Сәрсенбі, 10 қазан күні Семей Қалалық Мәдениет үйінде «ШҚО Семей қаласының арнаулы әлеуметтік қызметтер көрсету орталығы» КММ мен «ШҚО Семей қаласының жұмыспен қамту, әлеуметтік бағдарламалар және азаматтық хал актілерін тіркеу бөлімі» ММ-нің ұйымдастыруымен, қала әкімдігінің қолдауымен мүмкіндігі шектеулі жандардың 5-ші облыстық «Екі жұлдыз-2018» шығармашылық конкурсының гала-концерті өтті. Мерекелік іс-шараға қала әкімінің орынбасары Надежда Шарова, қалалық мәслихаттың депутаттары, денсаулық сақтау және білім беру мекемелерінің өкілдері қатысты.
Аталмыш мерекелік шара Мүгедектер күніне және Астана қаласының 20 жылдық мерекесіне орай «Ән-жырым саған, туған ел!» айдарымен өткізілді. Ән сайысында қатысушылар әртүрлі байқаулардың лауреаттары мен дипломанттары атанған Қалалық Мәдениет үйінің кәсіпқой әншілерімен жұптасып өнер көрсетті. Елбасымыз өз Жолдауында: «Мүмкіндігі шектеулі адамдар үшін Қазақстан кедергісіз аймаққа айналуы тиіс»,- деп атап көрсеткені белгілі. Иә, ерекше жандардың рухани дамуына ықпал ету, олардың бойындағы қабілетін ашып, өнерін ел алдына шығару мақсатында өңірде «Екі жұлдыз» ән байқауы дәстүрлі түрде жыл сайын ұйымдастырылып келеді.
Өнер додасының негізгі мақсаты – музыкаға бейімі бар балаларды анықтау, олардың шығармашылықтарын шыңдау, өмірге деген құштарлығын, рухани деңгейін арттырып, отансүйгіштікке, ұлтжандылыққа тәрбиелеу, бағыт-бағдар беріп, қолдау көрсету,- дейді әлеуметтік жұмыс жөніндегі маман Райхан Байтілеуова.
«Екі жұлдыз» сайысы осыған дейін аудандық, қалалық деңгейде өткізіліп келсе, бұл жолы облыс көлемінде ұйымдастырылды. Байқауда облыстың жеті ауданынан, атап айтар болсақ, Зайсан, Аягөз, Абай, Көкпекті, Жарма, Үржар, Тарбағатайдан және Семей қаласының арнаулы әлеуметтік қызметтер көрсету орталығынан келген 13 сайыскер өздерінің бақтарын сынады.
Өткен жылғы «Екі жұлдыз» байқауының жеңімпазы, қонақ ретінде шақырылған Нұрым Мұратов есімді талантты жеткіншек сахнада өнерін көрсетіп, көрерменнің ыстық ықыласына бөленді. Жеңімпаздар дипломдармен марапатталып, ақшалай сыйлықтарға ие болды. Өнерлі өрендердің жетекшілеріне де алғыс хаттар табыс етілді.
Қуандық НӘДІРБЕКҰЛЫ, Семей қаласы.
