әмина Сыздықова.
{jcomments on}Осылайша девальвацияға байланысты бағаның негізсіз өсуінің алдын алу шаралары өз деңгейінде жүргізіліп жатыр деуге болады. Қала басшылығының осы бағыттағы атқарған шараларының аясында әлеу-меттік маңызы бар өнімдерді сататын орындардың саны көбейсе, қарапайым жұрттың өз қаражаттарын үнемдеуге мүмкіндіктері артады .
Мирас ҚҰСАЙЫН,
«Семей таңы»
