Семейде Шәкәрім атындағы үш тілде оқытатын №5 көпсалалы гимназияда Рухани жаңғыру орталығы ашылды.
Аталмыш орталық ғасырға жуық тарихы бар білім ордасының түлегі, облыстық мәслихат депутаты, «Ақшың» корпорациясының президенті Марат Құрманбайдың демеушілігімен ашылып отыр.
— Оқушыларды құр сөзбен ғана емес, нақты іспен де тәрбиелейік деген оймен мектебіздің түлегі, белгілі меценат Марат Серікжанұлына қолқа салдық. «Сіз қаламызға, елімізге көп көмек жасап жүрген халық қалаулысысыз. Есіміңіз облыс, республика көлемінде танымал. Сіздің осы мектептің қабырғасынан шыққаныңызды, бүгінде қаншама адамды жұмыспен қамтып отырғаныңызды жас буын білсін, үлгі алсын, ел игілігі жолындағы еңбегіңізді көрсетейік. Сіз осыған қалай қарайсыз?»- дегенімізде, қарсылығын білдірген жоқ. Расында, мектепте оқып жатқан оқушылар осы азаматтан үлгі алып, еліне қызмет етіп жатса қандай ғанибет. Бір қуаныштысы, орталықтың ашылуы Елбасымыздың Жолдауымен тұспа-тұс келіпті. Қуаныш құтты болсын!- деді гимназия директоры Алма Әубәкірова.
Орталықта ақын, ойшыл Шәкәрім Құдайбердіұлының шағын бюсті қойылған екен. Елбасының кітаптары, сондай-ақ кәсіпкердің өмір жолы, жеткен жетістіктері жайындағы деректер де орталық төрінен орын алыпты.
— Мен осы мектепте оқыған кезде, Семейде бар болғаны екі-ақ қазақ мектебі болды. Қазақ балалары бұл білім ордасына алыстан келіп оқитын. Бұл мектепте менің әкем де білім алған. Бүгінде азамат болып қалыптасып, ел кәдесіне жарап жүргеніміз осы мектептің, бізге тәлім берген ұстаздарымыздың еңбегінің арқасы деп білемін. Бұл мектепте Алаш қайраткерлерінің табанының ізі жатыр. Әйгілі балуан Дәулет Тұрлыхановтың атасы Тұрлыхан осы мектепте директор болған. Мұның бәрін жас ұрпақ білуі керек. Бұл орталықта алдағы уақытта жас ұрпаққа үлгі боларлық әртүрлі кездесулер, тағылымды шаралар өтеді деп ойлаймыз,- деді Марат Құрманбай.
Рухани жаңғыру орталығындағы алғашқы тағылымды кездесу өткен сенбіде өтті. Қазақтың дәстүрлі ән орындаушысы, Темірбек Жүргенов атындағы Өнер академиясының Дәстүрлі ән кафедрасының меңгерушісі Рамазан Стамғазиев пен кафедра оқытушылары қаламыздағы Мұқан Төлебаев атындағы музыкалық училищенің студенттерімен жүздесті. Дәстүрлі ән кафедрасының ашылуының 10 жылдығына орай Семейге арнайы келген қонақтар студенттердің сауалдарына жауап беріп, оларға Алматыда орналасқан Өнер академиясында білімдерін жалғастыруға кеңес берді.
— Кафедраның мықты ғылыми және педагогикалық әлеуетінің арқасында 2012 жылы магистратура, 2013 жылы PhD докторантура ашылды. Қазіргі заман талабын ескеріп, студенттердің, әншілікпен қоса, ғылыммен айналысуына да жағдай жасап жатырмыз. Екі жылда бір рет дәстүрлі ән орындаушылары арасында байқау ұйымдастырып тұрамыз. Жеңімпаздарға оқуға түсуге жеңілдіктер қарастырылған,- деді Рамазан Стамғазиев.
Осы күні қонақтар Абай атындағы кітапханада семейліктерге «Ән-күй керуені» атты концерттік бағдарламасын ұсынды. Кеште ҚР-ның еңбек сіңірген әртісі Рамазан Стамғазиев, ҚР-ның мәдениет қайраткерлері Қайырғазы Төлен, Талғат Мұқышев, Мұрат Әбуғазы, Нұржан Жанпейісов және басқа да әншілер өнер көрсетті.
Жадыра Төлегенқызы, «Семей таңы»
