Семейде Қала күнін тойлауға дайындық қызу. Бұл мақсатқа қала басшылығы шамамен 8-10 млн. теңге қаражат жұмсамақ. Семей қаласы әкімінің орынбасары Наадежда Шарова журналистердің басын біріктіріп, биылғы Қала күніне орайластырылған іс-шаралардың өткізілу барысымен, жоспарымен таныстырды. Үш күнге созылатын келелі кездесулер, жарыстар, тағы басқа көрікті де қызықты мерекелік шаралардың алғашқы легі 20 қыркүйек күні басталмақ.
Журналистермен жүздескен қала әкімінің орынбасары Надежда Шарова сөз басында осыдан екі жыл бұрын Қоғамдық кеңес және қалалық мәслихат депутаттарының шешімімен қыркүйек айының соңғы жексенбісі Қала күні болып белгіленгенін атап өтті. Биылғы мереке осы айдың жиырма үшіне дөп келеді екен. Мерекеге ерте қамданудың да өз себебі бар. Себеп сол — Қала күні бір тәулікпен тамамдалмайды.
— Мерекелік іс-шаралар легін білім бөлімі бастайды. Шаһардағы барлық орта білім беретін мектептерде 20 қыркүйек күні сынып, тәрбие сағаттары өтетін болады. Бұл эстафетаны ары қарай мәдениет бөлімі жалғастырып, «Автобуста оқиық», «Тілдер шеруі» акциясы, сондай-ақ музейлерде өлкетанушылардың қоғам өкілдерімен кездесуі ұйымдастырылады. Сенбі, 22 қыркүйек жастарға және ауыл шаруашылығы жәрмеңкелеріне арналады,- деді Н.Шарова.
Иә, бұл күндері өткізілуге тиіс жоспарлы жұмыстар, жағымды жаңалықтар, ретро және заманауи концерттік бағдарламалар биылғы мерекенің сәнін кіргізіп, мәнін арттырады. Негізгі мереке 23 қыркүйек күні сағат 11:00-де қаланың орталық алаңынан бастау алып, Орталық саябақта, М.Әуезов алаңында жарасымды жалғасын таппақ. Дәл осы күні семейліктер басты төрт, яғни Шәкәрім даңғылы, Абай, Дулатов, Жұмабаев көшелерімен шерулетіп жүріп өтіп, ескерткіштерге гүл шоқтарын қояды. Сағат 11:00-ден 17:00-ге дейін балалар фестивалі, Ертіс жағалауында түрлі көрмелер ұйымдастырылады. Сондай-ақ Қала күнін бір кісідей атап өтуге кәсіпкерлерді де тарту ойластырылған. Олардың демеушілігімен ірі сауда орындарымен келісімшарттар жасалып, бағалы сыйлықтар ойнатылатын ұтыс ойындары өткізілмек. Мереке кешкі сағат бесте Орталық алаңда қала әкімі Ермак Сәлімовтің қатысуымен өтетін гала-концертпен, отшашумен қорытындыланады. Гала-концертке Қуандық Рахым, Айқын Төлепберген сынды Қазақстан эстрадасының әншілері қатысады деп күтілуде.
Жібек СЕРҒАЗЫ, «Семей таңы».
