Өткен аптада голливудтық киноактер Дон «Айдаһар» Уилсон Семейге келді. Дүйсенбі, 24 қыркүйек күні қаламызда өткен «Fashion House International – Шығыс Қазақстан аруы» халықаралық конкурсының өңірлік жартылай финалына қазылар алқасы төрағасы ретінде шақырылған голливудтық жұлдыз және кикбоксингтен 11 мәрте әлем чемпионының бұл Қазақстанға алғаш мәрте келуі емес.
«Fashion House International – Шығыс Қазақстан аруы» жобасы Семейде осымен екінші жыл қатарынан жүзеге асуда. Бұл жолы Номад халықаралық кинофестивалі аясында қолға алынған жобаның президенті Даниал Ахметов болса, продюсері Еркін Ялгашев.
Кино саласында 28 жыл еңбек етіп келе жатқан Дон «Айдаһар» Уилсон бүгінде продюсерлікке бет бұрған екен. Сұхбат барысында Голливуд жұлдызы келешекте жергілікті актерлердің қатысуымен фильмдер түсіру үшін Қазақстанға қайта келуге ниетті екенін жасырмады.
– Кикбоксер ретінде 30 чемпионатта жеңіске жетіп, үш түрлі салмақ дәрежесінде әлемнің 11 дүркін чемпионы атандым. Ал «Айдаһар» лақап аты 1974 жылы кунг-фумен айналысып жүргенде пайда болды. Мен кикбоксингке келгенде лақап ат ойлап табуға кеңес берді. Бірден ойыма келгені «Айдаһар» болды. Содан бері мені Дон «Айдаһар» Уилсон деп атайды. Дон деген менің Дональд деген қысқарған есімім. Ал киноға досым Чак Норисстің кеңесімен келдім. Бұдан кейінгі мансабым киномен байланысты. 30-дан аса фильмде басты рөлдерді сомдадым, – дейді Д.Уилсон.
Оның айтуынша, бұл сұлулық байқауына төрағалық етуі болашақ киноактерлерді іріктеуге көмектеспек. Қазылар алқасының құрамында сондай-ақ облыстық, қалалық әкімшілік өкілдері, Қазақстан мен Азия арулары атанған бойжеткендер және продюсер Еркін Ялгашев енді.Өңірлік жартылай финалдың бағдарламасына сай, қатысушылар тек салтанатты түрде жүріп өтіп, олардың сахнадағы қимылдары мен өзін-өзі ұстауы, сыртқы сұлулығы бағаланды. Қазылар алқасының шешімімен Надежда Недосекова «Шығыс Қазақстан аруы – 2018» атанды. Енді ол Өскеменде өтетін халықаралық байқаудың ақтық сынында өнер көрсететін болады.
Жадыра ТӨЛЕГЕНҚЫЗЫ, «Семей таңы»
